李城球迷另類抗議 會方急停呢項服務

呢個世界無奇不有嘅事何奇多，李斯特城日前突然禁止球迷喺皇權球場大螢幕顯示生日祝福嘅請求。一般而言呢，李城球迷可以透過俾二十英鎊，喺李斯特城主場作賽嗰陣，喺球場大螢幕播放生日祝賀字句。

不過由於李斯特城今季開季成績差勁，好多球迷對主教練羅渣士非常不滿，或者認為佢啲戰術係令到球隊成績一落千丈嘅原因。所以有唔同球迷分別俾咗嗰二十英鎊，試圖要求球會為「Zak Rodgers」、「Brenda Nout」等人慶祝生日。


有見及此，李斯特城會方已經暫停呢項服務，有球迷就感到非常「不滿」，喺Twitter上表示球迷只係希望為仔仔Zak Rogers同嫲嫲 Brenda Nout慶祝生日，唔明白點解球會咁無情。


李斯特城今季至今喺英超九戰一勝一和七負，暫列英超榜尾，上場更1:2不敵升班馬般尼茅夫，今季隨時要喺護級區掙扎。

不過今季咁嘅成績，又唔可以怪得哂教練羅渣士，季前李斯特城一個引援都無，等到卡斯柏舒米高同科芬蘭兩大後防主力走咗之後，先僅僅補充門將史密夫斯同中堅法亞斯。等於陣容無補強之餘，仲要降咗級，係咁輸波真係唔係完全羅渣士責任。