列斯聯賽後分析:白玫瑰用咩戰術踢英超? (進攻篇)

黃足坑 於 16/09/2020 發表 收藏文章
老實講,單係「列斯聯重返英超」七字已經令球迷興奮萬分,加上首戰對上屆英超冠軍就咁精彩,令到我好想同大家講下我對白軍戰術嘅睇法。防守部份,筆者已經喺之前嘅文章提到https://football.fanpiece.com/wongchukhang/c1384938.html,而呢篇文就會講進攻一部份。

後場組織
列斯聯好注重球場組織,連守門員都經常參與傳波。門將梅利斯亞一共有45次成功傳球,相比艾利臣只有19次。可見前者喺組織上嘅職責更多。列斯聯門將,兩名中堅同防中菲臘斯組成後場用波基礎。以鑽石形出現喺後場中間,令呢四位球員都有至少三個波選擇,較難全部封死。即使利物浦兩邊內切壓逼,會令列斯聯兩閘變得無人看管,可以將波傳俾佢哋。

值得留意嘅係,喺後場組織嗰陣,菲臘斯通常面向自己龍門,可見佢並唔打算接波後由自己帶波/向前傳。佢嘅職責係現位,提供傳波選擇,再交俾後場較空嘅隊友。因此,即使菲臘斯後面有鬼,都唔會令佢無法傳波。呢個做法同阿仙奴對利物浦時,阿仙奴中場嘅踢法相似。

有時右閘艾寧亦會同中堅並排,令列斯聯再增添一個傳波選擇,而呢個時候左閘達拉斯企位會較前。所以列斯聯今場左路攻勢佔近一半,而右邊攻勢相對較少,有三成七。

兩側人數優勢
正如頭先數據所指,列斯聯習慣用兩邊發起助攻,並希望利用入數優勢而令自己唔會斷波。列斯聯邊路會有三至四個人,令對手閘同翼負擔唔住,同時拉散中場。有如此人數優勢係因為列斯聯兩位中場覆蓋範圍大,甚至會走到同一邊參與攻勢。

有趣嘅係列斯聯兩翼並唔會經常入到禁區,雖然列斯聯第一球係積夏利遜殺入心臟地帶再射入,但佢其實只有兩次喺禁區觸球。相反,佢會留喺兩側較後位置。下圖係積夏利遜觸球位置分佈。

進攻三份一(Final Third)處理
喺搵到機會後,列斯聯會透過放直線同高波,將個波交到危險地帶。佢哋要求進攻球員有良好嘅走位能力,從而喺對方兩名後衛間空位穿過,或者突破越位攞過頭波。列斯聯嘅第二同第三球就係分別用過頭波同直線打破缺口。

由於列斯聯球員經常企喺越位線附近等直線,所以佢哋越位次數都算多。對利物浦呢場越位五次,係周末有份踢英超嘅球隊中最多。

中場中喺進攻的角色
除咗前鋒外,列斯聯兩位中場亦會有呢種進攻模式,佢哋進攻時會企喺Half Space高位,一方面牽制紅軍嘅基達同雲拿當,另一方面提供多幾個進攻點。列斯聯第三球就係由高治走到空位球射入。

總結
列斯聯今場進攻精彩,唔多唔少因為利物浦都係打高位逼搶,令列斯聯有更多空間進攻。對能力寞弱嘅球隊,被主守時可能會考起佢哋,由其列斯聯兩翼不如沙拿文尼咁好扭,對住防線較窄嘅球隊,例如般尼會有挑戰。其實今場列斯聯做到嘅威脅都唔算大,預計入球只有0.6,只係利物浦防線都有失誤。而防守方面,雖然列斯聯失四球,但四球都同死球有直接或者間接關係,強如利物浦都唔能夠喺生波造成入波。今年列斯聯當然吸引眼球,值得再追佢哋嘅比賽。


如果喜歡我們的文章,請即分享到︰

標籤: 列斯聯  英超  比爾沙  利物浦  

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→