沒有基利殊的阿士東維拉

黑仔講波 於 06/08/2021 發表 收藏文章

正當早兩日先講完有關哈利簡尼 (Harry Kane) 轉會曼城嘅傳聞 (詳情請見延伸閲讀),另一邊廂曼城已經落實咗另一宗重磅交易,就係以 1 億鎊從阿士東維拉買入進攻中場基利殊 (Jack Grealish) 。


睇翻上季數據,基利殊每 90 分鐘就交出 0.41 次助攻同創造 3.34 個機會,位列英超第二;另一方面,佢係每 90 分鐘內受到最多侵犯嘅球員,同時亦有超過 9 次嘅一對一成功,證明呢位球員無論係傳送、創造機會抑或作個人突破都非常出色。上季佢雖然受傷患困擾,喺英超只係上陣咗 26 場,但仍然能夠交出 6 個入球 12 個助攻嘅精彩演出,實力毋庸置疑;而喺佢缺陣嘅 12 場比賽當中,維拉就足足輸咗一半,足以反映呢位球員對球隊嘅重要性。

失去咗基利殊呢位皇牌球員,維拉攻力必然大打折扣,相信佢哋都深明呢一點,所以佢哋今個轉會窗好積極咁買人。截至呢一刻,維拉已經簽入咗三名進攻球員,包括從諾域治買入貝安迪亞 (Emiliano Buendia) 、利華古遜嘅利安拜利 (Leon Bailey) 同埋修咸頓嘅丹尼京斯 (Danny Ings) 。

三宗轉會當中貝安迪亞嘅收購係最早成事,記得英超轉會窗開咗冇耐維拉就宣布以破球會紀錄嘅 3,800 萬鎊將佢收歸旗下,過程中仲爭贏咗同樣對呢位球員有興趣嘅阿仙奴,顯示球會今季嘅決心之餘更反映出佢哋好似一早就預視咗基利殊會喺今個夏天離開。相比起突破型嘅利安拜利同射手型嘅丹尼京斯,相信維拉簽下貝安迪亞嘅原因就係希望以呢位球員取代基利殊喺隊中進攻核心嘅位置。

同基利殊一樣,貝安迪亞可以勝任進攻中場及左右翼嘅位置,而且同時具備突破及組織攻勢、傳送嘅能力。上季佢喺英冠比賽中絕大部份嘅時間就係擔任右翼,喺 39 場比賽中入咗 15 球並交出 16 次助攻,表現突出,平均每 90 分鐘交出 0.43 次助攻同創造 3.32 次機會,同基利殊相約。踢法方面,雖然佢喺右翼位置出現,但佢唔係偏好爆落底傳中嘅傳統翼鋒類型,而係更多時候出現喺 half space 位置組織攻勢,可以自己突破之餘又可以作出關鍵傳送,又或者同隊友配合,甚至自己射門,而呢種多樣性往往都可以令對方難以防守。另外,貝安迪亞都曾經喺 2019-20 球季時征戰英超而且有唔錯嘅表現,當時仲係效力緊諾域治嘅佢上陣 36 場取得 1 入球 7 助攻,直接及間接參與咗球隊接近三份一嘅入球。雖然球隊最終降班,但相信英超比賽嘅經驗可以令佢喺來季更快適應英超嘅強度、節奏。

隨住曼城落實基利殊嘅轉會,相信維拉會開始踏入重整期,畢竟失去一位皇牌球員後全隊都需要時間適應。慶幸嘅係維拉喺轉會操作上動作都好快,喺基利殊轉會前就已經簽入咗三名進攻球員,令球隊喺開季前有更多時間適應、集訓同培養默契。呢批新球員要用幾多時間先能夠完全融入球隊仍然係未知之數,不過筆者仍然期待呢支球隊能夠延續上季嘅表現,喺新球季繼續為球迷帶來驚喜。

留言


請按此登錄後留言。未成為會員? 立即註冊
    快捷鍵:←
    快捷鍵:→