行雲流水 (阿仙奴對李斯特城賽後分析)

黑仔講波 於 15/03/2022 發表 收藏文章
圖片來源:英超官方網站 (https://www.premierleague.com/match/66622)
星期日尾場亦有另一場強隊對碰,由阿仙奴對李斯特城。阿仙奴近期狀態唔錯,聯賽取得四連勝嘅走勢,無論係攻守上都運行得唔錯;反觀作客嘅李斯特城表現反覆,經歷咗一輪聯賽五場不勝後最近兩場先重回勝軌,今場要挑戰有主場之利嘅阿仙奴並非易事。

阿仙奴以 4-2-3-1 出戰,正選名單與之前三場聯賽一模一樣,四人防線有泰亞尼、加比爾、賓韋特、梳亞利斯;薩卡、帕迪出任雙防中,奧迪加特繼續擔任進攻中場,與左右翼馬天尼利、沙卡及前鋒拿卡錫迪擔起球隊嘅進攻重任。

阿仙奴正選陣容
GK32藍斯度 Aaron Ramsdale
LB 3 泰亞尼 Kieran Tierney
CB 6 加比爾 Gabriel
CB 4 賓韋特 Ben White
RB17梳亞利斯 Cédric Soares
CDM34薩卡 Granit Xhaka
CDM5帕迪 Thomas Partey
LM35馬天尼利 Gabriel Martinelli (78’ 由史密夫路維 Emile Smith-Rowe 入替)
CAM8奧迪加特 Martin Ødegaard
RM7 沙卡 Bukayo Saka (85' 由比比 Nicolas Pépé 入替)
FW9 拿卡錫迪 Alexandre Lacazette (88' 由尼基迪亞 Edward Nketiah 入替)

李斯特城同樣排出 4-2-3-1,湯馬仕、蘇恩古、阿瑪迪、列卡度佩雷拉組成防線;中場方面令人意外嘅係泰利文斯 (Youri Tielemans) 出現喺後備席上,由文迪與杜斯貝利賀爾踢雙防中;進攻中場繼續有鐵膽麥迪臣,與左翼班尼斯、右翼艾伯禮頓支援前鋒伊恩拿祖進攻。

李斯特城正選陣容
GK1卡斯柏舒米高 Kasper Schmeichel
LB33湯馬仕 Luke Thomas
CB4蘇恩古 Çağlar Söyüncü
CB18阿瑪迪 Daniel Amartey
RB21列卡度佩雷拉 Ricardo Pereira (61' 由真仕田 James Justin 入替)
CDM22杜斯貝利賀爾 Kiernan Dewsbury-Hall
CDM24文迪 Nampalys Mendy (61' 由尼迪迪 Wilfred Ndidi 入替)
LM7班尼斯 Harvey Barnes
CAM10麥迪臣 James Maddison
RM11艾伯禮頓 Marc Albrighton
FW14伊恩拿祖 Kelechi Iheanacho (74' 由達卡 Patson Daka 入替)

阿仙奴 – 運轉流暢
圖片來源:英超官方網站 (https://www.premierleague.com/match/66622)

雖然阿仙奴今場兩個入球都係由死球產生,但其實今場佢哋無論攻守抑或控制節奏都發揮得好,十分流暢,當中最主要就係雙防中薩卡、帕迪有好表現。兩名中場覆蓋範圍極廣,無論球隊係進攻抑或防守緊都會見到佢哋身影,而且佢哋今場非常積極投入進攻,當中帕迪除咗入球外更有一次喺禁區頂嘅射門中楣,而薩卡亦屢屢走入禁區,有數次射門機會。二人積極壓上亦可聯同奧迪加特 overload 對方雙防中,令對方難以防守,或者呢個係阿迪達因應李城嘅進攻中場麥迪臣回防嘅速度、積極性都唔算高而下達嘅指示。

除咗兩名中場外,泰亞尼、梳亞利斯兩名閘位球員亦喺進攻中扮演重要角色。阿仙奴多數從兩邊進攻,泰亞尼、梳亞利斯會與翼鋒配合作疊瓦式助攻,對對方嘅閘位球員造成一個短暫嘅 overload,拉鬆對方防守,為隊友製造空間,而不論係泰亞尼抑或梳亞利斯壓上嘅時候,另一位都會選擇留喺較後嘅位置,確保後場有足夠人數防止對方打反擊。

李斯特城 – 把握力差
資料來源:英超官方網站 (https://www.premierleague.com/match/66622)

雖然今場李斯特城喺控球、傳球次數等數據都稍為佔優,但佢哋全場只得 6 次射門,大幅落後於阿仙奴嘅 21 次,空有控球但無法製造太多威脅成為佢哋今場嘅寫照。李城組織攻勢嘅重任主要落喺麥迪臣身上,若然泰利文斯上陣嘅話就可以分擔呢個工作,令球隊多一個組織核心,但今場佢並無上陣,正選兩位中場杜斯貝利賀爾、文迪亦未能完全取代其作用,令麥迪臣孤掌難鳴;有時李城亦會長傳俾伊恩拿祖作支點,先喺前場保持控球,再等隊友如 cut in 嘅翼鋒班尼斯、身後嘅進攻中場麥迪臣接應,但與對方中堅對抗時要完全取得優勢亦非易事。

但李城透過反擊仍然能夠製造威脅。當佢哋喺中場成功攔截後,杜斯貝利賀爾、麥迪臣等係有能力以短傳、盤扭擺脫阿仙奴逼搶,並送出長傳直接打阿仙奴後防身後,俾速度快嘅班尼斯接應,可惜後者未能將僅有嘅機會轉化為入球。

總結
阿仙奴最終以 2:0 擊敗對手,延續聯賽連勝嘅走勢,並以一分反壓曼聯升上第 4 位,更比曼聯踢少三場,爭四形勢樂觀,亦為週中對利物浦嘅硬仗打下一枝強心針。李斯特城輸波後喺聯賽僅僅排第 12 位,雖然比其他球隊少踢 2-3 場,但要爭取來季歐洲賽資格仍然有待努力;同時球隊亦要兼顧歐洲協會盃賽事,點樣善用及輪換球員,確保球隊喺兩條戰線都有穩定表現將會係對羅渣士嘅一大考驗。

大家嘅支持就係對我嘅鼓勵,如果大家想支持下我或者一齊講下波嘅,歡迎 like 我嘅 Facebook Page 同 Instagram!
https://www.facebook.com/blacksontalkball/
https://www.instagram.com/blacksontalkball/

如果喜歡我們的文章,請即分享到︰

標籤: 英超  阿仙奴  李斯特城  帕迪  拿卡錫迪  

留言


請按此登錄後留言。未成為會員? 立即註冊
    快捷鍵:←
    快捷鍵:→