『佩雷斯，後悔嗎？』再有皇馬棄將發威 精選

唔知皇馬主席佩雷斯睇完皇馬尋晚輸俾禾夫斯堡嘅比賽之後，有無令佢後悔放走換星政策下嘅犧牲品？以往有洛賓同史尼達分別喺離開皇馬後，為國際米蘭同拜仁取得三冠王，亦有雲達華治，馬達，蘇達度，尼格度.........離開皇馬後嘅成功。希古恩，奧斯爾同迪馬利亞都係(每年一星)政策下嘅犧牲品，今季佢哋終於吐氣揚眉，分別取得唔錯嘅表現。希古恩
今年可以話係大爆發，喺意甲31場嘅比賽入面，攻入30球，平均87分鐘就入一球，效率相當標青，季初更帶領拿玻里登上榜首之位。雖然希古恩因為上星期輸俾烏甸尼斯嘅比賽入面領紅，賽後更追加停賽4場，但係射手榜排第二位嘅AC米蘭前鋒巴卡(Carlos Bacca)只係攻入14球，遠遠落後30球嘅希古恩一半有多，所以今年意甲神射手嘅獎項都係非希古恩莫屬。奧斯爾
兩年前嘅夏天，當時仍然身穿皇馬10球衣嘅奧斯爾因為主席佩雷斯嘅換星政策下投下阿仙奴。上年高開低走嘅表現無疑令到一眾廠迷失望。經過一年嘅適應期後，奧斯爾今年並無重蹈覆轍，而且表現持續出色，不斷為隊友鋪橋搭路，致命嘅直線往往令到前場嘅位進攻手取得入球。奧斯爾今年喺英超已經取得18次助攻，領先並列第二位嘅馬列斯(Riyad-Mahrez)同大衞施華(David Silva)多達七次，球季進入最後嘅階段，除非馬列斯或者大衞施華有非常大嘅爆發，如果唔係，奧斯爾嘅助攻王寶座可謂十拿九穩。阿仙奴仲有7場賽事，如果奧斯爾能夠維持到好嘅表現，相信好大機會打破英超單季助攻紀錄(02/03 亨利 20次)。
迪馬利亞
喺13/14球季，皇馬奪得第10次歐聯冠軍，個人認為迪馬利亞功不可沒，甚至係最佳球員。迪馬利亞喺皇馬完全係敬業樂業，佢永遠唔係最焦點，但喺比賽中滿場飛，助攻助守，就只有佢。唔係話其他皇馬球員唔出力，而係迪馬利亞往往比其他跑多一步。起初佢喺皇馬擔任右翼，後來巴爾嘅加盟令佢要讓出右翼位置。幸得安察洛堤嘅慧眼，將迪馬利亞放置喺中場中，好好利用佢不斷嘅跑動，喺中場進行壓逼同隨時預備反擊，此乃係皇馬當時嘅一大殺着。一季後，皇馬收購占士洛迪古斯同卻奧斯，令到迪馬利亞無論喺中場中，進攻中場同右翼嘅位置完全被取代，心灰意冷嘅佢最後他投曼聯。由於未能適應英倫生活，所以喺上年夏天轉投法甲豪門巴黎聖日耳門。迪馬利亞加盟巴黎聖日耳門之後好似煥然一新，重拾自信，好快同伊巴同卡雲尼等新隊友建立默契，令PSG打入歐聯8強及聯賽四連霸，個人喺助攻榜同隊友伊巴謙莫域並列第一，都好有機會取得個人喺法甲嘅第一個獎項。