《令車迷們「瘋狂」的一個暑假 淺談藍軍大灑金錢的一個轉會窗 - 後場篇》

藍獅 於 16/10/2020 發表 收藏文章
《原創文章 歡迎轉載 請列明出處 謝謝》
-請支持Bluexlion車迷手記 Facebook專頁-


用「瘋狂」去形容車路士啱啱過去哩個轉會窗,絕對可以話合適不過,受轉會禁令影響,藍軍喺上個賽季並無作出任何收購,不過巧合地用上陣中一班年輕人大把青春足球,最終更以第四名完成賽季,林伯特更得到管理層前所未有既支持去改革陣容,針對個別位置進行收購,希望令陣容更為完整,而今次將會為大家逐一點評每單轉會收購,作為回顧並且總結一下今個轉會窗球隊所進行既操作...

相信喺轉會窗開始之前,無一位車迷會估計到球會會有咁大野心進行咁多收購,先有薛耶治早於上季季中完成交易,再到添姆雲拿由利物浦峰迴路轉到車路士,其實早喺哩兩單交易過後都認為球隊已經完成前場補充,喺哩個轉會窗將會集中於後場位置包括中堅以及左閘既收購,誰不知一係唔做一係就一做做到底,球隊一改以往「deadline fighter」既作風,更可以話喺全球受疫情影響下進行逆巿操作。
先由後場講起,中堅同左閘哩兩個位置絕對係車路士首要需要處理既地方,由過去一季都睇到,林伯特「風火輪式」不斷更換中堅組合,但無論點樣組合四位中堅人選都好都依然給予唔到說服人既信心,魯迪加自傷癒後表現大不如前,身為四位中堅之中最有經驗既一位亦無法負上領導防線既責任,而蘇馬、基斯甸臣以及湯姆利三位亦過於幼嫰,無法承受太多職責以及缺乏場上受壓既處理經驗,繼而令整條防線都出理結構上既缺憾。

而同樣地喺左閘位置上亦出現類似問題,由於林伯特既戰術體系非常依賴兩閘插上助攻,但無論係馬高斯阿朗素抑或艾馬臣都各自存在自身缺點,情願有時用艾斯派古達做逆足替更都唔用佢兩個;球會透過免簽堤亞高施華以及收購捷維爾作為兩個位置既補充,前者喺能力同級數方面實在無容置疑,加上具備豐富既大賽經驗,絕對能夠於賽場上同訓練之中為防線注入質量上既變化,雖然巴西人存在語言不通,但相信防線上大部份球員都能以法語系溝通的話問題並不大。

至於捷維爾貴為傳奇左閘艾殊利高爾點名對象,亦係林伯特喺左閘位置上既首選目標,自於李斯特城嶄露頭角後捷維爾一直受到唔少英超列強所爭逐,球員前插時機準繩再加上傳中落點準確,能夠有效地增強藍軍喺閘位後上助攻既質素,而且喺速度同體能上都可以持續全場九十分鐘輸出,捷維爾特質上既全面性都足以取代阿朗素以及艾馬臣兩者;防線上最後一名新收購球員,同樣以免簽方式加盟既中堅沙亞(Malang Sarr),雖然暫時未清楚球員究竟係球會還是林伯特既引援目標,亦已經將佢外借到萄超波圖一個球季,不過能夠以免簽方式將一位剛二十出頭既潛力中堅收歸旗下,即使他日不適合球隊發展而賣出去亦會有所進帳。

另外喺門將位置上作出左收購文迪作為補充,先不論是否作為基柏既競爭者,始終作為二號門將既卡巴尼路經已年紀老邁,不能夠再持續承受高密度賽事,球隊有需要作出收購作為黎緊取代卡巴尼路輪換既人選,再者文迪比起基柏經已擁有先天身體優勢,身高手長加上反應敏銳都經已有力成為陣中一號門將既特質,不過無論最終基柏能唔能夠打番起都好,相信文迪都只係球會喺門將位置上既短期方案,始終球員都經已二十有八,如果球會依然希望以收購年輕而具潛力既門將作為目標的話,黎緊幾季就將會繼續物色有關人選。

由於篇幅過長,暫且論述完後場過後下次再講關於前場收購同出售球員等操作,以及為車路士今個轉會窗作總結...


文章發表時間 : 16/10/2019 11:20
文章最後更新時間 : 16/10/2019 11:20

《原創文章 歡迎轉載 請列明出處 謝謝》
Bluexlion車迷手記 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→