默西塞德郡打吡賽後分析:雲迪克真係好重要

黃足坑 於 18/10/2020 發表 收藏文章
星期六英超早場,上演默西塞德郡打呲,由愛華頓主場對利物浦。兩方陣容同之前幾場變化唔大 :利物浦今場第一次用堤亞高打正選,將國際賽出得密嘅雲拿當列作後備。整體數據:射門丶控球丶預計入波都係利物浦佔優,但係愛華頓都不乏攻勢,而且幾有威脅。因為利物浦戰術冇乜點變,同上年不停贏波時相若,所以呢篇文會講多少少愛華頓,同埋會講下雲迪克。

利物浦套戰術同以往冇乜大出入,都係著重兩閘壓上助攻。開賽冇耐就即刻收到成效:羅拔臣助攻俾文尼射入。對上幾場波,利物浦嘅對手都會指示兩隻翼跟實羅拔臣同阿諾,減少佢哋攞波機會。相信係今年各隊衝住利物浦而來嘅策略。不過愛華頓右翼係防守唔勤力嘅占士,佢冇跟住羅拔臣回防,令後者有好多空位。

短短幾分鐘之後,羅拔臣再次無人看管,同文尼喺左邊形成二打一,阿倫過到嚟防守嗰陣,文尼已經成功出波。除咗第一場嘅熱刺,愛華頓之前嘅對手唔太強,今場一遇上強敵,占士防守不足嘅缺點就曝露出嚟。

後尾安察洛堤只好叫杜哥利過嚟看守邊路。

場波未到十分鐘,雲迪克就受傷,最後更加要退下火線。而呢件事亦成為比賽嘅轉捩點。12分鐘甸尼傳中,卡達利雲輕鬆跳頂。冇咗雲迪克後,利物浦後防制空力大大減低。

佢哋今場第一個個失波都係輸頭搥,不過係來自角球。同冇咗雲迪克,冇人指揮後防有冇關係?呢個幾值得我哋討論。作為後場指揮,冇咗佢的確會少個人提場,但死球始終係人多打人多嘅遊戲:,唔應該將所有責任賴落一個唔在場嘅球員身上。


愛華頓喺中場防守出色,隊型整齊,可以清楚見到4-5-1嘅防守。三人中場塞死中路,令利物浦之可以由兩邊攻擊,少咗一範進路數。

同時,利物浦用兩翼壓前,令到後防邊路有好多空位。之前維拉等球隊都經過喺呢個位置搵食,今次愛華頓亦照板煮豌。如圖所見,杜哥利走到邊線,羅拔臣上得太前,令到左閘位冇人。最後要高美斯過嚟幫手,但係中堅之間有太多空位俾卡達利雲發揮。

不過利物浦當然唔係捱打,佢哋嘅前場逼搶仍然好有效。愛華頓中場難以用波。占士即使回後攞波攞波,好多時候都要向前長傳,甚至有時一攞波就有紅衫招呼佢,難以Hold波。

占士喺雖然冇乜防守貢獻,不過佢喺進攻方面好有用。牌面上佢係右翼,但係佢經常回後攞波,或者企喺較中間位置。好似呢球咁,佢移入中路,即刻令到愛華頓喺中路有人數優勢,羅拔臣唔敢移離位置跟佢。利物浦兩名中堅要睇住卡達利雲,防守法賓奴又配合逼搶,壓咗上前趕唔切回防,令占士有好大空間起腳。如果雲迪克喺度,以佢能力可以同卡達利雲一打一,馬迪普或者高美斯可能會選擇標出去,畢竟禁區頂任由占士起腳係好危險。

講到人數優勢,利物浦都有用。中場軒達臣亦經常走到右翼,希望喺右邊做到三打二,藉此打開缺口。利物浦嘅第二球就係由軒達臣傳中。愛華頓左閘甸尼同左翼李察利臣各有防守目標,所以冇埋軒達臣。對位嘅安達高美斯跟得唔夠貼,令軒達臣有時間睇定嚟斬。上幾場利物浦呢招喺左邊用得較多,負責拉邊嘅中場係雲拿當。可能軒達臣習慣踢右,所以轉為喺右邊玩Overload。換轉喺左邊,對位占士防守比較懶,呢種攻勢作用會更大。


然後就係愛華頓再次追平一球。同頭先講嘅一樣,利物浦後防邊路有好多空位,而李察利臣都幾跑得。阿諾企得太上,無法阻止佢出波,最後仲要被卡達利雲頂入。呢球我覺得輸阿諾,不過又講多次,如果雲迪克喺場上面,卡達利雲仲會咁易頂贏咩?

總結
各隊開始識得應付利物浦嘅戰術:阿仙奴丶維拉丶愛華頓等都可以針對住利物浦弱點嚟打。利物浦今季應該冇上季咁順利。另外,今場比賽正正證明雲迪克喺利物浦有幾咁重要,如果雲迪克傷得耐,會對利物浦防守造成好大打擊,甚至兩閘會冇咁放膽壓上前,損害進攻效率。愛華頓方面,今場亦發現咗占士嘅不足,下次再對強隊時,愛華頓左路有機會被Overload。

如果喜歡我們的文章,請即分享到︰

標籤: 英超  愛華頓  利物浦  雲迪克  

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→