慈善賽超搞笑:細哨No-look任派,雲達華治花式入球

「細哨」又嚟啦!朗拿甸奴退而不休,慈善賽、表演賽必定少不了請他落場,因為娛樂性一定有保證!

今個周末上演呢場慈善賽係由朗拿甸奴朋友隊對法蘭克福明星隊,未開賽已經勁搞笑,細哨一出現就有班著哂黑衫嘅球迷衝埋去包圍,唔講仲以為有咩暴亂事件,佢都笑笑口selfie一輪,但始終唔好要人等,終於勞煩工作人員解圍至開得波,細哨仲跑「之字」扮擺脫球迷追纏。

朗拿甸奴在比賽中不斷表演拿手絶技"No-look Pass",前又得,後又得,得咗,人人有份。

開賽十分鐘,佢鞋底搓一搓,通完人坑渠連隨再No-look,睇到觀眾如痴如醉,之後入禁區又好誇張咁插水,然後同球證「沙冧」,個樣好好笑。

剛剛宣佈掛靴嘅雲達華治初玩慈善賽已深明比賽真理,在禁區自轉360度用後腳掃個波入網,仲瀟灑過當年踢熱刺同漢堡個時,好難想像佢近兩季在丹超竟連後備都踢唔掂,去唔到中超美職掘金,就此退役。

呢場波最嚇人嘅係曾獲德甲金靴嘅前雲達不萊梅「肥仔嘜」艾列頓,而家人到中年,變咗肥叔叔一名,反而冇見好耐嘅前AC米蘭門將迪達就清減不少。

至於最搞笑都係而家仲踢緊薩斯索羅嘅奇雲保定,佢一時拎張紅牌出嚟亂咁派,一時將法蘭克福件波衫塞畀細哨,要佢立即倒戈,咁細哨又真係笠住對手件紅色衫過對面投敵,笑爆全場。

最後講吓最唔重要嘅賽果,細哨個隊贏5比4。入球球員除咗細哨,仲有德國名宿芬寧斯同古蘭爾。
source : 《Givemesport》

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→