熱刺對李斯特城賽後評論 精選

繼2000年3月對阿仙奴之後，熱刺再次單場同時輸十二碼以及失烏龍球。有好多人話咁樣輸法真係唔抵，但係撇除運氣嚟睇，我覺得今場係抵輸嘅，至少睇到熱刺有唔少致命嘅弱點。

上半場主要係李城主導，以進攻為主，整體嚟講攻勢較多，初段嘅死球帶嚟唔少威脅，頭45分鐘都可以話係主導咗比賽嘅形勢，而熱刺都係打返擅長嘅防守反擊。防守係守得到，但係反擊呢？去咗邊度？今季唔少入波都係靠快速嘅攻勢得手，而防守反擊亦都講求快速嘅反擊，但係今仗熱刺就正正做唔到有效嘅快速反攻，大約只有兩次，導致上半場嘅攻勢並唔多。主要原因係李城喺前場嘅壓逼同mark人做得非常好，防線較前，導致熱刺冇辦法將個波交俾前線嘅進攻球員，即係老孫同哈利簡尼，或者由後場傳波/帶波出去，更加好易被反搶，俾對方重新組織攻勢，而且對方嘅回防亦都非常快。至於臨完半場嘅十二碼，奧希爾嘅動作的確太魯莽、太心急，唔講仲以為打緊rugby。雖然佢今季進步咗唔少，但係睇嚟呢個先係一貫嘅奧希爾，太過急躁啦。

下半場喺再失一球、落後嘅情況下被逼採取主動，但係主攻正正係熱刺最唔擅長嘅一套。李城嘅踢法亦都十分聰明，你越係主攻，我嘅防線就越縮越後，專攻擊你嘅弱點，或者咁講，直接令熱刺不攻自破，因為熱刺都冇可能攻得入。同對水晶宮嘅比賽一樣，到需要主攻嘅時候，往往攻唔入，最後只能接受失分嘅結果，所以依家嘅熱刺絕對需要練習多啲主攻嘅進攻方式，以備不時之需，否則只會不斷失分，相信呢點摩連奴都會留意到。另外，喺換走當比利同洛希素嘅情況下，熱刺缺乏派牌同組織進攻嘅球員，喺主攻嘅情況下更加冇辦法撕破對方防線，攻勢自然欠奉。
除此之外，今仗我都睇到唔少嘅弱點。


首先喺體力方面，好明顯去到中後段好多人已經體力不足，跑動相對少咗。越踢梗係越冇力㗎啦，你估我唔知咩，但係唔係一個人係咁，係成隊都普遍係咁，睇嚟喺體力方面要有啲部署，始終呢排多比賽，進入聖誕快車期。
第二，喺鬥志方面都係好輸蝕。輸咗第二球之後成隊好似死曬咁，鬥心去曬邊度？輸人唔輸陣，正正就係輸緊兩球，你喺鬥心上面先至唔可以輸俾人。一隊波如果輸心理，場波就真係冇得翻身，而喺大家冇咩鬥志嘅時候，隊波更加係越踢越沉，試問場上嘅士氣又點會好？當然體力同鬥志某程度上掛鈎，踢到個個死曬，又真係難啲有鬥志嘅。


概括啲講，今仗輸波我會歸咎於三樣嘢。第一：快速反擊戰術失敗。第二：唔識主攻。第三：體力同士氣嘅問題。

今場完咗，但係今季未完。「波係圓嘅」，未到最後一刻都未知鹿死誰手，繼續努力。COYS!!!

鍾意我呢篇文就訂閱Fanpiece同follow IG啦!!!! IG: spurs_news_hk