[全場終] 愛華頓 1-0 車路士--技不如人的師徒對決

車迷Z 於 13/12/2020 發表 收藏文章
嗯,優勝劣敗,抵輸。

唔算係災難性嘅演出,但係xG輸係事實,28分鐘之後冇射門中龍都係事實,跑動功率同攻門質素都不如對方,輸波合情合理。

整季38場,狀態起伏在所難免,近年作客愛記亦一向難打(三季連敗四季不勝),今場敗仗未至於要大驚小怪。當然,分析敗因同尋找可以進步嘅地方,依然非常重要。

loading

1️⃣ 將士用命的愛華頓

好多時豪門對賽非豪門嘅時候,大家嘅目光比較容易會聚焦喺豪門球隊邊度做得差,而比較少留意到勝方有邊度做得好。所以今日改一改話鋒,先討論愛華頓抵讚嘅地方。

甸尼、高文傷出,進攻核心占士洛迪古斯亦同時缺陣。上星期摸索到少少狀態嘅三後衛今場又要改番四後衛,仲要係靠賀基特同葛菲中堅客串兩閘嘅「四中堅」。先天條件局勢不利嘅情況下,愛華頓依然喺防守同跑動兩方面,交出超水準嘅表現,完美發揮賽前部署之下,取勝絕對係實至名歸。

2️⃣ 打蛇打七寸——針對性防守

先講防守。適逢車仔陣中欠奉傳統winger,普利錫、赫臣奧代爾、薛耶治三人同時缺陣,難以喺邊路大造文章,進攻重心必然係透過中路突破。有見及此,安察洛堤先係安排卡法路雲同理察利臣加強前場對蘇馬同簡迪嘅反搶同騷擾,企圖直接喺危險地帶反搶而形成攻門,反搶不成亦可以拖慢車仔後場轉前場嘅進度。

其後仲有杜確尼同阿倫嘅中場二人組,出色嘅身體質素、跑不死體力、以及鍥而不捨嘅跟防,令車仔嘅中場推進非常唔暢順。最重要嘅係,推進到接近危險地帶之前,愛華頓球員就會果斷地出腳犯規。死球?唔怕,我哋有四個中堅。耶利美拿直接令基奧特全場隱形,另外三個中堅則確保愛華頓喺高波有絕對嘅優勢。

防守基本上俾人食死嘅情況下,車仔全場基本上冇組織過任何一段似樣嘅「攻勢」。傳波路線長期處於被封截嘅狀態,帶波又要衝破層層血肉長城,唯一近磅嘅射門僅餘罰球直接攻門,但也只能是「近磅」為止。就算當文迪冇派膠輸12碼,車仔都唔似係會入到波,俾到盡都只能執番一分。

戰術較量嘅師徒對決,老師安察洛堤完勝,林伯賽後接受BBC訪問時也直接承認有好多值得學習嘅地方。

3️⃣ 跑動跑輸——唔夠FC鬥嘅GTR

如果上場贏到列斯聯主因之一係跑贏對方,咁今場輸俾愛華頓主因就係對方跑贏車仔(咦我係咪講咗廢話)。

傷兵、密集賽程後嘅疲倦、戰術上被剋制,都有可能關事。反正不論原因為何,今場車仔整體運作俾人嘅感覺就係節奏好唔順暢。中場被分割後球員變得各自為政,無法用比對方更積極嘅跑動去打破對方嘅防守網,重回己方應有嘅整體。當然,傷兵引致嘅邊路啞火,亦令到車仔想喺兩翼起跑亦無從跑起,愛華頓亦更容易將所有跑動精力集中喺中路佈防。

先天嘅陣容不整,後天嘅發揮不如對手,總括而言就係對方踢得比自己好。

副標題?呃,純粹係突然好想提起頭D,姑且當係車仔今場好似大馬力嘅GTR咁,直來直往但不利喺已經阻塞嘅賽道上發揮,好似係。

4️⃣ 進攻上的缺陷

「冇翼」嘅字眼係前述提起過幾次。其問題除咗冇人能夠善用球場闊度同邊路空間外,亦都包含咗缺陣嘅幾名翼鋒都係車仔陣中主要嘅創造力來源。直來直往嘅中路推進撞唔散愛華頓防守嘅高牆,後備亦冇人適合提供球隊最需要嘅想像力同靈氣。

觀乎可以動用嘅球員,前場缺乏空位嘅情況下,有機會可以創造空位嘅Plan B並唔係完全沒有。紙上談兵嚟講,面對琴晚嘅困局,有兩個方法值得一試。

首先係艾巴咸入替基奧特。法國中鋒近況大勇不假,但球員能力上係傳統中鋒,墮後拉空接應嘅能力欠奉,琴晚嘅戰局不利佢發揮。而且不同於之前對熱刺嘅賽事,對熱刺時車仔嘅問題係列斯占士有空位傳中,但欠一個基奧特接應。今場則係連傳中嘅機會都冇留俾車仔,高波爭頂面對四個中堅亦陷入劣勢。相反,艾巴咸有墮後半格客串False 9嘅能力,走位亦可以暫時拉邊客串,嘗試為習慣內切嘅雲拿同夏伐斯制造空位。

另一個Plan B則係改打3-4-3。四中堅正面防守能力出眾,但靈活度比起傳統閘位球員多少略有不足,喺肋部嘅防守係最有可能嘅突破點。而冇winger嘅情況下,將兩閘推前做翼衛係加強側擊力唯一嘅辦法。

當然,上述兩個Plan B都係有十足hindsight嘅情況下嘅假想,冇話呢兩個hindsight就一定會work。亦都頂多只係限米煮限飯嘅權益之計,點都冇直接放普利錫或者薛耶治上場嚟得乾脆。

5️⃣ Man of the Match: Michael Keane

全場零犯錯,多次正面封阻解圍。從般尼轉投愛華頓後表現一直有啲不溫不火,今場大概係佢近年嚟嘅代表作。Honourable mention Allan,睇住佢體會到當年對方球員俾艾辛追住跑全場嘅絕望。

請支持Facebook專頁「車迷Z」!

如果喜歡我們的文章,請即分享到︰

標籤: 英超  賽評  愛華頓  車路士  

留言


請按此登錄後留言。未成為會員? 立即註冊
    快捷鍵:←
    快捷鍵:→