歐洲黑店今季又開倉 陣中仲有咩人?

黃足坑 於 08/09/2020 發表 收藏文章
還記得18/19球季,荷甲阿積士打入四強,當時距離決賽之係差一步之遙,可惜被熱刺絕殺,不過以整個比賽而言,阿積士眾將表現已經令人拍爛手掌:佢哋喺分組賽兩度戰和拜仁,又先後淘汰皇馬同祖雲達斯出局。有出色表現嘅球員當然引人注意。巴塞同祖記季後已經分別簽入迪莊同迪列特,連同多爾貝治等其他人,阿積士喺上年轉會市場淨賺超過一億歐元。一年之後,又有幾位昔日嘅四強功臣離開,包括雲迪碧克丶薜耶治同韋特文;達利亞費高同奧拿拿亦同其他球會有傳聞。今年阿積士又再一次開倉。據報導,阿積士今年轉會已經淨賺六千萬,佢哋最終又賺一億都唔出奇。
若然上述兩位人兄最終都轉會,當年歐聯主力陣容就只剩低白蘭特,泰迪同大衛拿尼斯。換言之,如果佢哋想至少衛冕荷甲,佢哋需要一班有一定能力嘅球員填補空缺。如果有略略留意荷甲,就唔難發現佢哋隊中已經有唔少小將蠢蠢欲動。一於同大家介紹下陣中有邊位明日之星啦!
1.加雲貝治 (Ryan Gravenberch,18歲,中場)
加雲貝治係上季阿積士一隊最年輕嘅球員,但初出第一季已經為阿積士上陣九次,當中五次正選(留意上季荷甲因肺炎腰斬,阿積士只係踢咗25場比賽)。16歲已經被列入荷蘭U18名單入面,最近亦入選U21。身高更加達一米九。擅長盤扭之外,禁區附近射門能力亦唔差,早前一場對薩爾斯堡紅牛嘅熱身賽正正因為咁,入咗一球。而上季亦喺荷甲交出兩個入波。
2.迪斯 (Sergiño Dest,19歲,右閘)
迪斯擁有美國同荷蘭國藉,但上年已經開始為美國大國腳上陣,上季荷甲上陣20場,當中有15場正選,上年歐洲賽亦都只係缺席一場,可見佢雖然年紀輕,但已經係陣中有穩定上陣機會,相信亦因為咁,阿積士更有信心放走可中堅可閘嘅韋特文。上季荷甲交出四個助攻,隊中只係少過泰迪,薜耶治同雲迪碧克,如無意外出年係右閘必然正選。
3.舒爾斯 (Perr Schuurs,20歲,中堅)
阿積士喺幸運薜達買返嚟嘅年輕球員上季係阿積士中堅嘅後備選擇,不過喺荷甲仍然有10次上陣機會。最近亦成為荷蘭大國腳一份子。用波能力唔錯,不但長傳同帶球出擊都有水準,令筆者驚喜嘅係佢嘅罰球重炮,係作為中堅少見嘅。加上一米九一嘅身高,先天條件都比唔少中堅優勝。早前白蘭特有心臟問題無法比賽,雖然有病大家都唔想,但隨住呢件事發生,加上韋特文離隊,佢來季上陣機會預計會更多。
4.安東尼(Antony Matheus dos Santos,20歲,右翼)
阿積士最近以1400多萬喺巴甲聖保羅簽返嚟嘅球員,呢個數已經可以話係阿積士嘅大宗收購。2019年巴甲有四入球六助攻,亦係巴西U23隊員。我冇留意巴甲所以對佢認識較少,不過睇佢喺阿積士嘅友賽,可見佢有速度同好扭,係典型巴西翼鋒。即管睇下阿積士有冇買水貨。

除咗佢哋,阿積士當然有泰迪丶大衛拿尼斯等人,可以話老丶中丶青三代人都齊備。而上面夫到嘅球員只係20歲,距離賣得出可能仲有兩三年時間,不過以佢哋出場時間,以及阿積士陣中較成熟嘅球員指導下,相信往後唔難喺更大嘅足球舞台上見到佢哋。而家就記住佢哋個名先,第日就可以話「我由細睇到佢大」!

如果喜歡我們的文章,請即分享到︰

標籤: 阿積士  荷甲  荷蘭  

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→