近二十年最好的皇馬？ 精選

話說轉會市場完左之後，皇馬主席佩雷斯喺一個贊助活動嘅記者會上講到：「我哋有一支非常好嘅球隊，好到唔可能再有改進空間（We have a great squad that is impossible to improve）」。唔知道同意呢句說話嘅人有幾多？相信令佩雷斯講得出呢番說話，絕對因為領隊施丹、一班骨幹及新晉球員比到嘅成績和信心。

最近馬卡報就舉行投票，由讀者選出「近二十年最好的皇馬」。結果大部份馬卡報讀者都不約而同認為2016/17年嘅皇馬係近二十年最強（27.98%）！似乎主席嘅講話都得到不少知音！至於第二名嘅係2002/03年（16.17%）、由迪保斯基帶領五條煙嘅皇馬，當年嬴得了西甲冠軍、歐洲超級盃冠軍及洲際盃冠軍；第三名則是2013/14年（9.51%）、安察洛堤帶領嘅皇馬，果年重嬴得左「La Decima」同國王盃！以下簡介呢三支陣容，唔知大家嘅心水又係邊一年嘅皇馬呢？
第一名 2016/17（得票率27.98%）
獎盃：不適用
領隊：施丹
陣式：4-3-3
隊員：門將：拿華斯、卡斯拿、Yanez
　　　後衛：馬些路、比比、拉莫斯、卡華積、干查奧、華拉尼、拿祖、丹尼路
　　　中場：卻奧斯、卡斯美路、摩迪、阿辛斯奧、伊斯高、高華錫、占士
　　　前鋒：C朗拿度、賓斯馬、巴利、莫拉達、馬利安奴、盧卡斯華斯基斯

第二名 2002/03（得票率16.17%）
獎盃：西甲冠軍、歐洲超級盃冠軍、洲際盃冠軍領隊：迪保斯基
陣式：4-3-3
隊員：門將：卡斯拿斯、施薩
　　　後衛：卡路士、希古拿、希亞路、沙加度、魯爾巴禾、美查、柏雲、文拿比斯、魯賓、波查
　　　中場：施丹、干斯卡奧、馬基利尼、費高、蘇拿利、甘比亞素、施拿迪斯、麥馬拿文
　　　前鋒：朗拿度、魯爾、波迪路、古迪、摩連迪斯

第三名 2013/14（得票率9.51%）
獎盃：歐聯冠軍、西班牙國王盃冠軍
領隊：安察洛堤
陣式：4-3-3
隊員：門將：迪亞高盧比斯、卡斯拿斯
　　　後衛：馬些路、比比、拉莫斯、卡華積、干查奧、華拉尼、拿祖、艾比路亞　　　中場：迪馬利亞、沙比阿朗素、摩迪、伊斯高、伊拿拉文迪、卡斯美路、基迪拉
　　　前鋒：C朗拿度、賓斯馬、巴利、莫拉達、謝斯


筆者認為今年嘅皇馬無論人員配置、球隊結構、團隊氣氛等都非常良好。而今年與上年相比，重加入左莫拉達、阿辛斯奧、干查奧、馬利安奴，只係放走左謝斯，令球隊深度增加。然而縱使上年嬴取歐聯，而其實抽籤運氣令晉級比想像中容易，避開一眾強敵；即使決賽都係十二碼嬴出。所以，我認為要評呢支球隊為二十年最強，重言之尚早。
之於我嘅心水之選，相信有留意我文章的讀者一定估到，無錯就係歐聯十冠果隊皇馬。2013/14年嘅皇馬同上年果隊相比，最大分別係之前由迪馬利亞、沙比、摩迪組成中場；上年則由卻奧斯、卡斯美路、摩迪搭擋。我認為13/14年更強嘅原因在於：一、迪馬利亞助攻助守，影響力太強；佢踢法好有靈性，同傳統歐陸球員好唔同，佢會室驚無神喺中路突破，往往創造好多空位同機會，成為打破巴士陣嘅鎖匙。二、全隊戰意極之高昂，當年球員開始大熟大勇，又經歷換血換帥，球隊上下都極希望為球隊帶來夢寐以求嘅歐聯十冠，以報球迷多年期望。三、歐聯經過強敵的洗禮，先有小組賽對祖記一勝一負；十六強橫掃史浩克04；八強擺脫宿命終於戰勝多蒙特；四強五球淨勝如日中天嘅拜仁，震驚歐洲；決賽對馬體會，經歷窒息90分鐘至打破局面再大勝而回，呢份韌性、呢份霸氣，先係最強嘅皇馬氣息！
唔知大家嘅「近二十年最強皇馬」又係邊隊？歡迎留言交流！

ref: Florentino Perez: Real's squad is impossible to improve
http://www.marca.com/en/football/real-madrid/2016/08/31/57c6eb95ca47417e4e8b45de.html

ref: Real Madrid's current squad voted most complete in last 20 years
http://www.marca.com/en/football/real-madrid/2016/09/03/57c9f425468aeb91678b45f2.html