有盧卡古的車路士 精選

圖片來源：Sky Sports

時隔兩年盧卡古 (Romelu Lukaku) 回歸英超賽場，車路士宣布以破球會紀錄嘅 9,750 萬鎊從國際米蘭買入呢位曾經喺度效力過嘅前鋒。
盧卡古嘅加盟相信可以大大改善車路士攻力不足嘅問題。上季車路士喺 38 場英超賽事之中只係取得 58 個入球，係聯賽榜頭 7 隊裏面最少，而且陣中冇一位球員入球達雙位數，最多入波嘅已經係入咗 7 球嘅佐真奴 (Jorginho)，然後係艾巴咸 (Tammy Abraham)、蒙特 (Mason Mount)、雲拿 (Timo Werner) 以 6 個入球並列第 2。睇翻盧卡古嘅數據，佢喺 2011 年首次加盟車路士時雖然不受重用，但不論係外借至西布朗 (2012-13 球季) 同愛華頓 (2013-14 球季) 期間、抑或係之後轉投愛華頓 (2014-17 球季) 同曼聯 (2017-19 球季) 時，每季都能夠取得超過 10 個入球；而到上兩季效力國際米蘭時，盧卡古兩季都攻入超過廿球，上季更係收穫 24 入球 10 助攻嘅「雙雙」成績。上述數據都證明盧卡古絕對有喺英超立足嘅能力，而且經過咗兩年意甲磨鍊嘅佢比以前實力更強。
除此之外，盧卡古嘅力量亦正正係車路士缺乏嘅元素。車路士嘅進攻球員例如夏維斯 (Kai Havertz) 、薛耶治 (Hakim Ziyech) 、雲拿、蒙特都係屬於技術流或者速度流，身體對抗並非強項；而對抗性較強嘅基奧特 (Olivier Giroud) 同艾巴咸一個去咗 AC 米蘭，而後者亦盛傳即將加盟羅馬。喺英超高強度、多對抗嘅比賽中，盧卡古嘅力量除咗有助佢對抗對方後衛，為自己製造機會入球之餘，亦同時可以牽引對手防線，從而為其他隊友創造更多空間作組織、入楔等等。相信盧卡古對擔任支點呢個角色並唔陌生，因為佢無論喺國際米蘭抑或係比利時國家隊都需要扮演呢個角色。

戰術上，要適應三後衛陣用對盧卡古完全唔係問題。有時可能會見到球員從四後衛轉三後衛，或者雙前鋒變單前鋒時都需要時間適應，但由於國際米蘭、比利時國家隊同車路士都係以三後衛作主要戰術，所以上述問題應該唔會出現。雖然國際米蘭多數用 3-5-2 而後兩者則較多選擇 3-4-3 或 3-4-2-1 ，但背後理念其實如出一轍，進攻上亦唔會有太大分別。
剩低嘅問題就係到底佢哋要用幾多時間去培養默契。但喺杜曹 (Thomas Tuchel) 嘅帶領下，相信呢件事唔洗花太多時間，畢竟佢上季季中走馬上任時只係用咗好少時間就調整到隊波，仲成功捧走歐聯。盧卡古嘅加盟令車路士喺進攻方面更立體、有更多板斧，而且佢嘅掩護同配合相信可以同其他球員產生化學作用，令球隊攻力再提升一個層次。到底車路士來季嘅表現如何，能否挑戰英超冠軍寶座，相信大家都拭目以待。