點解C朗臉上有撻紅色?

黃足坑 於 24/11/2020 發表 收藏文章
如果今個星期有睇過意甲比賽嘅朋友,相信唔難發現球員臉上多咗一撻紅色標記。呢撻嘢唔只係喺個別球員/球隊身上見到,基本上所有球員,就連名氣最大嘅C朗同「呂布」伊巴都有。要知道C朗一向重視儀容,冇理由會唔知自己塊臉多咗啲嘢。究竟呢撻紅印代表咩呢?


基本上,大部份喺比賽裝束之外加上嘅元素,都係為咗向社會表達某啲信息。例如英超球隊會喺十一月嘅比賽入面,著上印有Poppy章, 以紀念一戰同二戰;英超賽會又會喺某啲比賽改用彩虹隊長臂章,以支持LGBT運動。而意甲球隊今次想表達嘅,係對暴力侵害女性嘅關注。

呢一個計畫由2017/18球季已經開始有,係由意大利一個人權組織WeWorld Onlus,球員協會以及意甲賽會一同推行,。所以每年會有一個星期,球員臉上多咗一片紅。而用上紅色並唔係因為紅色令人聯想到女性,而係象徵對暴力侵害女性俾紅牌。
loading
loading


大部份球會嘅社交帳戶,今個星期都會上載有關呢個活動嘅照片,希望多啲人可以了解呢個信息,而熱心嘅球員,除咗喺球場之外,亦都會畫撻紅印上面,再放上社交網站。佢哋通常會搵埋女朋友,或者女兒上鏡,有趣嘅係,佢哋會借用女朋友支唇膏畫上塊臉。下圖分別為拿玻里球員恩斯治尼,以及阿特蘭大球員迪朗恩。

相信大家知道咩事之外,更加可以了解下唔同地方嘅社會問題。雖然意大利有關暴力侵害女性嘅新聞較多,而香港就較少出現呢啲情況。其實性別平等係呢次運動背後最重要嘅信息,希望對遠在地球另一邊嘅我哋都起到提醒嘅作用。

如果喜歡我們的文章,請即分享到︰

標籤: 意甲  C朗  

留言


請按此登錄後留言。未成為會員? 立即註冊
    快捷鍵:←
    快捷鍵:→