怕金球獎唔夠夏蘭特爭？麥巴比4大原因欲離PSG

現今球壇一個公開嘅秘密就係PSG嘅球星，有「麥總」之稱嘅麥巴比（Kylian Mbappé）好想離開PSG，有報導更指，佢最快下年一月就會離開法甲。


其實PSG一直都就晒麥巴比，幾乎要乜有乜，但似乎亦不能滿足到佢嘅胃口。西班牙《阿斯報》就爆PSG喺幾方面仍未滿足到呢位球霸：

1. 麥巴比喺續約時，要求一名真正嘅9號球員做拍檔，更點名要利雲杜夫斯基（Robert Lewandowski），可惜最後呢位波蘭球星去咗巴塞隆拿。

2. 麥巴比唔鐘意踢正中鋒，但喺PSG嘅三叉戟中，左右兩邊分別係尼馬（Neymar）同美斯（Lionel Messi ），麥巴比往往要踢中鋒位置。其實麥巴比不只一次表示，自己喺國家隊同基奧特（Olivier Giroud）拍檔，佢會踢得更自由。

3. 不滿自己不是絕對嘅12碼第一選擇。其實PSG主帥加堤曾經表示過麥巴比係劊子手第一選擇，然而現實係尼馬往往會走出嚟同佢爭射，呢樣被麥比巴解讀為對自己權威嘅挑戰。不過，啱啱過去嘅歐聯賽事，麥巴比就如願以償，操刀12碼。
4. 繼續留喺PSG，不利佢同假想敵夏蘭特爭金球獎。夏蘭特（Erling Håland）今季加盟英超，表現一支獨秀，成為傳媒熱棒嘅球星，如果麥巴比仍然留喺次一級嘅法甲，麥巴比同夏蘭特嘅競爭就會處於下風。

麥巴比絕對係新一代球星中，實力數一數二嘅，但佢嘅球商同心態似乎追唔到佢球技嘅成長，而PSG對佢嘅「培養」更令佢要風得風，漸漸地，麥巴比更似係一個被寵壞嘅巨嬰，計筆者話，PSG 放咗佢係有啲可惜，但可能係對雙方都好嘅做法。