鐵漢柔情!伊巴在記者會上留下「神的眼淚」

球場新聞 於 23/03/2021 發表 收藏文章
現年39歲嘅伊巴謙莫域一向俾人嘅感覺係高高在上,目空一切,勁得嚟串咀,佢甚至仲經常自稱係「神」,不過「神」其實都係人,始終會有感性嘅一面,今日喺記者會被問到兩個仔嘅時候,呢位「戰神」就罕有地留下咗男兒淚。

話說世界盃外圍賽歐洲區賽事將會喺今個禮拜展開,瑞典將會喺香港時間周五(26日)凌晨主場迎戰格魯吉亞,而伊巴就喺退役5年後重返國家隊,而佢代表瑞典出席記者會嘅時候,自然成為全場焦點。當記者問佢屋企人點睇佢復出嘅時候,伊巴就咁講:「你問呢條問題唔係一條好問題,我離家(意指前往國家隊報道或集訓)嘅時候,我個(細)仔 Vincent 喊到豬頭咁,不過依家佢 OK 啦。」

正喺講完呢句之後,伊巴開始有啲忍唔住啲眼淚,當記者想再追問嘅時候,伊巴已經要合埋眼,並且做出暫停嘅手勢,示意記者停一停,俾啲時間佢冷靜下,場面相當感觸。

loading

冷靜之後,伊巴表示可以繼續作答。伊巴之後講:「為國家隊效力,是作為足球員最大嘅事。我自己內心係感覺到我可以幫助佢哋,我可以做啲嘢。我依家講咁多,但如果最後交唔到成績,咁其實一切都冇意思。」

「我問伊沙克可唔可以讓件11號波衫俾我,佢話可以,因為佢6、7年後可以攞返。之後科斯貝治又主動問我要唔要件10號波衫,我話唔需要,舊伊巴年代過去咗,瑞典要進入新嘅一章,科斯貝治係10號嘅理想主人,況且咩球衣號碼其實唔係咁重要啫。」

https://www.youtube.com/watch?v=XKa8klWnMuI
標籤: 伊巴謙莫域  

留言


請按此登錄後留言。未成為會員? 立即註冊
    快捷鍵:←
    快捷鍵:→