列斯聯賽後分析:白玫瑰用咩戰術踢英超? (防守篇)

黃足坑 於 16/09/2020 發表 收藏文章
老實講,單係「列斯聯重返英超」七字已經令球迷興奮萬分,加上首戰對上屆英超冠軍就咁精彩,令到我好想同大家講下我對白軍戰術嘅睇法。長話短說,由列斯聯防守講起。

高壓逼搶
雖然同樣係升班馬,列斯聯踢法唔會偏向防守,反而同好多強隊一樣,透過逼搶爭取主導,即使對利物浦都唔例外。列斯聯球員跑動極多,滿場飛下,對手難以喺後防組織攻勢。尤其利物浦前場冇高大球員,唔能夠好似上年車路士咁,大腳傳俾基奧特。佢哋依賴中後場組織,令列斯聯逼搶更加有效。呢度睇到列斯聯左閘達拉斯去防守阿諾,而理應對位嘅左翼積夏利遜上咗去逼祖高美斯,可見列斯聯逼搶嘅進取。
同時,列斯聯中場柏保路靴南迪斯會向前防守軒達臣,令利物浦難以將個波傳到中場。

前鋒在防守中角色
一般打單箭頭嘅球隊,前鋒喺防守上工作較少,但呢個講法唔可以套用喺列斯聯身上。前鋒班福特除咗遮線外,亦對中堅步步進逼,減少中堅控球時間。雲迪克攞住波,傳俾高美斯線路受阻,軒達臣,阿諾,甚至基達都被緊貼,唔可以傳俾佢哋。班福特同雲迪克距離近,雲迪克自己帶波風險太大,只可以回傳俾龍門。

防守禁區人數
一旦利物浦喺進攻三份一造到攻勢,列斯聯防守人數仍然充足,眾所周知利物兩閘壓得好前,於是列斯聯兩翼會跟住回防,令兩閘未能帶嚟威脅。列斯聯有九名白衫球員防守,換言之只得班福特喺較前位置,兩翼積夏利遜同哥斯達分別封住阿諾同羅拔臣可以走位嘅位置。

盡可能堅持人盯人
利物浦呢個界外球可以解釋列斯聯對人盯人嘅執著。紅軍三名中場各自被列斯聯三中場人盯人下,阿諾界外球已經好難掉。文尼希望回後,提供多一個選擇,而列斯聯右閘艾寧喺文尼控球後已經趕到,最後更加成功搶波。當然呢球亦要怪責文尼冇檢查身後有冇人。另一方面見到右翼哥斯達會微微回後,填補右閘空位。

防守漏洞
喺高壓加上人盯人下,列斯聯防線一旦被打破就會出現好大缺口。比賽尾段,列斯聯體力減弱加上利物浦開始熟習下,沙拿有兩度擺脫對手。特別兩次過人都唔係用太過花巧嘅技術,只係一轉身就過,咁係由列斯聯兩閘只顧標波所致。

如果喜歡我們的文章,請即分享到︰

標籤: 列斯聯  英超  比爾沙  利物浦  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→