英超第十輪焦點賽事預測: [利物浦對熱刺]

翻版嘅歐聯決賽對決將於星期一晚凌晨12:30上演，辛苦哂我地一班球迷睇到2:30再第二朝起身翻工啦。不過當然如果見到自己愛隊有好表現，大戰贏波又有咩所謂喎。


係英超賽場近十場全勝嘅利物浦對上近十場係英超作客未嘗一勝嘅熱剌。雖然利物浦上場爆冷只可以同曼聯握手言和，但啱啱歐冠賽場就即刻再顯火力4:1擊敗對手，慶幸見到中場張伯倫有好表現。而呢個無疑係對利物浦黎講係個好消息，皆因上場就係因為中場發揮唔好令到球隊冇得全取3分，而佢嘅勇態可以令高普放心地進行替換，維持供應比三叉戟甚至自己可以把握入球機會。唯一問題嘅係，對住近況唔及自己嘅熱刺，相信一定要面對佢地嘅收縮防守。然而小編發現近排利物浦嘅攻擊開始變得單一，少左拉開咁進攻，俾中場後上插入禁區，只依靠兩閘上黎助攻明買明賣，當然有時幸運同埋前面嘅把握力可以成功製造入球掩蓋左問題。但係久而久之若果長期倚賴呢個方法對球隊嘅進攻效率絕對百害而無一利，甚至出現啞火嘅問題，至於點解決同解唔解決到就要睇高普其實有冇意識到呢個問題，如果唔係今場比熱刺守和都唔出奇。

至於熱刺，慶幸佢地啱啱係歐冠血洗對手為球隊搵返少少信心，但係代唔代表可以解決到佢哋近期低迷嘅問題呢？正如我上篇文章所講，球會對待球員嘅薪金，傷兵同選兵等先係重要嘅問題，而當中選兵同取態可以話係唯一可以著手解決嘅問題。首先普帥需要放棄3中堅，我多次強調熱刺其實一直好少用上三中堅嘅戰術，加上熱刺三線上依家最弱嘅可能就係條防線，特別於邊路，今季意外放走捷比亞去馬體會但又唔補充翻合適嘅人選搞到後防成日都無好表現，如果仲叫球員去玩一個自己唔熟悉嘅戰術豈不是雪上加霜，讓利物浦半隻手？若複製曼聯上場352，熱刺兩翼衛人選上比較難有合適嘅選擇，而中場平均速度都比曼聯嘅後生仔慢，大力臣，拉美拿等都唔適合長期做迫搶，未必做到上場曼聯中場線所營造嘅壓力。所以我諗熱刺最適合玩普帥成日迷戀嘅倒三角4312，前面揀翻快馬son同摩拉，防中就用施素高，尼當比利等人。做好近排不堪入目嘅防守再嘗試搵入球嘅空間，呢個相信對熱刺來講係一個比較好嘅取態，當然都可以積極啲用啱啱大勝果場嘅陣型4231，採取積極啲嘅取態，但我就偏向擺多一個防中做好防守先啦，最後當然都係由普帥決定，睇吓有冇機會帶球隊一雪歐冠之恥。