唯一從未缺席德甲球隊-漢堡

2000年後的球迷 於 20/03/2016 發表 收藏文章
細個嘅時候,如果去識新朋友嘅時候無話題,又想做ice-breaking嘅話,通常都係問”你有冇睇開波”(大個咗其實都好有用),有嘅話就繼續傾啦,冇嘅話就繼續dead air,繼續傾嘅話就各自講下支持邊隊啦,有啲可能淨係支持一隊,有啲可能每個聯賽都支持一隊。而我就係後者,每當講到德甲嘅時候,其他人多數都係拜仁,多蒙特,史浩克04同利華古遜嘅fans,而我所支持嘅德國球隊就係漢堡,佢哋大部份人嘅反應都係,”下?係咪林源三打個隊?” 。所以我想藉住呢篇文去搵下一啲同樣都係漢堡嘅fans,希望下次會聽到嘅反應係 ”咁啱嘅,我都係喎。”
(其實初時嘅我對德甲無太大興趣,因為好多人都淨係將焦點放喺英超,我都係其中之一。不過,德甲星期六開波嘅時間通常都係7點半,咁啱英超頭場未開波(通常開8點半),又係晚飯時間,所以星期六會用德甲送飯。)言歸正傳,第一次接觸漢堡應該係因為有線做緊德甲直播,05/06球季,漢堡主場對紐倫堡,最後漢堡大勝3比0。奇怪嘅係,令我對漢堡有興趣嘅唔係因為佢大勝對手,唔係佢嘅踢法,而係好覺得佢件波衫好靚。白色嘅上身,紅色嘅波褲,藍色嘅波襪配合埋好match,好smart。可能其他人覺得我嘅理由好膚淺,但係鍾意就係鍾意。
之後我就開始留意漢堡嘅比賽同消息,05-06球季,漢堡比較矚目嘅係有荷蘭新星雲達華治(Rafael van der Vaart)加盟,佢馬上成為進攻中場嘅正選,其他主力方面,中場有細細粒嘅杜查奧斯基同捷克防中查路林,前鋒有老將巴巴斯(Sergej Barbarez),壽司轟炸機高原直泰同當時備受關注嘅德國新人拿奧夫(Benjamin Lauth),後防有(雙門雪櫃)雲布廷隊長,保拉奴斯(Khalid Boulahrouz)同2003年亞洲足球先生馬達維基亞(Mehdi Mahdavikia)。
雲達華治
(左)馬達維基亞 (右)雲布廷

上半季漢堡表現非常凌厲,頭八場6勝2和不敗嘅成績,第九週才被禾夫斯堡擊敗,幸好之後及時回勇,再次取得5勝3和嘅佳績,主場2比0擊敗拜仁乃係代表作,最後5分落後拜仁而冬季亞軍嘅身份進入歇冬期。歇冬過後,漢堡表現雖然有所回落,但仍然不過不失,直至最後一周才被雲達不來梅追過以第三名完成球季,奪得歐聯外圍賽資格。其中作客擊敗拜仁再次成為亮點,成為唯一雙殺拜仁嘅球隊。總括而言,漢堡嘅防守力喺德甲首屈一指,而34場失30球成為當季失球最少嘅球隊,中堅雲布廷同保拉奴斯應記一功。雲達華治同杜查奧斯基嘅冒起亦令球隊中場充滿活力,有唔錯嘅入球能力同派牌能力,令到前線嘅巴巴斯得到輸送同支援,成為隊中嘅神射手。第三嘅成績令我對漢堡下一個球季有所進步,能夠威脅拜仁長年德甲霸主嘅位置。

06年嘅夏天,漢堡接連有主力離開,一對正選中堅保拉奴斯同隊長雲布廷先後加盟車路士及競爭對手拜仁慕尼黑;前線亦有上季主力射手巴巴斯轉投利華古遜。漢堡即時作出反應,從阿爾克馬爾購入荷蘭國腳馬菲遜(Joris Mathijsen)同破當時球會轉會費紀錄嘅甘賓尼(Vincent Kompany)以作彌補,同時左閘亦補充咗阿根廷國家隊隊長蘇連(Juan Pablo Sorin),不時同艾圖巴(Thimothee Atouba)輪換。前鋒有秘魯射手古里路(Paolo Guerrero)同辛諾高(Boubacar Sanogo)加盟,雲達華治亦成為新任隊長。

