上季歐聯未平,來季歐聯又起!

黃足坑 於 23/08/2020 發表 收藏文章
嚟到八月尾,雖然今季受特別情況影響,歐聯決賽都未踢,但係原來2020/21球季嘅歐聯比賽已經俏俏地進行。我講嘅當然唔係分組賽啦!而係較少人認識同關注嘅初賽,外圍賽同附加賽。而參加呢幾圈嘅不乏我哋認識嘅球隊同球員,如果大家睇完歐聯決賽又意猶未盡,過幾日又可以睇歐聯喇!


比賽架構
要講呢個話題當然要由比賽結構講起。要知道歐洲足協共有55個成員,除咗列支敦士登冇國內聯賽之外,歐洲足協有責任令其餘54個成員都能夠“參加”歐聯。所以佢哋安排排名較低嘅成員由低打起。今季要由初賽起步嘅係北愛爾蘭,科索沃,安道爾同聖馬力諾球隊。四隊球隊會進行淘汰賽,決出一隊進入第一圈外圍賽。其實呢一圈比賽已經完成,喺科索沃代表Drita因疫情無法參賽下,由北愛爾蘭代表Linfield晉級第一圈外圍賽。去到外圍賽,其實都係淘汰賽。並喺每一圈加入更高排名球隊。呢幾圈外圍賽會開始見到熟悉嘅球隊。
經歷三輪比賽後,34支外圍賽球隊總共有8隊可以成功晉級,參加歐聯附加賽。幾年前嘅附加賽仲有四大聯賽球隊參加,所以都開始受關注。而改制後,有六隊波會透過附加賽出線至分組賽。例如薩爾斯堡紅牛同奧林比亞高斯都要踢附加賽。而喺外圍賽同附加賽輸波嘅球隊都可以落去歐霸盃唔同階段出戰。而早兩日已經踢完外圍賽第一圈,而8月26日就有第二圈比賽。

焦點球隊
正如頭先所講,歐聯外去到呢刻已經有唔少香港人熟悉嘅名字,當然要同大家介紹返啦。

1.些路迪
香港人因為時差同情意結,比較上會多留意英國波。相信英超大家都會睇,而蘇超都應該聽過,些路迪就係蘇超班霸喇。其實現今都有幾位英超球員曾經效力過些路迪。最出名嘅當然係利物浦中堅雲迪克同阿仙奴左閘泰亞尼。


2.FK Suduva
呢隊連香港譯名都冇嘅球隊當然明氣唔大,我介紹呢隊波嘅原因係佢哋有前港超前鋒泰迪(Josip Tadic)坐陣。呢位克羅地亞前鋒只喺18/19球季效力過傑志,表現亦唔係好突出,一季後就不獲續約,於是佢就加盟Suduva,成為該隊正選球員。其實Suduva已經連續三年成為立陶宛聯賽冠軍,上年外圍賽第一圈就止步,今年成功殺入第二圈,對手係以色列嘅特拉維夫馬卡比,亦係Suduva上年歐霸外圍賽嘅手下敗將。筆者同泰迪喺香港球場都有幾面之緣,如果覺位港超球迷同我一樣,想知佢近排踢成點,不妨關心下26號呢場比賽。

如果喜歡我們的文章,請即分享到︰

標籤: 歐聯  外圍賽  

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→