英超講場第十二期丨曼市兄弟齊渴反擊丨曼聯放下身段再逃一劫

英超講場 於 15/12/2020 發表 收藏文章
英超十二輪就有過往激情四射嘅曼市打吡上演,之所以點解要強調過往係因為呢次嘅打吡同各位球迷嘅幻想有岀入,全場無入球,兩隊夾埋得兩張黃牌,各自得兩腳中龍,就知道呢場比賽雙方都非常客氣,無過往咁有睇頭。不過公道講句雖然就無激情同入球show睇,兩邊嘅打法其實都各自都有自己一套,令我可以係呢次賽後報導有野講下。
雙方球隊都啱啱係週中踢完歐洲賽事,但兩者係個場嘅心態就有天淵之別,曼城係無岀線壓力同唔洗作客下作岀左比曼聯多嘅輪換,而曼聯簡單啲講就賠了體力又岀局,對士氣唔多唔少都有所影響,但叫做係聯賽就keep到4連勝,仲有少少原因可以令人有所期待。陣式上,既然叫得係打吡戰當然大家都精銳盡岀,揀翻套自己覺得最好嘅打法同人手。曼聯每每係硬實力同當刻近況比對手弱嘅時候都唔會用4231,一係4312一係就三中堅,呢啲時候放低姿態係蘇B嘅習慣。今次亦唔例外,4312下比賽前幾日經理人表明已經係曼聯結束生涯嘅普巴就有份正選,搭住大戰必然雙核,前線就由Rashford同Greenwood去等Bruno供應。至於曼城,相信就唔洗我點講,如果唔係多傷兵人手唔夠,佢地就一向維持自己風格,433,4231控球大過天,箭頭老大哥Aguero就係呢場無左影連後備都無,而Jesus就理所當然取代佢,再配埋Sterling,Mahrez同De Bruyne,4231去作客岀擊。
今場打法上曼城有高壓進行迫搶,當曼聯用短波後場開始build up嘅時候,就已經大舉壓前壓到上禁區頂,進攻中場De bruyne企前同Jesus平排各自去迫對手兩位中堅,兩翼就對翻兩閘,基本上限制哂成條曼聯後防持球同岀波嘅選擇,變相曼聯想上前就要被迫用較冒險嘅斬波去過半場,自然就有甩鏕嘅情況俾曼城去把握機會去打快攻,亦成功製造一啲有威脅嘅機會,可惜就處理得唔好,無球把握到,浪費左一個做得較好嘅戰術,畢竟要做到呢個效果同時要兼顧埋唔俾曼聯打到想要嘅反擊要用上唔少體力,係一個博弈嘅雙面刃,而對於想要分數可以爭翻冠軍嘅曼城亦係需要做,同需要有正面嘅結果,可惜就未能把握,而當然佢地成功製造到嘅反擊快攻機會都略嫌有啲少。以呢場結果0:0為計,若果佢地把握到其中一個機會就已經拎走3分,就能夠係咁多強隊一齊係呢輪失分嘅時候偷翻次雞。可惜以上就係曼城最有威脅嘅攻擊手法,以佢地嚟講攻勢實際好有限。
而除左反擊,曼城其實過往都有地面組織,亦係最易攻破對手嘅方法,但點解今場又會無左?造成呢個問題除咗因為曼城無以往咁強調用盡球場寬度外,就要講到曼聯嘅打法啦。曼聯呢場嘅4312,邊路就往往較薄,亦算係弱點所在,早段亦因為咁被曼城輕鬆由後場邊路組織,令自己處於非常襯被動狀態。隨住時間推移,佢地選擇用442去做防守,Bruno就拉上去,中場就Greenwood加埋三位原有中場。而轉左呢個企位之後,佢地就鎖住曼城中路嘅向前選擇,曼城係組織嘅時間,其中一隻防中會移落左中堅位,中場就算計埋回後嘅De Bryune都只有兩個選擇,俾對方第一層嘅防守限制同封鎖,直接搵左右兩翼亦係唔理想嘅選擇, 令中路好難有空位去打上去,耐左就變曼城打唔入自己嘅局面。而曼聯主要嘅優勢就只係靠反擊同埋死球,係體力同把握力有限下令佢地都無辦法係有限機會搵到入球,最終造就呢場握手言和嘅曼市打吡。
呢輪之後,英超就開始迎接快車嘅賽程,週中分別兩晚嘅深夜都會有波睇,焦點戰就一定係積分榜一樣分數排一二嘅對碰,利物浦主場對熱刺,相信又係一場值得同大家分享嘅大戰。下集賽後報導再見大家!

如果唔想睇咁多字嘅歡迎去我Youtube channel 係個到我會用聲音同大家報導,翻工撘車聽就最岩啦!記得訂閱同開通知就唔會錯過我嘅賽後報導啦!
https://www.youtube.com/channel/UCFljyz_WSzX9CzmoP6UO4Jw

如果喜歡我們的文章,請即分享到︰

標籤: 英超  曼市打吡  曼城  曼聯  快車  英超講場  利物浦  熱刺  

留言


請按此登錄後留言。未成為會員? 立即註冊
    快捷鍵:←
    快捷鍵:→