高華錫—車路士雞肋?

黃足坑 於 03/11/2020 發表 收藏文章
車路士今季大幅增兵,球隊表演現漸入佳境。但係受到人滿之患,好多有能力踢正選嘅球員都苦無上陣機會。高華錫就係其中之一。今季英超只係上陣過三場,合計上陣131分鐘,而喺歐聯就獲得96分鐘上陣時間,當中對住實力較差嘅卡斯洛達踢咗70分鐘。

首先同大家講下車路士有邊幾個中場球員:佐真奴丶簡迪丶高華鍚丶蒙特同夏費斯,今季都踢過中場位置,另外有小將基摩受傷。蒙特同夏費斯試過踢翼,但係隨住佩列錫同薛耶治復出,佢哋可能會踢返中場(上場對般尼就係佢兩個拍簡迪打正選) 。上面咁多位球員入面,除咗簡迪踢法有明顯唔同,其他幾位都係較為相似。無論領隊林伯特想打4-2-3-1定係4-3-3,都會用簡迪做膽,然後用其中兩位中場打正選。依目前情況嚟睇,唔計基摩,高華錫係咁多位中場入面嘅最後選擇。

近季留意車路士嘅朋友,相信唔會同意佢嘅能力只係值得加埋唔夠300分鐘嘅上陣時間,對上兩季,佢同夏薩特丶佐真奴嘅配合係藍軍少有嘅優勝之處,好多時要靠佢激活中場。數據未必顯示到佢喺車路士嘅貢獻,但車迷都會知道,佢可以喺後場突破重圍,係解除逼搶嘅重要一員。車仔保得住前四,高華鍚都有唔少汗馬功勞。但係車路士仲需唔需要佢嘅長處呢?
縱觀幾位中場,我認為佢哋有各自優點:高華鍚可以解除逼搶丶佐真奴擅於控制節奏,蒙特同夏費斯技術同進攻意識較高丶蒙特同基摩更加有「後生光環」。高華錫唔係比唔上其他人,而係踢法唔同,可能只係唔太啱林伯特戰術需要。車路士對大部份球隊都係用4-2-3-1,由簡迪同佐真奴打雙防中。球季開始咗兩個月左右,林伯特嘅諗法都好明顯:與其用高華錫,不如用上佐真奴呢個中場節拍機,更加適合而家著重控球嘅車路士。另外,車路士今季著重喺兩邊進攻,有四分三嘅攻勢嚟自左右兩邊,變相唔太需要高華鍚喺中後場「帶生個波」。

但係當車路士對住能力明顯較弱嘅球隊,高華錫嘅作用其實好明顯。歐聯作客卡斯洛達嘅比賽,車仔正選中場係佐真奴丶高華錫同夏費斯(攻中)。對住卡斯洛達呢種球隊,車路士最需要嘅唔係簡迪呢類防中,而係連接到後場同中場,擅於向前跑動嘅高華錫。當球隊傳嚟傳去都搵唔到缺口丶節奏變慢時,佢嘅跑動正正可以打破悶局。我甚至認為高華錫係上半場踢得最好嘅一個球員。

但係,隨住基摩開始重投訓練,高華錫喺車路士嘅地位或者會再受動搖。以林伯特偏好年青球員嘅特質,對住較弱對手,或者足總盃之類賽事,藍軍好大機會放基摩出嚟「吸經」。除非不幸地有人受傷,唔係我哋見到高華錫嘅機會應該越嚟越少,而高華錫喺車仔就變得越嚟越雞肋,一方面又用唔著,另一方面放走佢又好可惜。佢而家嘅處境令我諗起外借到維拉嘅巴克利,即使有可用之處,但都要成為豪門人滿為患下嘅犧牲品。作為一個喺小低潮帶起球隊嘅球員,我絕對唔想佢步巴克利等人後塵,離開史丹福橋。

如果喜歡我們的文章,請即分享到︰

標籤: 高華鍚  車路士  林伯特  

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→