肥普執掌PSG 影響嘅會係熱刺?

spurs_news_hk 於 27/12/2020 發表 收藏文章
最近巴黎聖日耳門教頭杜曹喺一場大勝之後無端被炒,有傳係同佢訪問中嘅言論有關,但係傳得更加犀利嘅係前熱刺領隊普捷天奴將會接任。回應返標題,究竟呢名前熱刺領隊入主巴黎,又會對熱刺造成咩影響?好多人都會覺得,肥普會帶走熱刺嘅舊部,特別係缺乏上陣機會嘅阿里,但係答案係----唔會有影響。原因係與其帶走阿里,倒不如將其他前熱刺球員帶到PSG,難度相對較細,而最符合呢個條件,而且比起阿里優勝嘅,就只有被國際米蘭掛牌出售嘅艾歷臣。


當然普捷天奴未必需要更多創造型進攻中場,甚至佢都未必真係會教聖日耳門。呢篇分析亦都只係講緊相對上普捷天奴將艾歷臣帶到巴黎嘅機會比起由熱刺帶走阿里為高,對熱刺嘅影響比較細,並唔代表佢哋真係會去PSG,暫時都只係傳聞。


難度方面,坦白講,只要俾得起錢,就可以帶走艾歷臣。當然錢絕對唔係PSG要考慮嘅嘢,所以係冇咩難度嘅。當初國米都只係抱住執平貨嘅心態簽艾歷臣,到依家佢喺國米相信都過得唔係好開心,融入唔到干地嘅戰術體系(工兵中場>創造型中場),上陣機會並唔多,就算季初特登為佢打造適合嘅戰術(3-4-1-2陣式中進攻中場嘅位置),效果都係未如理想,一直都未能交出十分好嘅表現,主要都係後備上陣。只要傾好價錢同合約,確保足夠嘅上陣時間,艾歷臣絕對願意跟隨普捷天奴,始終艾歷臣喺戰術上嘅地位唔高,亦唔係核心球員,更何況國米絕對願意放人。


相反,雖然阿里喺夏天有傳會外借到巴黎聖日耳門,亦都逐漸淡出正選陣容,但係唔代表摩連奴、或者熱刺,一定會急於將佢送走,更加唔代表佢已經同摩連奴決裂。摩連奴都曾經喺上季當眾批評當比利,之後都有過唔同嘅轉會傳聞,但係今季佢繼續留喺熱刺,仲係陣中嘅重要球員,得到摩連奴重用,表現相當唔錯,比上季大有進步。鬧你都係因為緊張你啫,唔想你進步一早賣走或者雪藏你啦,所以阿里嘅情況都係一樣,摩連奴同阿里相信並冇不和,反而摩連奴真心想再俾機會佢。始終摩連奴都係想球員多啲參與防務,如果阿里能夠係防守方面多幾分努力以及喺球場上面表現得相對沉穩一啲,話唔定能夠重返比賽大軍名單,甚至係正選陣容。因此,由於阿里本人相信仍然有留喺熱刺嘅意欲,要將阿里帶到巴黎嘅難度並唔細,就算係外借都係咁話,成事難度頗高,要過熱刺同阿里本人呢兩關,包括上陣時間、借用/轉會費、薪金等等,相對上自然取易不取難。阿里喺熱刺嘅情況,稍後會出文再講。


由此可見,小弟覺得普捷天奴喺熱刺帶走舊部,尤其係阿里嘅機會並唔大,相對上對熱刺冇任何影響,反而招攬效力其他球隊嘅前熱刺球員嘅可能性更大,例如頭先講過嘅艾歷臣等等。至於熱刺其他主力球員跟隨普捷天奴去聖日耳門嘅可能性亦都唔高,所以小弟認為普捷天奴上任PSG教頭,對熱刺都冇咩影響。

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→