淺談傑志主辦亞冠分組賽 精選

上屆港超聯賽盟主傑志將會喺4月代表香港出戰亞洲最高球會級別賽事──亞洲聯賽冠軍盃﹝下稱亞冠盃﹞，並有意申請主辦所屬既J組賽事，作為球迷對於呢個消息當然絕對贊成同期待，所以小編希望喺呢篇文同大家討論一番。

傑志喺亞冠盃分組賽被編入J組，同組對手有北京國安﹝取代山東魯能﹞、泰港FC同外圍賽勝出者

刺激球市 帶動足球熱潮

以往香港雖然有多次主辦足球賽事既經驗，但並唔頻密，而且多數係一次性、表演賽性質。例如早幾年既英超亞洲挑戰杯、2013東亞足球錦標賽外圍賽、再數可能就要去到成30年前92年既五人足球世界盃決賽週。加止疫情肆虐，喺本地賽事都斷斷續續既情況下，基本上球迷對入場睇波既印象或多或少都有啲陌生，直至近期疫情稍為放緩，足總重新安排球迷入場，先可以一解冇波睇既苦悶。睇番最近幾場本地賽事，喺旺角場踢既比賽入場人數都維持超過一千人既數量，證明球迷們對足球熱情依然。
其次，亞冠盃戲碼對香港球迷黎講絕對係大飽眼福。記得近幾年既賀歲盃戲碼都係邀請中日韓等地球隊獻技，球迷們雖然唔滿意，但都睇得津津樂道；再對上一兩年傑志同東方出戰亞冠盃時主場出擊，對住其他國家既勁旅，包括川崎前鋒、柏雷素爾、天津權健等，幾乎場場爆滿，今次傑志分組賽既對手亦都廣為香港球迷熟悉，北京國安﹝頂替欠薪既山東魯能﹞、泰港FC、大阪櫻花或墨爾本勝利﹝需要踢附加賽爭最後一席﹞，相信喺防疫措施同主辦單位妥善安排下，應該可以吸引唔少球迷入場，帶動足球熱潮，達到刺激球市既效果。

2018年傑志主場對日職球隊柏雷素爾，鄭展龍世界波一戰定江山 ﹝圖片來源：體路﹞

2018年傑志主場對中超球隊天津權健，僅負1：0 ﹝圖片來源：Goal.com﹞

客觀條件有利傑志爭取更好成績

如果香港成功申辦分組賽事，即係代表傑志可以全部分組賽比賽以主場姿態作賽，熟悉場地特性、天氣因素，大大增加傑志喺比賽既優勢。主場出擊又可以減少舟車勞頓、可以爭取更多時間練習，又唔洗適應其他地方既場地、天氣、時差，甚至唔洗到埗後隔離，掉翻轉頭外隊黎到香港要適應所有野、又可能要進行隔離，此消彼長。另外從金錢角度，作為主辦單位可以收到亞洲足協既200萬美金經費資助，又可以賺取主場門票收益，絕對係百利而無一害
封關同抗疫既衝突

疫情以黎，大眾對於政府一直唔肯封關，不斷造成輸入個案令疫情反覆都有好既反對聲音，但小編相信今次傑志申辦亞冠盃同封關並唔存在衝突。因為亞冠盃係以泡泡形式進行，外隊入境後基本上唔會有任何機會同社區或者球迷接觸，外隊職球員只會由專人接送來往喺訓練場地、住宿地點同比賽場地之間，而且賽前又要做檢測。傑志球員同佢地比賽後應該都需要隔離一段時間，確保唔會透過比賽感染病毒傳出社區，所以外隊到港理應唔會造成輸入個案。

至於入場人數眾多會唔會形成人群聚集，增加互相傳播既風險，小編都認為唔需要過分擔心。自疫情以黎，從未出現過任何「踢波群組」或者「睇波群組」，到時只要繼續實施現時入場既防疫措施，量體溫、填健康申報、強制要求入場人士戴口罩、場內唔可以食野等個人措施就已經好安全。另外限制入場人數唔超過一半、看台封閉部分座位，令球迷保持社交距離，咁就萬無一失啦。
扯紅旗！﹝圖片來源：體路﹞

其實疫情咁耐，本地波踢下又停下，一時又閉門一時又可以入場，又冇得去旅行睇其他比賽，就連賀歲盃呢啲西波都冇埋，小編早就已經餓波餓到癲左，咁難得聽到亞冠盃踢得成，而且仲有機會喺香港踢，真係興奮到講唔到野，希望傑志、足總同正苦各方盡量配合促成今次既申請，等球迷頂頂癮啦。不過小編最希望都係武肺快啲收皮，我地球迷們可以再次盡情入場飲住啤酒食住薯片睇波，好掛住旺角場紅旗、甚至4萬人逼爆大球場既畫面呀！