世盃2022:石油國家以金錢同勞權堆砌的盛事

黃足坑 於 29/08/2020 發表 收藏文章
世盃2022:石油國家以金錢同勞權堆砌的盛事

雖然決賽週仍未開始,但2022年嘅卡塔爾世界盃已經多次引起爭議:既有人指卡塔爾已貪污方式贏得世盃主辦權,決賽週又要歷史性喺冬季舉行。而球場至今仍未起好之餘,最近更被質疑,卡塔爾政府冇提供足夠嘅工人權益俾起球場同其他設施嘅200萬,從各處漂洋到卡塔爾嘅建築工人。

同以往巴西(2014),俄羅斯(2018)等世盃唔同,卡塔爾喺宣佈爭取主辦世界盃時,幾乎所有球場都係未動工,到2010年尾,卡塔爾成功「中標」後,呢個中東國家先開始興建世盃有關設施,甚至係酒店,交通系統,基建等,呢啲項目其中一個用途都係應付世界盃帶嚟嘅人流,而呢啲建築係用上約200萬海外勞工,佔全國人口超過八成,亦佔全國勞動人口大約九成半。但係所佔人口多,並唔代表佢哋可以有適當嘅權益。事到如今已接近十年,卡塔爾工人仍然受到拖糧丶扣薪,欠薪嘅情況。佢哋仍然喺一個極差嘅環境下工作。直到今年三月,已經有34位工人喺興建世界盃有關設施時死亡。

國際組織人權觀察(Human Rights Watch)訪問咗近100名喺卡塔爾打工嘅外國工人,當中,有60人遇到同薪金有關嘅不公平對待,又有超過一半人喺超時工作下無法獲得應有嘅加班費。亦有人被無理解約,無法追討約滿酬金等。喺疫情期間,呢個問題更加嚴重:有唔少顧主以疫情開唔到工為由,拒絕向工人出糧,但係一心到卡塔爾打工嘅工人手停口停,就連食物等基本需要都買唔到。其實卡塔爾政府有為呢班工人提供「薪金保護制度」(Wage Protection System)同最低工資,但人權觀察認為,工人受到嘅打壓唔單止係出於人工問題,顧主會收起工人嘅銀行卡,令佢哋必須要服從顧主。所謂薪金保護制度只係一個冇實質作用嘅政策。喺缺乏糧食同受老闆打壓下,呢班工人遇到嘅問題絕對比錢更大。

人權觀察整咗一份長達78頁嘅報告,同世界各地人士講解卡塔爾工人被剝削嘅問題,大家有興趣可以喺呢度睇下:https://www.hrw.org/sites/default/files/media_2020/08/qatar0820_web_2.pdf

卡塔爾從來都唔係足球強國,同亞洲足球列強相比,亦較為失色。因此,我從來唔明白點解佢哋可以成功主辦世盃。不過無論如何,2022世盃其實好快舉行,希望屆時大家睇波之外,都可以知道風光背後有一班人為世盃默默工作之餘,更得不到應有權益。卡塔爾除咗有一個令人紙醉金迷嘅多哈,仲有一大班有血有汗嘅工人。

標籤: 卡塔爾  世界盃  世盃2022  

留言


請按此登錄後留言。未成為會員? 立即註冊
  • HK Chris 於 02/09/2020 評論 NO. 1

    寫得唔錯,不過有個地方要更正:杜拜係阿聯酋入面,唔係卡塔爾

快捷鍵:←
快捷鍵:→