旗鼓相當 (車路士對利物浦賽後分析)

黑仔講波 於 15/05/2022 發表 收藏文章
圖片來源:Sky Sports (https://www.skysports.com/football/chelsea-vs-liverpool/463481)
車路士與利物浦會師溫布萊上演足總盃決賽,係雙方今季第四度交手。此前三場比賽兩隊都喺法定時間內打成平手,不過喺聯賽盃決賽利物浦就憑住互射十二碼擊敗對手,成功捧盃,就睇下今場雙方能否喺 90 分鐘內分勝負。

車路士以 3-4-2-1 出戰,三中堅為魯迪加、泰亞高施華、查洛巴,馬高斯阿朗素、列斯占士任左右翼;中場有高華錫趕及傷癒復出,拍住佐真奴坐陣中場線;中鋒由盧卡古擔任,與身後嘅普列錫、蒙特合作進攻。

車路士正選陣容
GK16文迪 Edouard Mendy
CB 2 魯迪加 Antonio Rüdiger
CB 6 泰亞高施華 Thiago Silva
CB14查洛巴 Trevoh Chalobah (106' 由艾斯比列古達 Cesar Azpilicueta 入替)
LWB3馬高斯阿朗素 Marcos Alonso
CM 5 佐真奴 Jorginho
CM 8 高華錫 Mateo Kovačić (66' 由簡迪 N’Golo Kanté 入替)
RWB24列斯占士 Reece James
CAM10普列錫 Christian Pulisic (106' 由路夫斯捷克 Ruben Loftus-Cheek 入替) (119' 由巴克利 Ross Barkley 入替)
CAM19蒙特 Mason Mount
FW 9 盧卡古 Romelu Lukaku (85' 由薛耶治 Hakim Ziyech 入替)

利物浦則以 4-3-3 應戰,四人防線為羅拔臣、雲迪克、干拿迪、亞歷山大阿諾;中場方面由於法賓奴 (Fabinho) 受傷,高普改以隊長佐敦軒達臣居中,與泰亞高、拿比基達組成中場線;前鋒則沿用路爾斯戴亞斯、文尼、沙拿嘅組合。

利物浦正選陣容
GK1 艾利臣 Alisson Becker
LB 26羅拔臣 Andrew Robertson (111' 由斯米卡斯 Konstantinos Tsimikas 入替)
CB4 雲迪克 Virgil van Dijk (91' 由馬迪普 Joël Matip 入替)
CB5 干拿迪 Ibrahima Konaté
RB66亞歷山大阿諾 Trent Alexander-Arnold
CM6 泰亞高 Thiago Alcántara
CM14佐敦軒達臣 Jordan Henderson
CM8 拿比基達 Naby Keïta (74' 由占士米拿 James Milner 入替)
FW23路爾斯戴亞斯 Luis Díaz (98' 由費明奴 Roberto Firmino 入替)
FW10文尼 Sadio Mané
FW11沙拿 Mohamed Salah (33' 由迪奧高祖達 Diogo Jota 入替)

車路士篇
車路士今場初段受制於利物浦嘅前場逼搶、防守,中後場失去聯繫,令慣於後場組織嘅佢哋難以組織攻勢,好多時只能大腳向前,今場面對雲迪克、干拿迪車輪戰嘅盧卡古喺身位、爭頂方面不落下風,但大部份 second ball 都係由利物浦攞到,令紅軍得以繼續進攻。但即使車仔後防不斷受壓,一眾球員依舊穩定,並未因利物浦嘅逼搶而方寸大亂,依然能夠喺後場搓翻順個波;同時佢哋回防意識極好,即使利物浦有反擊機會,車仔都好快回防填補後場空位,係今場保持不失嘅關鍵之一。

同時,車路士針對利物浦兩閘嘅反擊非常有威脅。車仔把握利物浦兩閘壓上助攻嘅特性,針對佢哋身後打反擊,一對翼衛馬高斯阿朗素、列斯占士配合拉邊嘅普列錫、蒙特不斷以速度、盤扭喺邊路發難。然而利物浦一對中堅今場發揮穩定,其他球員亦比以往更快、更積極回防,同時車仔球員喺傳球選擇上亦能夠做得更好,始終未能將機會轉化為入球。

圖片來源:Sky Sports (https://www.skysports.com/football/chelsea-vs-liverpool/463481)

下半場一開始就輪到車路士採取主動,依然係靠一對翼衛配合普列錫、蒙特喺邊路進攻,當中普列錫多次嘅個人突破就令利物浦疲於奔命,同時為隊友創造空位,亦能夠將皮球傳送至對方心臟地帶,可惜都係只差臨門一腳。

利物浦篇
今場利物浦主打兩翼側擊,配合中前場嘅逼搶及中路遮線,成功令球隊率先主導形勢。開賽初段利物浦集中攻擊車路士嘅右後防,經常出現路爾斯戴亞斯與車仔右中堅查洛巴一對一嘅畫面,或者係放直線到查洛巴身後嘅空位俾佢哋鬥跑,路爾斯戴亞斯把握速度、技術上嘅優勢多次殺入禁區製造威脅,可惜利物浦未能把握機會先開紀錄。

同時,利物浦今場有別於平時嘅逼搶,並唔會一見到對方後衛攞波就上前逼,反而係首先集中中路遮線,防止車路士嘅中場發電機佐真奴、高華錫攞波,逼使佢哋要從邊路進攻。當車仔將波運到邊路嘅馬高斯阿朗素、列斯占士時,利物浦一對閘就會馬上對位上前逼,防止佢哋轉身,令佢哋只能回後或帶入中路,若然回後利物浦球員就會順勢繼續逼,而若果帶入中路利物浦就會動用埋中場夾擊,奪回控球權,呢種打法亦令利物浦喺上半場大部份時間都能夠主導形勢。

換邊後紅軍嘅進攻有更多變化,除咗上面提過嘅翼鋒側擊外,兩閘羅拔臣、亞歷山大阿諾下半場喺進攻上有更多參與,佢哋作出嘅傳中非常有威脅;同時中場亦有更多參與拉邊,於邊路製造人數優勢及傳中空間,例如亞歷山大阿諾、占士米拿都各有一球傳中俾到殺入禁區嘅羅拔臣,可惜後者都把握唔到。

總結
兩隊合演咗一場精彩嘅比賽,今場雙方互有攻守,無論進攻、防守都有高水平嘅表現,戰至 120 分鐘亦未言倦,和局亦係合理戰果,最終利物浦憑互射十二碼擊敗車路士,成功捧起足總盃,亦係佢哋今季繼聯賽盃後嘅第二個冠軍。

大家嘅支持就係對我嘅鼓勵,如果大家想支持下我或者一齊講下波嘅,歡迎 like 我嘅 Facebook Page 同 Instagram!
https://www.facebook.com/blacksontalkball/
https://www.instagram.com/blacksontalkball/

如果喜歡我們的文章,請即分享到︰

標籤: 足總盃  車路士  利物浦  

留言


請按此登錄後留言。未成為會員? 立即註冊
    快捷鍵:←
    快捷鍵:→