《主場優勢卻沒有主導形勢 對失落已無太大感覺︱車路士對修咸頓英超賽後感》

BluexLion車迷手記 於 19/02/2023 發表 收藏文章
《原創文章 歡迎轉載 請列明出處 謝謝》
-請支持Bluexlion車迷手記 Facebook專頁-


老實說,對於今場失利既失落已經沒有太大感覺,可能真的習慣便好了,亦睇唔出哩隊車路士對住中下游可以有食硬既感覺,反而應該係調番轉人地更有信心喺你身上拎到分,氣勢真係高下立見,聯賽首次被修咸頓雙殺。

樸達選擇喺今場對修咸頓既賽事中選擇安排輪換,如果你以一週雙賽既角度輪換當然係必需,但以球隊近期走勢黎講其實急需三分止血,尤其係你上場聯賽面對同樣喺中下游既韋斯咸時都已經失分,今場對住同樣處於聯賽下半版既修咸頓時都理應搶分為先,但選擇哩一刻收起施華、列斯占士同夏維斯等常任正選球員,而講緊早幾日作客對多蒙特時樸達只係後備換左兩個球員,實在唔理解當中操作。


艾斯派古達取代占士為右閘正選,中堅由上場復任正選既高列巴尼拍住巴迪亞舒尼為中堅組合,左閘就依然係復出無耐既捷維爾,中場方面除左安素費南迪斯外亦有高華錫復出打番正選,至於前場就派出馬杜克、蒙特、D科芬拿以及祖奧菲歷斯為攻擊組合。
上半場車路士既表現可以話完全唔理想,喺主場之下反而被修咸頓主導形勢,加上中後場犯錯都令對手成功製造到具威脅既畫面,由於缺少左夏維斯喺最前點,變相令祖奧菲歷斯喺中路唔夠力度做推進,身邊隊友都缺少支援,明顯顯得孤立無援,缺少左中路突破亦令藍軍只能主打側擊居多,但好多時都只依靠一啲窄角度射門,根本產生出黎既威脅都不大,之後更比禾特包斯一下基本上無得救既罰球直射入網,基柏喺動作上都經已提點人牆要跳到盡,但罰球路線最終都成功避開人牆真係無得講。


到下半場樸達作出兩個即時調整,史達寧同W科芬拿入替D科芬拿以及高列巴尼,前者落場後的確能夠喺前線製造到幾下唔錯既攻勢,藍軍亦開始主導番進攻既節奏同操控權,去到64分鐘進行第二次換人,由梅迪歷及夏維斯入替馬杜克及蒙特,亦明顯地見到當夏維斯落場後祖奧菲歷斯既表現先有好轉,至少喺前線既曝光率有所提升,不過都一直無法將個波放到入網,其後更有艾斯派古達既受傷,被送往醫院觀察希望無乜大礙,最終車路士亦以0-1喺主場全失三分。

球迷們其實對樸達既耐性都經已消磨得八八九九,老實說如果係油王年代相信經已被炒多時,依加喺新班主掌權之下至比到咁多時間樸達,暫時睇黎都未見到管理層有換教練既行動,而正待業既教練之中的確不缺選擇,但有冇人願意喺季中哩個時候加上一季換三帥下上任就真係唔知,仲要未計佢地有機會教得比樸達更差;至於樸達本人面對既壓力已經愈黎愈大,聯賽失分連連加上歐聯首回合敗仗,黎緊仲要作客熱刺以及面對列斯聯,本身喺同樣喺中游難兄難弟既利物浦已經開始上力向上走,如果車路士繼續失分落去就只會愈見下沉。

文章發表時間 : 19/2/2023 10:15
文章最後更新時間 : 19/2/2023 10:15

《原創文章 歡迎轉載 請列明出處 謝謝》
Bluexlion車迷手記 每週出文 用心寫每篇文章 給我們一個Like作支持 : https://www.facebook.com/bluexlion/
標籤: 車路士  修咸頓  

留言


請按此登錄後留言。未成為會員? 立即註冊
    快捷鍵:←
    快捷鍵:→