[英超講場] 球員分析 : 低谷中的連加特 精選

隨住疫情令差不多全球嘅足球賽事都停擺下，相信仲有唔少球迷至今都仲未習慣到週末無左足球嘅陪伴，至少小編就係其中一位啦！隨住各大聯賽都係經過投票下，大部分表決同意盡量嘗試完成賽季後，小編都樂於見此，始終再多嘅方案都好，都有不足不公平嘅地方，所以就唔沉氣同大家講每個方案背後嘅好壞處啦！若果有興趣嘅你都可以睇翻小編上一個post。「英超講場 | 肺炎肆虐下賽季若腰斬應何去何從？」
今次就想同大家分享下曼聯今年嘅焦點人物: 連加特，借住外國記者嘅數據分析下係咪原因令佢失靈，係真係時運低？還是純粹因為佢個人表現欠水準？一齊落去探討下！岀身於曼聯青訓系統嘅連加特係學院晉升後就透過租借到英格蘭唔同聯賽及球隊獲得實戰經驗後俾曼聯收翻黎自用，經常係決賽嘅時候入波令佢獲得球迷及教練嘅留意，岀場次數及機會愈黎愈多。隨住人愈大，佢嘅光環就相反反而愈暗淡，去到今個2019至2020球季，係英超零入球及零助攻嘅佢受到唔少球迷批評，就連原本愛錫佢嘅蘇B都係今季睇唔過眼，係一次場邊用粗口批評佢及後更係停賽前嘅唔少比賽都將佢放咗入雪櫃，可以話遇着佢人生一個低谷。有見及此唔少人都叫佢不如離開曼聯再去踢啱自己水平嘅球隊啦，但連仔就係一次訪問下透露寧願留低冇波踢都要努力去爭返一個正選位置，講就好好聽啦，但又係咪咁易？根據The Athletic 記者Tom嘅文章，佢好詳細咁為連加特係各方面嘅表現同英超2017-18及19-20其他28位踢過CAM嘅球員作出比較，得岀左以下幾項特別突出嘅數據。

• 嘗試傳球進入禁區，分別於兩季排第20及第28名。
• 因機會下創造嘅預期入球分別排第26及第28名。

上面嘅數據就吊哂車尾啦，作為big6嘅一位球員黎講就當然係唔理想啦！再望埋下面佢又有啲咩係名列前茅:

• Turnover百分比: 分別於兩季排第6及第7名
• 犯規次數:分別於兩季排第2及第3名
• 持球距離: 分別於兩季排首位及第2名

不妨再配埋以下呢條連仔2020合集，望下數據以外嘅真實畫面。https://www.youtube.com/watch?v=NXeRGT7UlTo
就以一名CAM黎講，相信見到上面嘅數據同影片都好明顯知道佢唔合格，呢個位置係技術及個人能力嘅細節層面上要求比較高，特別需要良好嘅視野及判斷能力，再係配合個人能力之下，為隊友製造機會，甚或需要上前完成埋門嘅一腳。但睇翻數據，連仔成功透過傳波入禁區嘅次數竟然就排第尾！而自己把機會就同樣差，可以講話無樣掂，難怪俾人叫做進攻終結者。係上面嘅片段中，我地可以留意到佢嘅first touch係奇差，成日攞波都會跳起甚或至飛走，經常就因為咁令球隊喪失控球權，唔單止要重新做過攻勢仲都機會俾人打反擊。另外，就係佢就算控得住個波都好，都會因為推得太大力而令自己失左個波，只係透過橫沖直撞嘗試避過對手而唔係靠配合去打穿對方。仲有就係佢射同傳嘅判斷都會經常操之過急，會勉強地轉身交波同射波令準成度嚴重下降最終又係導致球隊失去控球權，亦都係因為咁間接令佢犯規次數名列前茅，為嘅就係想急於係用技術犯規爭取時間，等隊友跑翻翻去做防守。喺以上種種問題之下，基本上連加特嘅條件實在難以令佢有能力去爭奪正選攻中位置，加上係B.F.加盟後可以真係話難過登天。話要留隊證明自己嘅佢又應該如何是好？其實以連仔黎講留係曼聯並唔係一個問題，我都欣賞佢即使係今季受盡批評之後都仲想留隊證明自己嘅心態。但首先佢要接受佢位置嘅改變以及無穩定正選嘅情況。位置上，以佢嘅過往數據及個人能力而言，真係需要離開球隊中路嘅位置，考慮嘗試翻翻去兩側進攻點。望翻數據，連仔嘅持球距離係兩季之中都分別排首名以及第二名，證明佢經常可以有效地帶住個波做到推進，係中路盲推就當然會岀事，但如果係兩側，情況就會好得多，仲算有少少後生嘅佢仲有速度及敏捷可以應用上側翼，做一邊嘅突破點，就算失控球都好都無中路咁傷，呢個位置變動對佢而言係唯一岀路亦係必須，但當然佢都要加緊訓練強化自己first touch以及交波能力，否則俾佢爆到落底線都好，波都岀唔到又點樣成功有貢獻，同埋隊中兩側人選亦有唔少人選，要爭贏新力軍james等人都真係要下啲苦功，咁連仔先有機會係紅魔鬼揾到生存嘅空間，否則佢呢一次嘅低谷就只會繼續走下坡，幾年年事已高後就唯有轉戰低級別嘅聯賽及球隊，岀道嘅光輝一去不返。希望連仔係呢次疫情停賽其間有把握時間望下自己今季問題，係球賽重啟後用表現去證明俾人睇自己嘅實力，延續年輕時嘅光輝，亦為母會曼聯復興岀翻一份力。最後附上The Athletic記者Tom嘅數據原文同大家分享！有興趣嘅球迷不妨睇下!
{What does Jesse Lingard do best? Which clubs would he suit?}