麥巴比被換出爆粗鬧尼馬：「條契弟唔傳波俾我！」

今輪法甲比賽，巴黎聖日耳門（PSG）雖然以2比0擊敗咗蒙彼利埃，但就爆出球員疑似不和事件，事關麥巴比坐喺後備席，被鏡頭影到爆粗鬧尼馬！

話說喺比賽嘅最後階段，麥巴比被換出，德國翼鋒達斯拿（Julian Draxler）上場，後者入替無耐就接應尼馬嘅傳波破門得分。咁隊友入波，麥巴比嬲咩呢？原來喺較早前嘅65分鐘，麥巴喺差唔多位置有個入波機會，但係尼馬無傳個波俾佢。

麥巴比65分鐘嘅黃金機會

達斯拿嘅入球位置

所以麥巴比被換出後就大發牢騷，當住隊友古爾（Idrissa Gueye）面前鬧尼馬。CANAL+電視台就影到佢咁講：「嗰個 clochard 唔傳波俾我！」。
"clochard" 表面意思係流浪漢，但喺法文可以理解成係鬧人嘅詞語，用廣東話講法就類似「契弟」、「仆街」、「粉腸」、「X樣」嘅意思。所以用廣東話可以咁譯：「條契弟唔傳波俾我！」

個咀形都有啲似以上句廣告話翻譯噃！

不過話時話，麥巴比呢排咁燥可能同佢狀態有關，因為佢已經４場比賽無波入啦。
官方精華：https://www.youtube.com/watch?v=Bg9zAP_KHi0