英超講場第四期(下)丨「復仇者摩佬」三集過後終於迎嚟Happy Ending

英超講場 於 07/10/2020 發表 收藏文章
嚟到呢期下集,終於講到呢場「復仇者摩佬」啦。正如我賽前報道所講,摩連奴上季帶住熱刺對住曼聯淨係得一負一和嘅成績,心入面當然想盡快威番次俾舊東家睇,而今次佢就終於做到啦,仲以大炒嘅姿態去完成呢個拍左三集先至有Happy ending嘅復仇者,即刻入正題報道呢一場比賽。
排兵佈陣上,對於曼聯有兩點我係賽前報導係估中架,就係蘇B終於肯用Bailly代替成日被問責嘅Lindelof,同埋就係真係俾我睇死無左用上季所謂奇陣3中堅打大戰,繼續4231起用正選11人嘅框架。而對於熱刺我就相反有兩點係估錯架,賽前我有認為摩佬會用5後衛大巴戰術,嘗試守岀生天,同認為Son復岀只係煙霧彈,最多只係後備。點知落到場又真係俾佢踢到正選,仲交到兩球入波嘅表現,真係不得不佩服呢一位亞洲球星近期表現。雙方喺開波早段, 11個對11個嘅情況之下,主隊係傾向比較主動上前壓迫嘅一方,而熱刺就主要係中圈附近做一啲簡單遮線動作,同埋中低位嘅壓迫。開波幾分鐘曼聯就趁熱刺未撻著,22秒就搏到未入狀態嘅Sanchez一次禁區犯規,早早領先1:0。點知1分鐘快樂嘅代價係換黎痛苦嘅89分鐘。早段領先嘅曼聯其實已經掌握最好嘅風向,做好防守打好反擊就會再一次令摩佬者呢一位復仇者失敗。點知就係做唔好最簡單嘅事,兩個問題下令自己宣告投降。
分翻開呢兩個問題黎講先,首先曼聯防守佈置上岀現嘅問題令自己順風變逆風。係領先後,曼聯並無嘗試拖慢節奏,反而同對方一齊急,壓迫失敗後球員補位做得差,令兩側再次係白禮頓個場之後再一次岀現穿哂大蕯。左右閘往往因為企得太前去防守要後面三人整體向左同右移,令對面海嘅側邊永遠就得翻啲草係到。當對方一轉邊就輕鬆落底傳中,最常見嘅就係Shaw係跟整體防守線右移嘅時候,會收到落去中堅嘅位置,前面嘅Rashford又好兩位防中又好亦趕唔切出現返係側邊包返條走廊,令曼聯兩側嘅防守話穿就穿。好明顯就可以留意到,曼聯睇防守報置上並無去考慮點樣限制對方,特別係當面對對方快速反擊嘅時候,手忙腳亂。最亂個球就一定係失嘅第一球,Maguire竟然拉低自己隊友Shaw,留意番當時Shaw已經食咗身位就差一腳去解圍,但呢位中堅咁有特色嘅防守令佢失哂平衡俾Ndombele輕鬆近ban入網,一支強隊嚟講出現咁嘅防守畫面都可以話係幾肉酸,自己攞水淋熄自己團火,早段領先嘅優勢就係咁先。喺落後之後佢哋就繼續保持壓迫去拉大自己後場嘅空位,畀熱刺有更加多空位去進攻,並且佢哋十人應戰時用嘅係432,喺對方433/4231 嘅情況之下,側路就變相得一位防守球員,成日都出現二對一嘅局面,曼聯嘅側邊可以話係俾人打爆曬,尾段轉441企位亦為時已晚。
而第二個問題就在於紅牌上,28分鐘一次防守角球下,Lamela係球證唔覺下請Martial食左一下飛掙,年少氣盛嘅馬仔係球隊瞬間俾人反cup下又食左下掙,就好衝動咁即時送翻巴寒冰掌俾Lamela,錯有錯著呢下就俾球證見到紅牌被趕出場。當然,呢下報復性嘅動作當然紅牌就走唔甩,但奇怪嘅係VAR又係適當嘅時候offline左,完全無介入提醒球證去場邊睇片,等佢考慮下Lamela個一下非必要嘅掙頭有無需要被罰紅牌,就急急腳趕走馬仔之後重開比賽。跟住更奇怪嘅係鏡頭係角球之後交代球證係事後補左張黃牌俾Lamela,姐係球證知發生咩事但就覺得Lamela呢下只係黃牌尺度嘅犯規,有少少大細超之嫌。皆因當時並唔係係爭奪皮球途中,雙方等開角球下,Lamela係有意發力批向馬仔,其實合理上都需要紅牌警告呢啲Violent conduct嘅行為。至於馬仔,就只可以話佢太過衝動,其實若果佢食左下掙之後,借題發揮做下戲,球證就會主動了解佢睇唔到嘅畫面,VAR就有較大機會介入,係慢鏡重播下送翻張紅牌俾對手,造就70分鐘打多個嘅優勢去追分,結果可能好唔同,亦再一次證明「衝動是魔鬼」呢個道理。
無論如何,係紅牌岀現前,曼聯整體準備功夫以及球員心態都唔及對手熱刺,雙方教練佈陣亦有明顯差距,細節位上造成勝負嘅關鍵因素。曼聯亦浪費左自己賽前絕對嘅體力優勢同早階段送上門嘅領先局面,再係紅牌影響下導致一場大敗,令摩佬完成佢嘅復仇勝利,一吐當時離開奧脫福嘅烏氣,亦俾我講中佢一定要係賽後訪問牙刷翻次。至於蘇B,隨住時間愈耐就更加睇清佢只係一位相對依賴球員能力打天下嘅教練,只係大概擺個合理企位,等班球員自己踢,狀態好咪贏波,無咩策略性上嘅表現。今場落後期間只見到佢坐係凳上面嘆氣發呆,無行岀場邊喝住隊波,強行喚醒球員士氣,連教練基本嘅臨場工作都好似做唔好,難怪外國一啲賭博公司開到佢俾人炒嘅賠率咁低。
今場大戰報導就去到呢到啦!嚟緊呢個星期就會係國際賽期,所以就無賽後報導。但會留意下轉會窗上比較值得分享嘅資訊同其他新聞,陪大家繼續緊貼英超,到時再見。拜拜!

如果唔想睇咁多字嘅歡迎去我Youtube channel 係個到我會用聲音同大家報導,翻工撘車聽就最岩啦!記得訂閱同開通知就唔會錯過我嘅賽後報導啦!
https://www.youtube.com/channel/UCFljyz_WSzX9CzmoP6UO4Jw


如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→