2019-20年港超/季前分析/各隊主場詳細分析/02 [[細路仔看足球]]

細路仔看足球 於 14/08/2019 發表 收藏文章
上次我哋就介紹咗四支唔同嘅隊伍,佢哋主場嘅特色以及點樣去過主場啦。今日就會介紹其餘六支嘅球隊嘅主場位置資訊,希望大家睇完之後,會更加踴躍去睇港超聯啦。

老字號球隊@東方龍獅

藍衫軍東方龍獅今季宣佈主場係將軍澳運動場,可能一向睇開波嘅老一輩球迷就可能冇咁方便啦。咁東方揀咗嘅主場,係位於西貢區嘅將軍澳運動場,但係之前東方龍獅嘅球迷好多都係住香港島嘅人。始終可能有啲上咗年紀嘅球迷,行動都唔係咁方便如果仲要過海就更加困難喇。 不過亦都有報道曾經講過東方龍獅係因為主場優勢而今季係唔揀香港大球場。因為佢哋過往都好少租用香港大球場昂貴嘅場地,去進行訓練。而去返啲區隊嘅場,就可以更加便宜嘅費用,就發揮得更加好嘅「主場優勢」

咁就要講一講,佢哋嘅主場係點去啦。首先,如果你係鍾意搭地鐵嘅話,你就可以揀搭地鐵將軍澳線坑口站,去文曲裡公園嗰個出口,出去經過文曲裡公園側邊嗰條行人隧道,就會去到香港單車館嗰邊個公園,亦都係將軍澳運動場所在之地。至於如果你係一啲鍾意搭巴士嘅朋友,咁你都可以選擇一啲經坑口站,或者係單車館嘅巴士路線啦。
蜜蜂兵團@理文

呢啲球隊不嬲都係一支半地區球隊嘅佢哋,一向係主要服務將軍澳區嘅街坊朋友。但係今季,因為將軍澳運動場已經畀第二隊港超聯嘅球隊揀咗。所以,佢哋今季嘅主場將會移師去到深水埗運動場。但係,過往喺深水埗運動場為主場嘅球隊,通常都係唔會得到啲太好嘅下場,所以就god bless you la。

咁跟住落嚟,就要講下佢哋嘅主場係點去㗎喇。首先,如果你係鍾意搭地鐵嘅話,你可以去到荔枝角地鐵站,沿著往深水埗運動場嗰邊嘅指示牌,一路往旺角方向行,你就會去到㗎喇。咁如果你係住搭巴士嘅朋友,你就可以揀一啲途經荔枝角或者長沙灣嘅巴士路線,再落咗車之後就應該唔係太遠,你就會見到深水埗運動場㗎喇。
後起之材@香港飛馬
呢支係近年頂級聯賽嘅常客,香港飛馬。今季嘅主場,就會喺香港大球場。咁相信佢哋係因為旺角場,已經畀兩隊球隊所揀咗。而東方龍獅,又咁啱揀左將軍澳運動場,所以佢哋就揀咗呢個嘅主場啦。

咁至於香港大球場點去,其實我覺得一眾球迷都好清楚,不過係度我都係再講多次啦。如果你係鍾意搭港鐵嘅朋友,我呢就會比較建議係天后站落車。然後,往香港中央圖書館嘅方向行,到去過咗圖書館,之後下一條街就轉入去,然後一直往入面行咁你就會見到香港大球場啦。咁如果你係一啲鍾意搭巴士嘅朋友,咁你就可能要喺出面,搭巴士再轉乘城巴5B號線或者新巴8H號線啦!
界限街藍鳥@傑志

傑志上季因為對賽成績嘅關係,而僅負於冠忠南區排第四嘅球隊。佢地今季嘅主場將會係一如以往嘅做法,係以旺角大球場為主場㗎。 至於旺角大球場點去,詳情就可以參閱返筆者上一篇,講關於冠忠南區主場前往嘅方法啦。
球迷腐皮隊@富力R&F

呢支一向係球迷一直都好唔滿意嘅球隊,今日確認咗佢哋嘅主場。仍然會喺廣州嘅燕子崗球場, 咁其實係對一眾嘅球迷非常之唔方便,亦都係對球隊等等,要舟車勞頓係有一定程度嘅影響。 而前往嘅方法,首先你要返到大陸先。所以,就詳情唔係呢度講,相信可能都要搭返各自球隊提供嘅球迷車。

唔踢得夜波@佳聯元朗

由於受過往一啲政治事件喺元朗黑夜發生,所以新一季元朗大球場都係唔會有啲比較夜嘅賽程,以免減少球迷嘅意欲去觀賞球賽。而元朗大球場前往嘅方法,其實都唔係太難嘅啫。咁我就喺下面講下啦。

如果你係要前往元朗大球場而你鍾意搭地鐵嘅話,咁你就可以搭地鐵去到元朗站。 再轉乘輕鐵路線去到豐年路站落車,咁你再search下元朗大球場,就會喺你左緊㗎啦。咁至於,如果你係搭巴士嘅朋友,你可以選搭九巴過海路線968,或者多區前往元朗市中心嘅巴士路線啦。

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→