當年嘅1:7罪人,今天成為球隊中流砥柱

黃足坑 於 14/10/2020 發表 收藏文章
2014年世盃,巴西喺主場被德國血洗1比7一幕,相信球迷仍然記憶猶新。巴西大敗嘅主因之一,係佢哋失去咗堤亞高斯華,取而化之嘅丹迪,同大衛雷斯鎮守嘅後防,明顯技不如人。丹迪同堤亞高斯華嘅實力分野,令前者被認定係輸波罪人。當年效力拜仁嘅中堅,喺四年前加盟法甲尼斯。三十六歲嘅佢,今年嘅表現可圈可點。

首先要講下丹迪喺尼斯四人後防之中嘅角色。佢通常會列作左中堅,亦都係四人後防中企得最後嘅一位。企最後係因為丹迪要負責用波,喺尼斯入面,丹迪係一個Ball Playing Centre-Back,較常負責傳波,後場互傳同長傳都關佢事,有關傳波嘅數據會喺下面再講。企較後可以方面其他後防球員向佢傳波,增加佢哋嘅傳波角度,從而減少被對方偷波嘅機會。

尼斯喺法國傳奇韋拉執教後,越嚟越著重傳波,即使對住巴黎等強隊,都唔會胡亂將波踢前。今年法甲踢咗六場比賽,尼斯嘅傳球次數同成功率都只係喺巴黎聖日耳門之下。要有呢項數據,當然需要中後場組織能力不俗嘅球員,而丹迪正正做到韋拉嘅要求。丹迪今年場均傳球77次,除咗係全隊之最外,亦比上年增加一成,足以證明佢喺尼斯嘅後場組織擔當非常重要嘅角色。單計傳球次數,佢甚至比雲迪克,艾拿巴等中堅出色。

而丹迪喺壓力下都可以交出傳送,例如對巴黎聖日耳門嘅比賽,丹迪面對三名對方球員施壓,仍然可以將個波交俾隊友,展現佢喺後場嘅冷靜同穩定。數據上,丹迪場均有8.17次喺壓力下傳波,亦比上年多超過一成,而佢超過90%嘅傳球成功率都證明佢嘅穩定。丹迪喺呢一方面嘅能力,可以為球隊解除逼搶,同時可以令隊友增加空間。題外話,其實曼城領隊哥迪奧拿都希望佢嘅中堅做到呢樣嘢,由佢重視中堅嘅用波能力可見一斑。
https://i.imgur.com/9x4hStX.gif

韋拉經常要求球員引球推進,再交出簡單傳送。而丹迪正正可以做到呢一點。喺帶球推進呢項數據入面,丹迪喺眾多法甲球員之中排第四。雖然頭三名之中有兩位都係尼斯球員,後防帶波上前可以話係韋拉嘅戰術之一,但都要丹迪有咁嘅本事,佢先可以做到韋拉嘅要求。
https://i.imgur.com/OjTjqZo.gif

最後要提嘅係丹迪喺死球嘅參與。同大部份中堅一樣,有死球時,丹迪都係會入禁區頂波,所以入波係最能夠分析丹迪喺死球嘅作用嘅指標。六場法甲,丹迪有四次透過死球獲得攻門,當中入咗兩球,可見佢嘅效率之高。直到呢一刻,丹迪今季嘅入波已經比上季多,死球效率嘅提升係相當明顯。
https://i.imgur.com/brsH3JG.gif


總結
撇除傳波,作為中堅最重要嘅防守數據,丹迪確實唔太出眾,所以佢稱唔上一個一線中堅,而佢喺法甲中游球隊嘅表現,亦唔可以證明佢能夠擔大旗,甚至有能力重返國家隊。不過佢似乎喺尼斯搵到可以容納佢嘅地方,尤其喺36歲高齡下,表現比之前更上一層樓。去到年紀,表現提升講唔上係進步,算係狀態持續高企呱。丹迪成為尼斯陣中,少數踼足每一分鐘聯賽嘅球員,稱得上係尼斯嘅中流砥柱。所以希望大家唔會只恥笑佢喺世盃嗰一場波嘅失敗,而忽略佢整個職業生涯嘅小小表現。

如果喜歡我們的文章,請即分享到︰

標籤: 丹迪  巴西  尼斯  法甲  

留言


請按此登錄後留言。未成為會員? 立即註冊
    快捷鍵:←
    快捷鍵:→