蒙特與迪肯賴斯:英倫版古沙和萊斯

黃足坑 於 20/08/2020 發表 收藏文章
相信大家都知到古沙同萊斯有一段友達以上嘅關係:雖然年紀唔同,但總算相近;大家都出自多蒙特青訓,球場上位置亦十分相似;就連興趣同鐘意嘅音樂都一樣。但自從古沙轉投拜仁後,唔係話佢哋關係變差。只係各為其主,好少見到二人同場上陣。就算古沙其後重返蜜蜂軍團,亦受傷病困擾,球迷較少見到兩人一齊上陣。
古沙同萊斯友誼十分深厚

如果要搵一段相似嘅關係,我就諗起車路士嘅蒙特同韋斯咸嘅迪肯賴斯。兩人都出身自車仔青訓,由八歲到十四歲,佢哋每個禮拜都見幾日,甚至會跟車仔出國南征北伐。其實佢哋青年軍都幾威水,去到荷蘭面對一支比自己強嘅對手,最後都贏2比0,呢段更加係二人印象最深嘅青年軍經歷。雖然賴斯中途被踢出隊,蒙特就留到最後。但佢哋嘅感情冇因為踢唔同球隊而變淺,仍然會經常約出嚟玩。假日會去彼此屋企作客,因此佢哋家人之間都好好關係。
蒙特同賴斯青年軍時嘅合照

踢波除咗係兩人嘅職業,亦都係佢哋嘅共同興趣。喺英國疫情最流行嗰陣,正當某啲球員被發現違反禁令開派對時,佢哋兩個竟然係因為出去踢波而違反禁令。犯規就係犯規,佢哋當然有認錯,但同時亦有唔少球迷認為佢哋只係太鐘意踢波。蒙特同賴斯而家都係廿一歲嘅小伙子,即使比賽表現成熟,球場外仍然保持住一份稚氣。有時仲會互相整古。比賽以外,佢哋仍然係一對兩小無猜嘅好手足。


現時賴斯仍然係韋斯咸球員,但係由於車仔防守出現問題,簡迪又經常受傷,林伯特好希望可以簽下可以勝任防中同中堅嘅賴斯。球迷自然想蒙特做說客,氹掂賴斯加盟。最近亦見到賴斯同幾位藍軍名宿,例如杜奧巴同泰利合照。唔知係咪真係有望轉會呢?
作為車迷真係好想見佢再次披上藍軍波衫,同蒙特同場!

如果喜歡我們的文章,請即分享到︰

標籤: 曼治  懷斯  葛斯  萊斯  韋斯咸  車路士  

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→