英超講場 第十六期週報 -- 『般尼與戴治結束十年長跑,「升降機」富咸下季回歸英超』

英超講場 於 21/04/2022 發表 收藏文章
般尼與戴治結束十年長跑
過往我地每每都可以見到般尼係戴治帶領下,每季尾都可能憑硬朗嘅足球表現帶領球隊護級,下年繼續留係英超耐唔耐扮演巨人殺手。但今季,係升班馬賓福特,競爭對手紐卡素上夠分上岸後,再加般尼今季自身防守失靈,今季睇勢頭睇怕要降班。球會亦都好似見住希望消失後,決定順應足球潮流炒教練,一係搏下新教練會唔會有妙計搶分,二係反正球會就降班,倒不如搏嘅同時為未來組建新班底同球會睇下殺翻上嚟,反正保留過去硬朗英式傳統踢法今年就算護到都好快要再擔心。現時係戴治分手後,般尼由由麥克積遜成為暫代領隊,以同場數下少愛華頓4分,嚟緊7場不容有失。
「升降機」富咸下季回歸英超
係啱啱週中,唔少聯賽都趁空檔開左快車,包括鬥到白熱化嘅英冠。而富咸就把握主場機會以3:0贏無欲無求嘅普雷斯頓,擺脫早前幾場贏唔到嘅走勢,提早以頭兩名直接升班資格下季再戰英超,正正同第二部升降機諾域治一上一落交換位置,而前鋒米祖域可以話係今季升班功臣,今季為球隊攻入40個入球實在唔簡單。希望佢係下季唔需要再陪球隊降班,可以係英超留耐啲,離開升降機嘅命運。
TA: 哈蘭特已為曼城開綠燈,並初步同意條款
眾所週知,哈蘭特係會走而隊隊都想要,原本傳嘅就係各大強隊皇馬,巴黎等等。而係過去幾日曼城就一下子跑岀,有指球員已同曼城傾好個人條款,球會亦準備好啟動佢嘅買斷條款,更願意為佢提供高人工嘅合約,勢要今季後補翻個強勁箭頭下季保持競爭力。有記者就向哥帥問有關呢單轉會傳聞,但就表示無可奉告,真正情況可能要等多一段時間先至水落石出。

如果喜歡我們的文章,請即分享到︰

標籤: 般尼  戴治  愛華頓  升降機  富咸  哈蘭特  曼城  皇馬  英超講場  英超  

留言


請按此登錄後留言。未成為會員? 立即註冊
    快捷鍵:←
    快捷鍵:→