[轉載英譯繁]英超兩大傳奇盡訴心中情 --- 里奧費迪南專訪謝拉特

藍斯有波講波 於 25/06/2015 發表 收藏文章

利物浦傳奇謝拉特告別了英超生涯 , 今季將加盟美職洛杉磯銀河 。

在他前往美國前 , 他接受了前英格蘭國腳 --- 前聯賽對手曼聯的里奧費迪南的專訪。 盡訴心中情。

里奧 : 係你利記早期時 , 記得有次你講左句野好有深度 " 對於超越我位置範圍的野 , 我真係有心無力"

謝拉特 : 我係利記的第一場波 , 個時的領隊候利亞將我放係右後衛位置 , 個場波係對熱刺 , 我負責睇實David Ginola

哇 , 當時他真係勁到呢 , 又大隻過我 , 又快過我 , 又有實力過我 , 當時要我MARK實佢 , 點MARK啊 ? 大佬
當時我忍唔住問自已 , 我仲得唔得啊?

個次之後 , 候利亞經常單對單比我意見 , 過兩招比我

" 過去個18個月 , 你係唔係沒好好管理好你自已呢 ? 你做唔夠建身工作 , 你對你隻腳 , 你的力量的訓練唔夠 "

"簡單D講就係你而家身體仲係好弱雞 , 唔夠壯"

"我睇得出你係有才華 , 黎緊個6個月 , 我會好好訓練你 , 阿謝我唔係想笑你 , 不過而家睇你踢波 , 真係好似細路仔同大人踢波咁。

從個時起, 我就由基本做起好好健身 , 操FIT好自已 。


里奧 : 從球會或其他地方 , 有冇邊個係啟發你 , 令你開竅成為足球員的呢?

謝拉特: 對我黎講 , 我心目中的球場偶像係Jamie Redknapp 同 Paul Ince , 另外仲有 John barnes , steve Mcmahon , Ronnie Whelan , 我好想訓練時我的實力可以對抗到 , 乃至完全對抗到佢地 , 所以訓練個陣我唔會將他們當係隊友乃至對手 , 而係想超越的對像 。


里奧 : 候利亞2004年將你提昇為利記的隊長 , 統領一隊你支持的球隊。 你個點睇呢?

謝拉特 : 個時對我黎講有D快 , 我覺得我個陣係更衣室中 , 隊友仲唔係好信服我同埋聽我講野 , 最尷尬係要我係希比亞手入邊拿下隊長呢個位 , 他做了我隊長好多年 , 而且做得好好 ; 但......而家惗返起 , 轉個角度睇 , 有D野就係咁逼出黎, 做隊長令我成熟左 , 思維想法上都快左好多 。都係一件好事



里奧 : 2004球季 , 利記一無所獲 , 候利亞引咎辭職 , 有唔少閒言閒語都講你對於球隊的發展唔開心 ; 呢個時候賓仔黎左 , 而且帶左好多美好時光比球會。

謝拉特 : 毫無疑問 , 2001球季我地係好成功的。我地感覺同英超冠軍的距離愈黎愈近 , 02世界杯後我地仲簽左好似杜奧夫啊 或 戴奧等球員 , 個時我會惗 , 呢班球員可能幫我地帶到聯賽另一層次。

但幻想同現實往往係另一樣野 , 新黎個班做唔到。 我個時可能有D天真或者可以講我係太老實, 我講新黎個班唔惦 , 但出邊D人就講我因為佢地令球隊成績轉差 , 受到挫折所以唔開心。
當你係踢緊曼聯或利記等的大球會 , 如果個季一無所獲無冠 , 個距離就會拉遠左 , 愈跌就會愈遠 ...... 點都要有D改變令個勢起死回生。


里奧 : 你係利記經歷咁耐 , 邊個同你合作過的領隊係你最鐘意的呢 ?

