不專業足球筆記（三十六）︰奇人搭巴塞雞棚搭到比差人拉成奇觀 港腳右閘阿歷斯祖有望外流中超 精選

不專業足球筆記（三十六）︰奇人搭巴塞雞棚搭到比差人拉成奇觀 港腳右閘阿歷斯祖有望外流中超
1. 早兩集先講緊話搞乜嘢暑假巴塞邀請賽既宏美廣告娛樂集團雞棚味非常濃，點知過咗幾日，香港01就報導話個CEO黃浩霆真係比警察拉埋。

2. 當然喇，拉佢個罪名就唔係乜嘢搭雞棚，而係話佢涉嫌「行使虛假文書」同「虛報有人犯罪」。條友之前咪公開咗一封email話啟德向佢哋道歉，話因為技術問題而寄唔到張租場申請表出去既？據報啟德就係搵勻全部email都唔見有呢封email，懷疑宏美方面係偽造文件，所以先報警拉人。

3. 啟德體育園有限公司最新接受傳媒訪問時就重申，佢哋係冇收到過申請。
4. 除咗「行使虛假文書」之外，仲有「虛報有人犯罪」。根據警察記者會提到，黃浩霆報警話有記者勒索佢一千萬，但最後被發現果封所謂既「勒索電郵」都係由黃浩霆自己偽造。

5. 其實最近已經陸陸續續咁爆出過黃浩霆唔係啲乜嘢好人，先有施永青話佢收購AM730放空頭支票，之後又有FB專頁千頌C話佢吹水唔抹嘴高薪請人幫手收購拍賣行，結果人哋返工之前就話遲啲先搞叫人唔駛返工住。

6. 縱觀成件事，其實我唔係好明黃浩霆響呢次鬧劇度得到啲乜。錢？名氣？個雞棚搭到落啟德呢個可以話全城都聚焦既新體育地標上面，真係咁有信心自己個雞棚可以呃到全世界人？那來的自信？定還是佢冇諗過會搞到件事咁大？

7. 佢好似仲要驚自己唔死咁捅多自己幾刀，就算佢偽造Email時冇諗到啟德玩咁大會報警，但你自己做封Email黎勒索自己再報埋警係乜嘢玩法？咁玩落去，佢真係唔驚燒埋自己架咩？
8. 如無意外，呢個巴塞雞棚局應該玩完架喇，就算最後真係有人搞巴塞訪港，都應該唔係幾關宏美事。

9. 睇完花生笑料，不如睇下本地波其他消息。本身係效力緊瑞典球會IK Oddevold但外借緊比東方既右閘阿歷斯祖Jojo，最近有傳聞話有中超球會斟緊佢。

10. 省港盃之後有記者訪問佢，佢就直認不諱，不過現階段佢就想將重心擺喺東方對理文場銀牌決賽度，如果真係走既話，都希望踢埋場波先走。

11. Jojo都直認話自己好想踢中超，佢就冇透露係邊間球會，因為要尊重返佢哋，淨係話而家最麻煩係轉會費，IK Oddevold想收返啲錢喎。

12. 如果再有球員外流係件好事，雖然我希望真係有球員可以踢日職、韓職（去搞生意果個唔計，唔好提佢），但中甲、中超暫時都仲係香港球員最大機會落腳既地方。
13. Jojo如果外流成功，比心機，但記住港隊call你要返黎啊！

14. 只係可憐東方…又多個主力要走…

更多專欄內容︰ https://www.leafopenleafopen.com/unprofessional9up
更多小說內容︰ https://www.penana.com/user/52938/%E8%91%89%E9%96%8B%E8%91%89%E9%96%8B/portfolio


#不專業足球筆記 #專欄 #足球專欄 #足球 #雞棚 #艾歷斯祖 #東方


廣告時間 -

ig: leafopen3
instagram.com/leafopen3
fb: leafopenleafopenfacebook.com/leafopenleafopen
方格子︰ https://vocus.cc/salon/leafopenleafopen

如果有興趣睇下我既其他寫作作品，可以上 leafopenleafopen.com 或者 https://www.penana.com/user/52938/%E8%91%89%E9%96%8B%E8%91%89%E9%96%8B

如果覺得我寫嘢OK想請我飲杯咖啡支持下我既，可以上 https://www.penana.com/membership_plan?id=52938 或者 https://m.penana.com/stream?id=52938