魯迪加喺車路士被冷落,係自己踢得差,定係林伯特唔識用?

黃足坑 於 12/10/2020 發表 收藏文章
今輪國際賽期,德國暫時完成咗兩場比賽,當中包括一場友賽同一場歐國聯。德國分別排出四後衛同三中堅陣式,而車路士中堅魯迪加,喺兩套戰術下都悉數正選上陣。而喺競賽意欲較強,對住烏克蘭囓比賽入面,魯迪加唔單止踢足全場,而且被評得7.4分,係全隊第四高。佢喺德國國家隊嘅待遇同喺車路士有好大分別,到底點解佢會喺藍軍淪為第五中堅,甚至列入清洗名單?

首先講下魯迪加喺呢場比賽嘅角色。佢出任三中堅較左一位。德國三名中堅分工清晰:較右邊嘅馬菲亞斯真達較常參與進攻,甚至會去到對方三閘線傳中;中間蘇利負責頂波,亦會參與後場組織同放長傳;至於魯迪加負責包波。從傳球數字睇,前兩位中堅都錄得超過100次傳送,相反魯迪加只有76次,可以見到佢作為三人之中企得最後嘅一位,組織丶Build Up嘅責任唔多。

儘管如此,魯迪加今場都有進攻貢獻,助攻俾馬菲亞斯真達,造就全場第一個入球,但係呢球係源於一個角球攻勢,所以戰術同德國一般嘅打法唔同。魯迪加收獲助攻,可以話因為佢剛好喺混亂中攞到個波,有少少幸運成份。而呢個助攻亦係佢評分較高嘅原因之一。
https://i.imgur.com/iJGMnHj.gif

事實上,魯迪加一直令人垢病嘅唔係佢死球助攻等能力,而係防守質素較差。經常標失波,簡單波又會傳失等等,其中令車迷印象深刻嘅,相信係上季尾足總盃對阿仙奴一戰,魯迪加殺出去標唔到波後,後防更見空虛。最後更被奧巴美揚射入致勝一球,間接送走藍軍捧盃機會。
https://i.imgur.com/0Wx4D3P.gif

而德國隊教練路維明顯將魯迪加藏拙於巧:指示佢唔使出嚟標波,亦唔需要佢喺後場組織,反而希望佢憑住出色嘅身體質素處理高空波,同幫隊友包位。可惜魯迪加仍然有幾次犯錯,例如呢次都係出咗去標波,但係未能成功逼甩對方中場馬連路夫斯基,最終被烏克蘭成功起腳。
https://i.imgur.com/B6plLyy.gif

而以下呢一球更加危險,魯迪加同蘇利企位一前一後,令到烏克蘭前鋒耶利文卓克搵到空位,只係後者埋門處理較,令德國不致失波。魯迪加理應企後少少,至少應該同蘇利平排,先可以有效防守。
https://i.imgur.com/wuvOucQ.gif

總結
林伯特同路維給予魯迪加嘅比賽指令有所分別,筆者認為路維嘅打法會令魯迪加表現較好。但球員始終有幾球失準,未能完全做到教練要求。德國隊中堅人選唔多,今場後備莊拿芬泰亞同列斯聯嘅高治,能力都未必喺魯迪加之上,但係車路士就有幾位能夠取代魯迪加嘅球,長大計甚至可以再增兵,所以魯迪加喺藍軍被冷落,都不無道理。

標籤: 德國  魯迪加  車路士  英超  

留言


請按此登錄後留言。未成為會員? 立即註冊
    快捷鍵:←
    快捷鍵:→