巴塞進攻線三大問題 精選

週六西甲比賽，艾拉維斯主場迎戰巴塞隆拿。巴塞雖然主導比賽，但係始終唔能夠打破主隊嘅防守，只能以1:1打和。筆者認為巴塞進攻線有三大問題，希望可以同各位分享一下。

1. 走位多，卻無法破解人盯人
巴塞左閘佐迪艾巴經常壓前，喺左邊製造人數優勢丶基沙文有時回後攞波，引走對方中堅丶而法迪亦會內切到中間空位。呢三件事都有一個共同目的：希望透過走位拉散對方防線，從而搵對方空位。不過艾拉維斯嘅人盯人做得出色：右翼文迪斯落到右閘位，看守佐迪艾巴，減輕右閘負擔丶中堅亦堅持留喺適當位置，冇被基沙文拉走。巴塞未能喺艾拉維斯佔到甜頭，兩閘上前都起唔到作用，而主隊嘅4-1-4-1，甚至係打少一個後嘅4-4-1排列整齊，失位甚少。面對兩閘壓前，艾拉維斯兩翼都會縮後，變到類似有六個後衛。https://i.imgur.com/bfDV1DZ.gif

2. 左右轉邊太慢，對手易於適應
今季巴塞經常以左路進攻，主守嘅艾拉維斯自然會派較多防守球員喺佢哋右邊，變相巴塞右翼(丹比利丶迪連高)有更多空位。但係巴塞甚少長傳轉邊，反而只會用地波慢慢轉過去，令艾拉維斯防線有時間調整，變相巴塞自斷一翼。呢個情況喺上半場較常出現，中場布斯基斯速率太慢，永遠要拖一至兩秒先轉邊。以巴塞中場嘅能力，佢哋大可以一腳長傳轉邊，但冇咁做到。下半場比賽歷入替後，巴塞中場明顯爽咗。
https://i.imgur.com/icnki3e.gif
3. 中路塞車，換人亂石投林
基沙文同美斯配合得太差，一個球員拉開空位後，另一位球員唔識得乘虛而入。相反，佢哋經常喺相同位置出現，走位變成撞位，好似51分鐘美斯傳完波走位，偏偏同基沙文撞埋一齊。其實下半場中路塞車問題更加明顯，佢哋半場換走中堅朗格列，換入柏迪，想喺前面放多一個球員幫手，輸波下呢個調動冇錯，柏迪亦都交到表現，但係美斯丶基沙文丶柏迪三人企得太埋，好難互相配合，兩翼又唔會拉邊創造空位，令到進攻感覺老鼠拉龜。尤其美斯今場有啲靜，好少可以一扭二，打唔破艾拉維斯嘅血肉長城。半場嘅換人只係見到朗奴高文只係亂石投林，有進攻球員就擺出嚟，而冇諗到點樣可以突破防守。
https://i.imgur.com/q0jUmaY.gif
總結
上面講到嘅幾個問題，其實唔係第一次出現。布斯基斯不復當年勇亦都唔係今季嘅事。我認為巴塞今年嘅接連失分，係歸咎於朗奴高文，點都要用布斯基斯，又死都要用同一套戰術，唔識變通。其實巴塞有唔少質素高嘅球員，出名嗰啲唔講，甚至今場後備嘅柏迪都好有驚喜，佢哋只係等緊一個識用佢哋嘅伯樂。