兩個入波以外 祖奧菲歷斯精彩演出

黃足坑 於 30/10/2020 發表 收藏文章
早幾日踢嘅歐聯分組賽,馬體會對薩爾斯堡。呢場戲碼未必係最好,但係勝在好睇,入波又多。至於演出最好嘅一定係祖奧菲歷斯,佢呢場比賽射入兩球,為球隊全取三分。老實講,我覺得佢兩球入波都唔算特別精彩,反而喺入唔到波嘅攻勢,更加睇到祖奧菲歷斯嘅級數。


馬體會主要攻勢係嚟自右邊,數據指,佢哋有43%攻勢喺嗰邊進行。而祖奧菲歷斯企喺前場較左位置。所以馬體會進攻嗰陣,左邊空間會較多,而祖奧菲歷斯成日把握到呢啲空位,隊友可以轉邊俾佢,再由佢起腳,或者再傳俾隊友。

呢場比賽經常睇到祖奧菲歷斯嘅無球走動,佢經常搵到對方後衛之間嘅空位,令到自己無人看管,再由中場長傳俾佢製造埋門。馬體會嘅靴里拉同馬高斯洛蘭迪長傳好準,兩人合共作出11次長傳,只有一次傳失,令前面嘅祖奧菲歷斯同蘇亞雷斯更易「搵食」。祖奧菲歷斯有能力搵到位,喺兩名後衛之間前插,呢個倒掛只係中楣。

另一方面,祖奧菲歷斯提醒我哋,走位唔止係幫自己搵空間,仲可以係為隊友拉走對方球員。佢唔係嗰種太個人主義嘅球員,有機會都會為隊友拉開。呢次攻勢就見到佢向左拉邊,薩爾斯堡嘅中堅被告跟住佢向邊走,變相兩個中堅之間嘅空位拉闊,令隊友安祖哥利亞可以喺空位準備前插。只係左閘洛迪未能將個波向前傳,浪費咗呢次走位。

除咗走位之外,祖奧菲歷斯都有唔少防守貢獻,雖然馬體會雙箭頭唔太需要回防,以遮線為主,但薩爾斯堡踢法直接,好少將個波留喺後場。但係祖奧菲歷斯喺適當情況都會向對方逼搶,好似下面片段咁,祖奧菲歷斯由中間跑到去右邊。去到最後,薩爾斯堡中堅施華非傳波不可,馬體會中場就可以乘機攞返皮球。

總結
略略講過祖奧菲歷斯嘅精華,唔好唔記得呢場佢入咗兩粒,佢嘅精彩表現係有實績支持。祖奧菲歷斯今場作出七次過人,除咗係全場最多之外,成功率亦達100%,每一次都成功扭過對手。另外亦搏得四次犯規。喺馬體會4-4-2嘅陣式下,佢不斷走位正好可以填補蘇亞雷斯,或者哥斯達嘅不足。今年佢嘅成績幾好,上陣唔夠500分鐘,已經收獲三入球一助攻,佢今年嘅表現都不容忽視。

如果喜歡我們的文章,請即分享到︰

標籤: 祖奧菲歷斯  馬體會  歐聯  

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→