沒有哈利簡尼的熱刺

黑仔講波 於 03/08/2021 發表 收藏文章
今個轉會市場英超球會不乏大手交易,例如曼聯從多蒙特、皇馬買入辛祖 (Jadon Sancho)、華拉尼 (Raphael Varane),阿仙奴從白禮頓收購英格蘭新晉國腳賓偉特 (Ben White),而曼城亦正同阿士東維拉傾緊基利殊 (Jack Grealish) 嘅轉會。但相信最矚目、最多人留意嘅,係哈利簡尼 (Harry Kane) 最終會唔會離開熱刺轉投曼城。


空穴來風,未必無因,哈利簡尼轉會嘅傳聞喺上季季尾已經開始蘊釀。就喺 2020-21 球季熱刺最後一場主場比賽,完場哨子聲響之後,哈利簡尼獨自繞場一周向所有球迷拍手致謝,呢個行為多數係喺球員為所屬球會完成最後一場比賽後先會出現。加上完季後哈利簡尼曾經接受加利尼維利 (Gary Neville) 訪問,當中佢曾經講過希望參與最頂級嘅比賽,例如歐聯。同時亦提到迪布尼 (Kevin De Bruyne) 係佢最想成為隊友嘅球員 (詳情見 https://www.youtube.com/watch?v=q23uQWvmmZo)。呢一切似乎都將哈利簡尼同曼城拉得越嚟越近。

隨住英格蘭喺歐國盃屈居亞軍,現年 28 歲嘅哈利簡尼再一次與冠軍擦身而過,作為一個正值黃金年齡嘅前鋒,冠軍將會係吸引佢離開熱刺嘅最大原因。哈利簡尼過去喺熱刺都維持住穩定嘅表現,近五季平均每季都入超過 20 球;而上季佢喺摩連奴麾下變得更加全能,除咗入球之外更擔起球隊組織進攻嘅責任,最終以 23 入球 14 助攻同時成為英超神射手同助攻王,直接及間接參與咗熱刺超過一半嘅入球,足見佢喺球隊嘅重要性。可惜,即使佢維持住高水平嘅表現、獲得唔同嘅個人獎項,始終仍然同冠軍無緣。近年熱刺最接近冠軍嘅係上季聯賽盃決賽同 2018-19 球季嘅歐聯決賽,但都分別不敵曼城同利物浦屈居亞軍。對於未捧起過冠軍獎盃,好想一嚐冠軍滋味嘅哈利簡尼嚟講,過去四季三奪英超嘅曼城有絕對嘅吸引力。

若然最終呢單轉會成事,失去哈利簡尼嘅熱刺就會好頭痕,畢竟上季英超佢喺熱刺嘅入球參與率高達 54%,稱得上係一個人 carry 咗半隊波。上季熱刺主要以 4-2-3-1 或 3-4-3 陣容出戰,哈利簡尼喺擔任正前鋒嘅同時會不時回後幫手組織、梳理進攻,除咗因為可以令對手難於防守之外,更重要係因為熱刺喺艾歷臣 (Christian Eriksen) 離隊之後中場一直缺乏創造力,需要借助哈利簡尼嘅傳球、視野同跑動令球隊更容易撕破對手防線。哈利簡尼離開之後熱刺搵邊個前鋒嚟填補空缺將會係一大難題,筆者就喺下面試舉出幾個熱刺可能會考慮嘅人選。

1.加比爾捷西斯 (Gabriel Jesus)
當年加比爾捷西斯加盟曼城時只得 19 歲,但好快已經得到領隊哥迪奧拿 (Pep Guardiola) 嘅信任,並喺英超賽場上證明自己能夠喺度立足,近五季一直都有穩定嘅表現,甚至一度取代阿古路成為曼城鋒線首選,箇中原因就係因為哥迪奧拿著重佢有積極跑動、回後幫波嘅特性。喺各個關於曼城收購哈利簡尼嘅傳聞中,一直有傳將會以轉會費 + 加比爾捷西斯嘅形式進行,雖然佢嘅埋門把握力一直係較弱一環,但相信現年 24 歲嘅佢仍然有進步空間,喺熱刺嘅重建藍圖中佔一席位。

2.舒希克 (Patrik Schick)
相信有睇歐國盃嘅球迷對於呢位捷克球員都會有啲印象,全因佢喺小組賽對陣蘇格蘭時射入咗一球離門接近 50 碼嘅遠射,喺中場線附近笠死蘇格蘭門將;而且佢包辦咗捷克整個歐國盃賽事 6 個入球中嘅 5 個,只係以 1 個助攻之差僅次C朗拿度 (Cristiano Ronaldo) 位列射手榜第 2 位,足見佢嘅入球能力。另一方面,佢不時都會離開中鋒位置回後駁腳、分邊,協助梳理球隊進攻,正正係熱刺所需要嘅前鋒類型,而且身高達 1.9 米嘅佢仲擁有唔錯嘅頭鎚能力。呢位 25 歲嘅左腳球員現時效力緊利華古遜,上季係球會次席射手,不過仍然未能確立必然正選嘅位置,或者呢個將會係令佢轉投熱刺嘅其中一個誘因。

3.魯爾占美利斯 (Raúl Jiménez)
魯爾占美利斯係狼隊第一季升上英超時作出嘅收購,初戰英超嘅佢就已經連續兩季取得雙位數入球,並且分別取得 8 及 6 個助攻,成績十分搶眼,相信紐奴正正就係有呢位球員嘅「說明書」,係一名「即食」人選。不過上季佢因為季初受重傷而缺席餘下嘅賽事,即使佢已經傷癒並喺友誼賽為狼隊上陣,到底佢能唔能夠喺正式比賽中回復當年嘅勇態仍然係未知之數;加上佢已經 30 歲,對於正在重建嘅熱刺嚟講未必係一個合適人選。

後記
就喺筆者出文嘅今日又傳出哈利簡尼缺席熱刺操練嘅消息,到底佢會選擇離開熱刺追逐冠軍,抑或係繼續留隊為母會打拼,相信好快就會有答案。

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→