奧巴美揚風波--解惑篇

車迷Z 於 15/12/2021 發表 收藏文章
又真係冇諗過小小一單紀律處分會發到咁大,家陣連官宣都出埋。為免以訛傳訛,都係寫幾句同大家整理一下時間線吧。

loading

首先,奧巴美揚於英國時間週三離隊前往法國探親,係經過阿迪達首肯,以及球會內部開咗綠燈嘅。原意係即日來回,且會同家母一齊番番英國。年頭一月時,奧巴美揚亦曾經因母親病重而離隊探親。所以原則上,奧巴美揚嘅離隊唔成立射波。

離隊唔係AWOL,但問題出喺歸隊嘅部份。本應週三夜晚由法國飛番英國嘅佢,最終乘坐咗週四早上嘅班機番英國。而按照武肺防疫嘅相關措施,奧巴美揚抵達英國需要先進行武肺PCR檢疫(即係捅鼻),而喺等待結果出爐期間係邊度都唔去得。因此喺週四朝早而非週三夜晚落機嘅後果,就係前者等結果嘅過程可能會耽誤奧巴美揚歸隊操練。有消息指最終其實奧巴美揚啱啱好趕得切冇遲到,但違反承諾呢件事點都走唔甩。


補充多少少球員同檢疫之間嘅關係。武肺期間,球員要穿梭各國進行比賽,靠嘅好多時係各地政府將球隊當成特權人士,大開方便之門地處理。而以球員身份嘅出入,其相關行政手續一定係有哂球會職員幫佢哋安排。奧巴美揚今次以個人名義出行,自然冇任何特別待遇。球員本人喺法國有做過一次檢疫,以為咁樣就足以滿足英國嘅防疫需求,唔知落地後要補番個PCR先有得放人。考慮到香港人對於防疫措施嘅朝令夕改亦感同身受,喺奧巴美揚撈亂咗防疫要求呢件事上,筆者願意俾多少少體諒佢。搞錯咗啫,未至於死罪,球會本身亦可以溝通得再清晰啲。

至於張紋身相,個booking發生於星期四,且喺倫敦發生。話佢飛去西班牙吞泡嗰啲就真係,學偉大嘅國家發言人話齋,「憑空捏造」同「子虛烏有」。


成件事最令人玩味嘅,係阿迪達嘅處理手法異常地公開。球員違規被雪大家聽唔少,但好少可真係擺上檯面。話個球員熱身時覺得唔舒服,或者跑跑下有啲疼痛因此唔冒險出佢,要用呢類說詞帶過暗瓦底嘅原因其實好閒。就算係沸沸揚揚嘅Kepa事件(唉屌),沙利公開嘅說法都係對球員係咪需要因傷換走嘅溝通出咗問題,留個下台階俾大家。當然閂埋門係咪省到對方甩褲係另一件事。從記者會到球會官宣,阿迪達高調處理呢件事,都一定唔係出自別無他法,而係刻意選擇咁做。印象中哪怕係薩卡被褫奪隊長臂章,都冇搞到官宣咁大件事,只係喺記者會上作出交代。既是有意為之,就係有心想喺更衣室塑造自己某個特定形象,或者係對球員進行震懾。具體原因我哋亦只能猜測。

至於最終成效?老實講,足球係一項好in hindsight嘅運動,一切評價都係倒果為因地倒推。阿仙奴成績好嘅,呢啲就叫「紀律嚴明」;阿仙奴成績差嘅,呢啲就叫「鐵腕治軍」。真正嘅蓋棺定論,等季尾先再算。

資料來源:

https://theathletic.com/3011546/2021/12/13/aubameyang-and-arteta-the-dispute-the-trip-abroad-the-captaincy/

Facebook專頁傳送門:https://www.facebook.com/ChelZfan
FanPiece專欄傳送門:https://football.fanpiece.com/ChelZfan/
MeWe聊天室傳送門:https://mewe.com/join/chelzfan
YouTube Channel傳送門:https://www.youtube.com/channel/UCN5eigZ-schgJbH6NuJ5UsA

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→