謝拉特 : 嗯... 最鍚我 , 最支持我 , 最關心我一定係候利亞 ; 對我黎講佢就好似我老豆咁 , 唔理係場上或場下他都好照住我。

我同羅生都合作得幾好。 他同鶴臣都係偉大的領隊。

但賓仔一定係帶比我最多美好時光。

我唔知佢係點睇我啦 , 唔佢佢鐘唔鐘意我 , 他同我合作開唔開心等? 所以每一季每一場波我都會去到好盡去吸引他注意。


里奧 : 車路士曾經對你有興趣 , 你有冇後悔無上車同摩連奴合作呢 ? 他係一個係世界好多地方都拎過冠軍的領隊。

謝拉特 : 我好鐘意呢個領隊 , 都好鐘意呢個人 , 不過我同佢關係呢幾年愈來愈疏遠。

我係遺憾無同呢個領隊呢個人合作過 因為我覺得佢會令我更好更強, 同時會幫助我拎更多獎杯。

但當我睇返轉頭 , 我無後悔無簽約車路士 , 對呢件事我完全無後悔過 , 直到現家我都好滿意我當時的決定。

我由細就係利記成長 , 由細踢到大 , 雖然近呢幾年成績麻麻, 但佢對我黎講係愛同埋我人生美好回憶的一部份 , 幫利記贏4,5個獎杯個種感覺開心過幫車路士贏10,11個獎杯 , 意義更大。



里奧 : 我明你講咩 , 呢D叫忠誠 , 你覺唔覺而家的足球就係缺乏左忠誠呢樣野呢 ?

謝拉特 : 你應該睇得比較少。而家呢一代無咁易留底的了 , 轉去呢度轉去個度。 有D係為錢,有D係為得到更好機會。係咩令我係利記留咁耐? 我老豆係利迷 , 仲有我的兄弟 , 我的朋友 , 有好野我都會同他們分享 , 例如勝利的喜悅 ; 就算係當年我決定留係利記或是離開 , 都有問他們意見。 大家是坐埋同一條船 , 個心都係利記。呢D野局外人好難理解。


里奧 : 我會明白你個時點解咁做 , 同埋為呢個決定感覺自豪

謝拉特 : 我個心係偏向利記呢邊的 , 有時我都覺太過偏坦。可以講係過分忠誠。但我知個心一直當利記係大家庭 , 就算而家我走左 , 我都會想睇利記的比賽 , 我有埋今季的季票添。

我8歲就係利記大 , 如果我當年去左車路士 , 一切都會唔同哂 , 我係利記太多回憶太多牽挂了 , 唔係話走就走到。


里奧 : 我記得係你上次幫利記3:0大勝曼聯個場波 , 當時你對住個攝影機大嘴特嘴 , 個時我真係想一野跳入電視機 ......

謝拉特 : 哈 , 我估個時除你外 , 所有曼迷都想打X我。但我鍚個攝影機不是認真的,純粹想同曼聯開個玩笑。

我都記得你地3:0戰勝我地利記 , 我地都聽到你地係更衣室開住歌跳住舞咁慶祝。有D直情走埋黎我地更衣室門口前大叫。 如果比賽入邊冇呢樣野的存在 , 可能你對贏下比賽個欲望就會少左 , 因為你知當輸左就會咁下場。



里奧 : 講完開心野,都講下傷心野 , 13/14球季, 我記得睇住你地擊敗曼城 , 你地已半隻手拎到聯賽冠軍 , 但個場波對車路士後一切改變哂 。

謝拉特 : 個場波我地係戰術上輸左 , 對手太老練了 , 我地係擊敗曼城前 , 同其他對手都係咁踢 , 全攻型踢法 , 而且完勝他們 , 蘇亞雷斯同史杜列治踢到著哂火 , 係咁入波 , 仲有史達寧 , 連我的狀態都好好。

我地贏左曼城 , 場波未踢前我地聯賽排名仲排係他們後邊 , 但我地想超越佢地。當對曼城時 , 我地控制住場波 , 我地全副精神入哂係場波度 , 雖然一度被追返 , 但最後都贏左呢場波。我地好努力。個時勝利後的氣氛, 真係好鬼正。



當去到車路士場波 , 講真真係唔可以怪得哂羅生 , 我地係用返之前的戰術迎戰車路士 , 我地估車仔個邊可能有少少換人或戰術調動 , 不過我地好有信心將他們打低 , 但係我地太低估摩連奴 , 太低估左佢的能力。

成場波都係佢掌握上 , 我地之前的努力前功盡廢係佢手上 , 他將成架車變成銅牆鐵壁好難擊毀。我地竟無辨法。 可以講他係黎搞亂我地個Party。

個一冼發生係最唔想出現 , 最壞的時候 , 如果我無冼底 , 個結局會唔會唔同呢 ? 有機 , 但係我真係唔知。

講真個時發生係半場 , 我地仲有半場時間去追返 , 但我同球隊都無咩爭冠經驗 , 由其係最後衝刺個下。

我地的反應係追 , 窮追到底 , 盡快追返個比分 , 但我地個時亂哂 , 迷失左 , 只知追 , 但連個方向係點追都唔知。最終我地被人牽住走 , 係咁玩 ; 其實我地應該惗下係 點樣去追 而唔係亂追。


