穩守突擊 (車路士對阿仙奴賽後分析)

黑仔講波 於 21/04/2022 發表 收藏文章
圖片來源:英超官方網站 (https://www.premierleague.com/match/66584)
今個星期英超大戰連場,雙紅會過後再有一場倫敦打吡,由車路士喺主場迎戰阿仙奴。賽前排第 3 嘅車仔基本上已無緣英超冠、亞席位,但與排第 4 嘅熱刺則尚有一段距離,來屆參加歐聯嘅資格可以話係十拿九穩;阿仙奴則仍然為爭四努力,佢哋賽前排第 5,落後熱刺 3 分但踢少一場,絕對有機會反超同市宿敵,奪下歐聯席位。

圖片來源:Sky Sports (https://www.skysports.com/football/chelsea-vs-arsenal/report/446530)

車路士今場以 3-4-1-2 出戰,喺常規正選泰亞高施華先列後備、魯迪加 (Antonio Rüdiger) 因傷缺陣下,改以沙亞、基斯甸臣及右閘列斯占士打三中堅,馬高斯阿朗素、艾斯比列古達為左右翼衛,路夫斯捷克、簡迪雙中場;進攻中場有蒙特,支援雙箭頭添姆雲拿、盧卡古。

車路士正選陣容
GK16文迪 Edouard Mendy
CB 31沙亞 Malang Sarr
CB 4 基斯甸臣 Andreas Christensen (46' 由泰亞高施華 Thiago Silva 入替)
CB 24列斯占士 Reece James
LWB3馬高斯阿朗素 Marcos Alonso (81’ 由薛耶治 Hakim Ziyech 入替)
CM 12路夫斯捷克 Ruben Loftus-Cheek
CM 7 簡迪 N’Golo Kanté
RWB28艾斯比列古達 Cesar Azpilicueta
CAM19蒙特 Mason Mount
FW 11添姆雲拿 Timo Werner
FW 9 盧卡古 Romelu Lukaku (60' 由夏維斯 Kai Havertz 入替)

阿仙奴則以 4-2-3-1 出戰,四人防線為泰華利斯、加比爾、賀定、賓韋特;防中位置上有薩卡、艾蘭尼,史密夫路維、沙卡擔任左右翼,奧迪加特任進攻中場,前鋒位置則有尼基迪亞續任正選。

阿仙奴正選陣容
GK32藍斯度 Aaron Ramsdale
LB 20泰華利斯 Nuno Tavares
CB 6 加比爾 Gabriel
CB 16賀定 Rob Holding
RB 4 賓韋特 Ben White
CDM34薩卡 Granit Xhaka
CDM25艾蘭尼 Mohamed Elneny
LM10 史密夫路維 Emile Smith-Rowe (75' 由梳亞利斯 Cédric Soares 入替)
CAM8奧迪加特 Martin Ødegaard
RM7 沙卡 Bukayo Saka (90' 由拿卡錫迪 Alexandre Lacazette 入替)
FW30尼基迪亞 Edward Nketiah (70' 由馬天尼利 Gabriel Martinelli 入替)

車路士篇
數據來源:英超官方網站 (https://www.premierleague.com/match/66584)

雖然車路士今場有接近 7 成控球率,但真正製造到嘅威脅唔多,11 次射門比阿仙奴更少,當中更只有 2 次中龍,好大程度上係受制於阿仙奴後防嘅密集防守。阿仙奴今場採取守勢,屯兵中路及禁區內防守,車路士未能直接打穿佢哋嘅防線;即使轉由邊路攻擊,但喺缺少突破、快速轉邊拉扯對方防線嘅情況下,始終未能製造太多機會。同時,筆者亦唔太理解點解近幾場杜曹安排列斯占士打右中堅、艾斯比列古達踢右翼衛,畢竟兩位球員都能夠勝任中堅位置,但進攻上前者比後者威脅更大,互換位置會唔會係更好嘅選擇呢。

今場亦顯示出車路士球員防守時專注力不足嘅問題,當魯迪加及老大哥泰亞高施華不在陣中時,後防彷彿群龍無首,而且佢哋喺面對阿仙奴嘅快速反擊時顯得吃力。失第一球前車路士原本正係進攻緊,阿仙奴後場大腳解圍俾前鋒尼基迪亞追,本身已經食咗身位嘅基斯甸臣卻向後傳失,尼基迪亞順勢搶去皮球繼續推進,射入先開紀錄一球;第三個失球亦係後防失誤,當時尼基迪亞喺禁區頂控球,泰亞高施華鏟走,皮球彈向沙亞,佢卻似乎唔知應該要解圍定控球,輾轉下皮球再次落翻喺尼基迪亞腳下,後者再次射入領先。
圖片來源:英超官方網站 (https://www.premierleague.com/match/66584)

唯一值得慶幸嘅係前鋒添姆雲拿繼續保持近期火熱狀態,連埋今場佢近四場一共取得 4 入球 2 助攻,當中更包括歐聯八強次回合作客皇馬嘅比賽。若然佢能夠延續近期勇態,將會對車路士嚟緊爭勝守住聯賽榜第三位大有幫助。

阿仙奴篇
圖片來源:英超官方網站 (https://www.premierleague.com/match/66584)

今場阿仙奴採取穩守突擊戰術,讓出球權予車路士,專心做好防守後再以速度反擊,成效顯著。今場四個入球之中有三球都係由反擊產生,例如第一球係後場解圍後尼基迪亞逼到基斯甸臣犯錯,第二球亦係從後場策動,最後由史密夫路維接應沙卡傳中撞射得手。無論係尼基迪亞、沙卡抑或史密夫路維都係偏向靈巧並具備一定速度嘅球員,而車仔三中堅中基斯甸臣速度慢、左中堅沙亞經驗及防守路數較差加上左翼衛馬高斯阿朗素回防較慢,阿仙奴嘅反擊亦係針對住呢啲弱點嚟打,效果顯而易見。

防守上阿仙奴亦表現得非常積極,球員回防速度快,盡量封睹中路、禁區,防止車路士輕易攻入心臟地帶,每逢車路士球員喺中路拎波,基本上好快就會有幾個阿仙奴球員進行逼搶,令對手難以組織攻勢,同時亦令對手進攻上顯得有啲老鼠拉龜,空有控球但冇咩實際上嘅威脅。

總結
車路士繼上次聯賽輸俾賓福特後再一次喺主場失四球,對於一向以防守穩健見稱嘅佢哋嚟講十分罕見,呢個亦係現時杜曹最逼切需要解決嘅問題;此前經歷三連敗嘅阿仙奴可以喺作客嘅情況下以 4:2 擊敗車路士,實在令人意外,亦令佢哋重燃爭四希望。現時阿仙奴與排第 4 嘅熱刺同分,但因得失球差不及對手而排第 5,相信兩隊爭四嘅緊湊程度將不下於曼城、利物浦嘅爭冠形勢。

大家嘅支持就係對我嘅鼓勵,如果大家想支持下我或者一齊講下波嘅,歡迎 like 我嘅 Facebook Page 同 Instagram!
https://www.facebook.com/blacksontalkball/
https://www.instagram.com/blacksontalkball/

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→