麥巴比訪問句句有骨？「美斯可以散步，我可以做多啲防守」

PSG球星麥巴比最近接受《隊報》訪問，講咗好多自己同美斯仲有尼馬嘅關係，佢仲有講離隊嘅事，不過唔知係咪筆者小心眼，有啲內容好似有骨咁，例如：

骨頭一：暗示尼馬同美斯級數有差別
首先當然係恭維一番：「我真係無諗過美斯會加盟，之前我認為，佢係為數唔多我永遠都無機會一齊踢波嘅球員之一，但依家竟然可以同佢一齊踢波，呢個絕對係我嘅榮幸，我享受喺佢身邊嘅每一秒。」佢再講：「尼馬都好勁，但美斯真係另一回事。」
骨頭二：暗示美斯球場散步
「有美斯喺度，你知道佢係少參與防守（講到咁好聽咪即係話佢散步？），以保持體力去入波。所以，當必須要回防嘅時候，我願意去做呢個角色。美斯喺場上行嘅時候，我願意去跑動，呢個唔係咩問題，喂大佬，佢係美斯喎，拜託！」

骨頭三：Sorry，呢段無骨，仲好坦白
被問到之前爆粗鬧尼馬唔傳波（詳見：麥巴比被換出爆粗鬧尼馬：「條契弟唔傳波俾我！」），佢坦白承認有呢件事，「係，我認有咁講過，不過其實無咩大不了，大家唔使去記住呢件事。俾你地爆咗出街之後，我有即刻搵尼馬，我哋無嘢，不過我當時的確有啲嬲，其實換咗係我唔傳俾佢，佢都會嬲，但我哋之間無嘢。」