你一定要臉皮厚少少去接受一點一滴批評 , 我唔怕所有對我的批評同埋壓迫 , 我明白D人點解會咁做 , 講真個一冼真係令我都好傷 , 個傷口唔知幾時先會好番。

有時我都會惗 , 我自問我利記的生涯都好美滿 , 如果無個次單野 , 拎到英超 , 真係會為我利記生涯錦上添花。 不留遺憾。

雖然利記唔比人睇好 , 但我同球隊都完成好多夢想 , 我同球隊都有好多美好回憶 ...... 呢D會陪住我一生一世 , 唯獨個道傷會陪住我 , 我估我要離開人間 , 個道傷先會離開我。

里奧 : 你覺唔覺利記搵到人頂到蘇亞雷斯個位呢 ?

謝拉特 : 冇 , 這樣係冇可能頂到 , 就算係再之前的托尼斯都好難搵到人取締到 , 蘇亞雷斯來得好突然 , 我都未完全了解佢 , 他係世界級的球員 , 你叫我地點再搵 ? 就算我地有大把錢 , 對方又肯來我地隊波 , 唔介意現階段無歐冠踢 , 但... 真係好難搵到人取締到蘇亞雷斯 , 史杜列治可以講同利記時期的托尼斯或蘇亞雷斯接近同"呢" , 他的表現不可思義。 但他因為傷,唔可以成日出場。


里奧: 我睇左利記對皇馬 , 個時真係等唔切睇呢場世紀大戰 , 但個場波你係......後備席度 , 如果我係你對鞋 , 應該會好失望 , 呢場係你最後一場歐冠 , 仲要係對皇馬...


謝拉特 : 賽前我同羅生兵傾左好多野 , 他開始幫我"計數" , 同我講"我睇左你好耐 , 我希望你保持精力 , 我唔想你每星期都踢足三場波 , 咁樣你會好累"

個場波對皇馬我真係好想踢 , 大佬啊 , 皇馬啊 ! 但因為我同羅生的關係 , 我接受左佢的意見 , 但我坐係後備席上個種感覺真係好令我難忍 , 我估你都試過想踢又無得踢 , 想為球隊出份力又出唔到的個種感覺。

個次之後 , 我開始係度惗 , 謝拉特係唔係應該照羅生咁講行落去 ? 定係有其他唔同方向呢 ? 好老實講 呢場波之後迫我做左D決定......



里奧 : 你覺唔覺球員同球員間的因不同球隊出現的敵對關係影響左國家隊在杯賽上的成績呢 ?



謝拉特 : 有可能 , 我覺得而家隊波入邊有幾派 , 我一般認為踢國家隊要6日左右先可以甲到 , 係而家呢隊國家隊 , 你會想一個人食飯訓覺 , 同其他人保持距離 , 可能係怕羞啦 , 因此需要一D國家隊氣氛 , 去令大家互相了解 , 並肩作戰 , 利記D外籍球員一般會提前一星期去國家隊 , 因為他地鐘意他們的國家隊 , 係等唔切 , 所以提前走。

但對於英格蘭國家隊 , 可能係 "唉 , 我地又要離隊8日入營" , "呢條友物水...我都唔識佢" ,"我係唔係有D靜同怕羞" 仲之有種隔膜係度。


里奧 ; 你覺唔覺聖佐治公園 (英格蘭訓練基地) 需要改變 ? 我最近去左 , 真係好單調 , 好似只為足球整出黎咁。


謝拉特 : 佢地需要加D野落公園度 , 一D實際的野落呢塊地度 , 例如可以舉辦一D高爾夫班比人讀啦 , 做得親民少少啦 。

呢度係一個好好的足球訓練基地 , 但當無比賽或訓練個陣 , 呢度真係好悶 ; 足總應該將呢度變得更好, 我地需要創造一個好氣氛比班球員 , 令佢地鐘意留係國家隊入邊同埋做得更好。




原文 : http://www.dailymail.co.uk/sport/football/article-3136408/Steven-Gerrard-Q-Rio-Ferdinand-departing-legend-kissing-camera-Manchester-United-snubbing-Jose-Mourinho-Liverpool-blew-title.html


我想了好久 , 最終選用回上一次馬甸尼和卡歷查訪問的口語化形式 , 希望大家仍會喜歡。

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→