《亞洲球王是怎樣煉成的----孫興慜成功之路》 精選

是咁的，最近睇到強國人自high話孫興慜祖籍山東，真係不禁笑咗出聲，「同胞」嘅無知真係笑死我。講返正題，老孫啱啱先攞完英超10月最佳球員同韓國足球先生，呢位亞洲球王絕對係風頭一時無兩。正所謂成功需父幹（老老實實當然唔少得佢自己嘅苦幹），究竟係點樣嘅父幹同苦幹，先成就到今日嘅孫興慜？

孫興慜嘅父親係前職業球員孫雄正，因為阿基里斯腱傷患提早退役，佢轉而培訓兩個仔，即係老孫同佢哥哥孫興潤，希望佢哋成為職業球員。望子成龍嘅孫雄正自然希望阿仔未來嘅職業生涯可以比自己更出色，而經過嚴苛嘅訓練，日復一日嘅練習，最後毫無疑問老孫嘅成就當然比起阿爸嘅期望有過之而無不及。

世界上冇免費嘅午餐，唯有努力不懈，先能夠達致心目中所謂嘅成功。孫興慜自細就接受好嚴格嘅訓練，細個曾經有一次，阿爸要求兩兄弟「的」波「的」4個鐘頭，俾著係我哋，莫講話4個鐘，連4個字，甚至有啲人4分鐘都唔得。「的」咗3個鐘，當時10歲嘅老孫隻眼已經滿佈血絲，望住個波都覺得有重影，仲要喺4個鐘入面個波唔可以落地。而呢個時候阿爸竟然係好嬲，佢哋就唯有繼續練落去，始終喺傳統嘅父權社會入面，阿爸講過嘅嘢就等於一切。除此之外，兩兄弟每日都要練波練六個鐘，年中無休，包括每日過千腳射門練習同過千下嘅跳繩，即使喺佢到咗德國之後，阿爸每日都係同佢喺訓練場做相同嘅練習，風雨不改，而正正就係因為不斷嘅練習以及阿爸對佢嘅鞭策，老孫最終成為一個出色嘅球員，技術方面尤其出眾同純熟，能夠左右開弓，速度同體能經過訓練之後當然唔洗講啦。

孫興慜喺16歲之前一直都係自己訓練，冇踢正式嘅比賽，只係練基本功，原因係因傷退役嘅父親唔想佢行返自己嗰條舊路，希望避免佢喺比賽過程中有不必要嘅受傷。雖然呢個未必係最好嘅訓練方式，缺乏對抗性嘅比賽訓練，日常訓練亦有可能比較悶，但係某程度上都係保護咗佢，等佢可以健健康康，避免受傷，同時可以令佢嘅基本功更加紮實。
孫興慜自己嘅努力同自律都係不可或缺嘅一部分。雖然可以肯定佢唔係每次都咁有動力做重複、沉悶同艱苦嘅訓練，但係喺阿爸嘅教育之下，佢都一一照做，努力完成每日嘅訓練。冇一定嘅意志力同毅力，真係會頂唔順，更何況日日如是。兩父子嘅努力，當然得到好大嘅回報。喺漢堡嘅時候，佢試過同隊友出外慶祝，但係突然間收到阿爸嘅電話，要佢留意返體能方面，驚佢玩得太開心，打亂身體訓練嘅節奏，最後老孫亦都乖乖返咗屋企。試問又有幾多人做到？你喺街玩玩吓俾阿媽急call返歸你都唔制啦。呢啲雖然可以算係「他律」，但係冇佢嘅自律同自制能力都唔會成事。


雖然孫興慜呢條成功之路都仲有唔少爭議，包括訓練方式上嘅爭議以及阿爸會唔會過份干預佢嘅嘅職業生涯，例如控制埋轉會咁，但係無可否認嘅係，佢呢條成功之路，係靠佢不屈不撓嘅努力，一步一步走出嚟嘅，少一分努力都冇辦法成事，透過不斷嘅練習、努力，不斷堅持，先至成就到今日嘅呢個亞洲、甚至歐洲球壇嘅頂級球員。如果你都有你嘅目標或者理想，希望你都會好似佢咁，盡自己嘅努力去達成，無論呢個所謂目標或者夢想關唔關足球事，只要你心中有呢個理想，都希望你可以喺追尋嘅過程中繼續努力。

鍾意我呢篇文就訂閱Fanpiece同follow IG啦!!!!