【旅程開始!Lord賓露西亞現場睇世盃 (二)】

足字室 於 24/06/2018 發表 收藏文章
文:中堅賓 編:蘭斯貝利

今晚將會有港人熟悉的巴拿馬(總統)同英格蘭會師分組賽,蘭斯貝利因為有要事而睇唔到呢場波 (一陣八點開波再解釋比大家聽),不過我地特派室友 – 中堅賓就已經準備好去睇佢人生中第一場現場的世界盃!
交比佢同大家講下!


中堅賓:
我已經到左莫斯科喇!!!
今次我選擇响北京轉機,因為價錢平啲,但係時間上又唔會差太遠。
飛機上面唔係好覺得有球迷出現,反而大媽就有一大堆,相信如果部機夠位,佢地即場跳廣場大媽舞呢就真係一啲都唔出奇。
甫到埗準備過入境,就開始見到球迷蒲頭喇,因為大家都拎出個Fan ID掛上頸,話俾入境人員知:「我係嚟睇波嘅,快啲放人!」
唔知係咪已經踢左一個星期,入境人員們已經掌握個程序,流程非常順暢咁,唔洗兩個鐘,我地就出到市區喇。佢架地鐵仲有得睇波,仲要係Live添!
由機場開始,已經好感受到世界盃嘅氣氛,硬件擺設都係其次,炒熱氣氛嘅主體係球迷啊,各國嘅球迷都匯聚於此,筆者見得比較多嘅有克羅地亞球迷,佢地個個都四萬咁口去機場準備飛去睇最尾場分組賽;比利時同哥倫比亞球迷就蜂擁入城,因為嚟緊佢地就响莫斯科開戰嘛。
莫斯科同香港一樣,都有大電視比球迷睇波,不過就唔係商場,而係嘉年華咁,氣氛一流。
足球果然係國際語言,大家互不相識都好,但一見你著住波衫,就好自然開到口。
同大家分享幾個同外國球迷的點滴:
筆者首先响Hostel 門口遇到個英格蘭阿叔,傾落發現佢原來係哈特斯菲做左廿幾年,負責球員通道工作,場場英超都可以近距離見到球星,佢仲話,自己睇波個位係全個哈特斯菲球場角度最好 (笑)
跟住有對比利時情侶,就覺得出巴舒亞伊好過盧卡古,覺得盧卡古技術太粗糙咁話。我諗佢尋日睇完場波,應該好後悔同我地講左呢D說話哈哈哈 (笑)
日本球迷就遇到最多,而佢地幾位原來都好留意香港足球,一知我地來自香港,就即刻話Kitchee(傑志)同Eastern(東方)。
原來佢地都有去過香港睇亞冠賽事,又知道香港世界杯外圍賽出盡力逼和中國,所以話香港球隊打亞冠的確係有啲距離,不過就的確提升到知名度,希望兩季後,香港球隊能夠重返亞冠!

每當有人問我嚟自邊度,我都一定會話係 Hong Kong / Гонконг /香港,而再問我捧邊隊,我都會先講香港,之後先會答荷蘭,之後再扮野話鐘意呢隊果隊(視乎對方係咩國籍,同我當時著緊咩波衫)。
係,我帶左好多件波衫朝聖。
無錯,香港要打入世界杯決賽周條路好遙遠,但我依然相信有生之年,會响國際足球大賽見到香港隊嘅身影。所以家陣我扮各隊球迷之餘,我都有拎到香港隊嘅波衫,著住佢影一張相留為紀念。
一陣就係英格蘭對巴拿馬啦,我就緊係支持巴拿馬啦!

想繼續睇中堅賓分享的俄羅斯睇波遊
除了訂閱我們的專欄,
仲可以在Facebook Like我們的專頁 - 足字室
https://www.facebook.com/wearesalarymen/?ref=bookmarks
你們的每一個Like,也是對我們一個莫大的支持及鼓勵!

如果喜歡我們的文章,請即分享到︰

標籤: 世界盃  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→