可惜”天氣不似預期”,新加盟嘅球員未能夠融入球隊,後防嘅重組,聯賽同歐聯雙線作賽,球隊深度不足而致球員經常受傷,令漢堡往往未能派出最佳陣容。直至歇冬前,17場聯賽只獲得1場勝仗,置身於尾二。歐聯分組賽更加係5輪全敗提早出局,成績可算係一落千丈。由於新加盟嘅辛諾高同古里路低迷(聯賽4球及1球),在冬季轉會窗,從莫斯科中央陸軍買入克羅地亞前鋒奧歷(Ivica Olic),亦簽入史浩克04門將路斯(Frank Rost)。路斯當時貴為04嘅隊長,只不過紐亞極速上位,才令佢被貶為後備。32歲嘅佢正正係門將嘅黃金時期,實力係毋庸置疑,佢能夠為漢堡嘅提供經驗,此乃係新組成後防線所缺乏嘅。歇冬後,漢堡首當其衝嘅任務由季前嘅爭標變成護級,可惜2場不勝,跌至榜尾。最後管理層決定狠心將上季帶領球隊奪得佳績嘅教練道爾(Thomas Doll)開除,改為史提芬斯(Huub Stevens)執教。佢立即將陣容由之前4-4-2雙箭頭改為4-4-1-1單箭頭,並由奧歷擔任。奧歷不斷嘅跑動同走位,無疑係解放咗雲達華治,大大提高佢後上嘅入球能力,係球場嘅自由度更大。奧歷喺前場嘅壓逼同不時嘅回防亦令漢堡嘅防守力有所提升,對手唔能夠喺後場組織攻勢。而路斯加盟後立即成為正選,並成為後防定心針,上陣17場只失15球。
新領隊同合適球員嘅加盟,令到漢堡有正面嘅轉變,一洗上半季嘅頹風,最後15場取得9勝3和3負嘅成績,由榜尾一舉跳升至第七名衝線,成功護級並得到圖圖盃嘅參賽資格,力保成為喺德甲唯一從未降班嘅球隊。

07年夏季有灼手火熱嘅緬恩斯前鋒穆罕默德施丹(Mohamed Zidan)加盟(上季15場入13球),以代替另一前鋒辛諾高離隊嘅位置。另外,謝洛美保定(Jerome Boateng)同卡斯特倫(Romeo Castelen)嘅來投能夠加強球隊嘅深度。本季,門將繼續採用路斯,雙閘用艾圖巴及迪美(Guy Demel),中堅以甘賓尼,連赫特(Bastian Reinhardt)同馬菲遜3人作輪換。中場有查路林,迪莊,杜查奧斯基,雲達華治坐鎮前線亦有奧歷,穆罕默德施丹同古里路,陣容喺德甲可算係中上級。漢堡有個好開始,喺圖圖盃成為冠軍,取得歐洲足協盃嘅參賽資格。雖然最後喺16強被同國球隊利華古遜淘汰,但全季穩定嘅表現令漢堡能夠以第四名完成球季,再次奪得歐洲賽資格。總合全季所有賽事,雲達華治同奧歷嘅表現最為突出,入球同助攻都有雙位數字(21球16助攻/18球10助攻),古里路嘅復甦亦應記一功(14球8助攻)。雲達華治出色嘅表現令佢受到其他大球會青睞,包括意甲嘅AC米蘭,祖雲達斯同來自西甲嘅馬德里雙雄。漢堡最後都係留唔住隊長雲達華治,以一千三百萬歐元轉投西甲勁旅皇家馬德里。

如果喜歡我們的文章,請即分享到︰

標籤: 漢堡  德甲  雲達華治  

留言

會員
我要評論
請按此登錄後留言。未成為會員? 立即註冊
  • MaLun
    MaLun 於 20/03/2016 評論 NO. 1

    咁岩既,我都係喎!

  • Lala Cheung
    Lala Cheung 於 21/03/2016 評論 NO. 2

    林源三 係度,點會降班

  • Sonson Kwok
    Sonson Kwok 於 21/03/2016 評論 NO. 3

    拜仁降過?

  • King Yeung
    King Yeung 於 21/03/2016 評論 NO. 4

    有雲達華治坐陣

  • King Mak
    King Mak 於 21/03/2016 評論 NO. 5

    雲達華治離隊,戰績有所改善!

  • King Mak
    King Mak 於 21/03/2016 評論 NO. 6

    2005-2006 漢堡都好勁的

  • Leung Pok Yau
    Leung Pok Yau 於 21/03/2016 評論 NO. 7

    繼續爭取附加賽衛冕

  • Wanhang Chan
    Wanhang Chan 於 21/03/2016 評論 NO. 8

    有奧歷?

  • True B Chang
    True B Chang 於 21/03/2016 評論 NO. 9

    原來高柏尼踢過漢堡

  • Alvin Shiu
    Alvin Shiu 於 21/03/2016 評論 NO. 10

    其實今季算係咁啦, 雙殺慕遜加栢同3:1多仔
    利申 堡迷

  • Jack Wong
    Jack Wong 於 21/03/2016 評論 NO. 11

    我覺得而加個領隊教得唔錯...BTW幾時開FB群組講漢堡?利申:堡迷

  • Jacky Tang
    Jacky Tang 於 21/03/2016 評論 NO. 12

    兩三年前唔係降左次咩?

  • Wu Ka Chun
    Wu Ka Chun 於 21/03/2016 評論 NO. 13

    VDV!

  • Jackie Lam
    Jackie Lam 於 22/03/2016 評論 NO. 14

    賀治比 (y)

  • drwong123
    drwong123 於 06/05/2016 評論 NO. 15

    居然仲有人咁重口味中意漢堡,我仲以為得我一個#sosad#我響02-03開始睇漢堡,當年仲係查拿教

快捷鍵:←
快捷鍵:→