【樂壇美斯】業餘聯賽又有靚波!前港青男歌手大演罰球神技(有片)

森美爾足球勝地 於 28/11/2017 發表 收藏文章
業餘聯賽喺香港呢個彈丸之地,確實提供到唔少機會俾一眾波友過下癮,小編都唔例外,都係一個weekend footballer嚟架。呢啲業餘聯賽唔好睇佢哋玩玩下,有時一個唔留神,隨時有世界波睇架!而呢球波嘅入球球員,原來大有來頭!

▼  即刻去片:
loading

事緣係一場香港球迷會聯賽,由各支歐洲球迷會嘅自組球隊組成一個聯賽,互相較量。呢一場就係巴塞隆拿球迷會對祖雲達斯球迷會(咦,今屆歐聯分組賽翻版喎!)。比賽中,巴塞隆拿球迷會獲得一個罰球,由隊中主力,曾經效力香港青年軍嘅安仔——陳健安一射入網,呢球波力量同角度兼備,真係「寶刀未老」!就連佢哋嘅經理人都話,不如趁住休團期間復出踢波啦!

▲  安仔球員時代踢過港青。

▲  安仔曾經係港甲球會流浪嘅成員。

安仔14歲開始踢香港青年軍,2007至09年球季都踢緊港甲,分別效力過香港08同流浪。可惜嘅係,唔止安仔,當年香港08嘅隊友大多數都離開咗職業足球呢條路,剩番落嚟仲踢緊職業嘅,剩番梁興傑、陳銘剛、曾錦濤、陳文輝同埋效力中超貴州恆豐智誠,同時返咗香港開餐廳嘅歐陽耀冲。

▲  安仔玩花式都好勁!

老老實實,小編都有幸同安仔交過手,腳法同速度真係冇得輸,話過就過。箍波亦都有一手,守佢嗰陣係完全搶唔到佢波!不過安仔唔止踢大場勁,花式足球都有一手!佢曾經喺2003年攞NIKE Freestyle公開組冠軍(花式足球),2009年同朋友成立咗香港頭一支花式足球隊 <Techni Freestyle Soccer Crew>,喺2014年同「歐冲」成立咗<TeC2>,去推動花式足球運動。

大家想睇多啲安仔踢波,不妨去支持下巴塞球迷會嘅賽事啦,咁就可以一睹呢位前港青成員嘅風采架喇!

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→