［唔好再笑喇！］巴夫韋迪澄清10號波衫一事

幾日前，西班牙報章20 Minutos報導，巴塞嘅丹麥國腳巴夫韋迪襯美斯離隊，向巴塞高層要求下季著上10號波衫。報導一出就引起大批網民恥笑，認為巴夫韋迪配唔起巴塞10號。搞到巴夫韋迪都要走出嚟澄清。

傳統上，10號波衫都係陣中靈魂人物嘅象徵，喺巴塞呢支有多年歷史嘅強隊都唔例外，好多著過巴塞10號嘅都成為球隊傳奇。大家都知道而家嘅10號仔係美斯啦，佢自08/09球季已經著起10號，到而家已經12年。美斯之前，10號波衫嘅主人係「扭一扭笑一笑」嘅細哨朗拿甸奴，至於再早期嘅10包括李華度丶列基美丶馬勒當拿丶史岱哲哥夫，哥迪奧拿等等，呢班人雖然已經掛靴多年，但係球迷仍然好記得佢哋嘅名字。
相信大家都聽過呢班球員大名，年資老嘅球迷甚至睇過佢哋踢波！

得罪講句，巴夫韋迪嘅來頭同上面班名宿冇得比。佢本來係效力另一支西甲球隊雷加利斯，由於巴塞翼鋒丹比利受重傷，於是巴塞就引用西甲轉會條例，喺轉會窗外緊急簽入巴夫韋特，喺巴塞踢咗11場比賽，後備上陣居多，只係為巴塞入咗1球。不過呢單轉會最大影響嘅一定係雷加利斯，不但失去一名主力，而且最後仲要降班收場。

本來我對巴夫韋迪爭10號嘅傳聞都係一笑置之，而家佢出嚟澄清後，更加係證明呢單嘢信唔過。巴夫韋迪接受丹麥報章訪問時指，散播假消息嘅人對各方持分者都唔尊重，自己不但冇向巴塞會方提出要求，亦覺得美斯一日未走，任何打10號波衫主意嘅人都係唔尊重美斯嘅表現。巴夫韋迪一向俾我嘅印象都係作風謙虛。無論之前踢英冠定係而家踢巴塞，佢場外場內都好事出位言論。只係專心踢波。佢未必係算好波之人，可以效力巴塞都係機緣巧合多過佢技術出色，不過都克盡己任，做好自己。

至於出年十號波衫誰屬，真係一個難題，美斯同巴窒越鬧越烈，來季離隊機會好高。巴塞雖然有古天奴，基沙文同丹比利三位進攻球員，個個都價值不菲，至今喺巴塞嘅表現都係令人失望。相比上面提及嘅一班名宿，珠玉在前，三位感覺都比唔上佢哋。會唔會有新球員加盟著起10號？相信等到轉會窗完結，我哋就一清二楚。