薩克達教材式防反 令皇馬束手無策 精選 推薦

皇馬喺歐聯第一場比賽，對手係薩克達，後者本應係實力較差一隊，加上有多位主力球員受肺炎影響，計埋其他傷兵，共有十位薩克達球員掛免戰牌。皇馬雖然有拉莫斯等幾位傷兵，佢哋人腳上仍然有好大優勢。不過賽果未能反映兩隊波嘅人腳差距。

陣式上，皇馬擺出4-3-3，而薩克達就用4-2-3-1迎戰。一如所料，皇馬係主導形勢嘅一方，控球亦都較多。今賽皇馬獲得57% 控球權。由於卡華積同奧迪奧蘇拿同告受傷，施丹用上文迪打右閘，左閘就係馬些路。馬些路向來都係攻強過守嘅閘位球員，今場都唔例外，然而隨住佢年紀開始大，進去助攻，失咗控球後，佢都唔能夠即刻返到閘位，導致失位情況頻生。雖然皇馬名義上係四人後防，但係兩閘不停壓前，我哋甚少見到四人防線平排防守。
當然，閘位助攻有佢嘅好處，皇馬第一個有威脅嘅埋門，就係馬些路同阿辛斯奧配合，拉開對方球員而得嚟。筆者認為現今足球，要兩閘上前好正常，但係佢哋主要責任都係防守，唔回防，其他嘢做得幾好都冇用。https://i.imgur.com/NTIplRA.gif

另一方面，皇馬前場壓迫唔強，冇辦法逼到對手喺後場犯錯。雖然佢哋前場球員會向前壓，但係速度唔快，而薩克達有耐性搓波，甚至會回傳到龍門，再搵比較空嘅隊友。今場可以見到薩克達門將Turbin錄得42次傳球，遠比對面嘅古圖爾斯多。皇馬嘅前場施壓對佢哋作用唔大。
https://i.imgur.com/U4OynFE.gif
再講下薩克達嘅防守，佢哋陣式嚴密，可以清楚見到4-5-1嘅防守佈陣，而中場同後防線之間空位較細，皇馬前線幾個球員：祖域丶阿辛斯奧，洛迪高喺呢個位置被包圍，無法攞波。呢種防守嘅缺點係，佢哋留咗好多空間俾皇馬中後場。好多球員係冇人看管，較難截波同打反擊。可能比賽時間尚早，薩克達目標又未必係全取三分，佢哋都唔太心急，寧願等對手出錯。所以，比賽早段其實好悶，兩邊傳嚟傳去，又搵唔到破局方法。

而薩克達真係成功等到皇馬犯錯。今次要睇嘅唔係皇馬犯錯原因，而係薩克達參與反擊嘅人數，除咗四個後衛之外，其餘六位球員都直接向前跑。皇馬後防人數係被比下去。雖然薩克達呢個攻勢處理得較差，但係已經為皇馬敲響警號。
https://i.imgur.com/84bFP7X.gif

反觀皇馬嘅防線就冇咁整齊，兩個中堅都企得前，呢個畫面更加見到佢哋比兩閘企得更上；此外，皇馬中堅防守一向較為心急，所以為求搶到波，佢哋經常主動標波，拉莫斯缺陣下情況更甚。兩種因素令皇馬後場曝露太多空位。中堅一唔好彩標失波，就好大機會出事。薩克達入嘅第一球亦因此而來。https://i.imgur.com/Msrwe9I.gif
入咗第一球之後，薩克達更加有條件慢慢踢，皇馬可能認為自己嘅所謂逼搶冇效，都開始放棄向前壓。亦因為咁，薩克達可以喺中場搓波，透過轉邊慢慢搵空位。
https://i.imgur.com/6BwTrRh.gif

佢哋第二個入球亦係喺邊路進攻而嚟，薩克達右翼迪迪射門，被救出後，華拉尼解圍變成擺烏龍。要留意皇馬禁區邊係冇人封位，迪迪過咗一個皇馬球員係係可以任意起腳，足證皇馬防守之差。https://i.imgur.com/a69H4eR.gif

至於佢哋入嘅第三球同第一球較為相似，都係因為後場中路曝露太多空位累事。皇馬中堅太易被人拉走，同薩克達中堅嘅表現好大分別。
https://i.imgur.com/snEFwCC.gif
換邊後，施丹第一件事係將賓斯馬換入，改打雙箭頭。賓斯馬嘅特色之一係活動範圍大，經常返到中後場攞波。施丹調佢入嚟用意明顯：希望靠佢嘅跑動拉走一丶兩名後衛，打開薩克達密集防線嘅缺口。但係呢一招都係無功而回，賓斯馬回後，但薩克達球員冇跟住佢走，睇完呢球之後，可以肯定薩克達今場打區域聯防，而且行之有效。
https://i.imgur.com/oavvfdC.gif
皇馬之後靠傳中都係無功而還，而且37次傳中，只有7次成功傳到俾隊友，效率低之外又冇作用。皇馬最後即使連追兩球，都只係靠遠射同對方犯錯，已經唔係薩克達戰術出現問題。反之，薩克達下半場嘅零星反擊，對大軍壓境嘅皇馬更具威脅，只係因人腳質素所限，佢哋再冇辦法將呢啲機會轉為入波。可以話皇馬全場對薩克邂踲防反束手無策。