摩佬跟住說明書排陣用人,用勝利宣布回歸英超。[韋斯咸2:3熱刺]

英超講場 於 26/11/2019 發表 收藏文章
就係唔夠一個禮拜前熱刺辭去普帥後閃電宣告摩帥入主執教,簽左三年合約,而之前我都係上一篇文為熱刺咁倉卒嘅換帥行動表示擔憂,不過就賽果所示,摩奴似乎適應得唔錯啵!
唔講唔覺熱刺已經近十輪係英超作客係未嘗一勝,對一支上年踢到入歐聯決賽嘅隊伍黎講絕對係唔合格嘅表現,球員作客心理嘅陰影面積同壓力應該都幾大下。而借住換帥,可以話對佢地黎講打左支短期強心針,放一放低不勝十輪嘅包袱,放翻開黎踢。當然,呢啲都係影響較細嘅因素,最主要都係摩帥入主後帶來嘅即時性改變。
首先排兵上,熱刺排岀4231,後防上都係熟悉嘅面貌無甚變化,皆因兵源有限可以選擇嘅就係得咁多,俾邊個排都係咁。唯獨是摩佬唔會將Dier當中堅用,而係移佢上前一格,做翻佢之前做開嘅防中位,並且取代比較慢嘅一向正選中場施素高,可以睇到摩佬係真係有根據戰術及陣型選人,唔會盲目抄上手嘅功課。仲有另一個例子就係無強行選用大力臣,明眼人其實應該都睇得岀近排嘅佢,毫無狀態可言,不值正選,但之前嘅普帥就會有岀現盲用佢嘅情況,導致球隊進攻斷輸送防守又打少個咁。摩帥就俾阿里係中間做攻中,而唔係之前嘅邊路,就釋放佢俾波視野嘅能力,不時見到佢有靚輸送俾前面同左右嘅隊員。
另外,摩帥亦如我上篇文章所料用上孫大人同摩拉作兩翼,俾佢地可以運用速度嘅優勢為對方後防經常帶黎麻煩。而我覺得可能因為憑住佢呢個月無所事事做個講波佬,令佢熟讀左點用熱刺班人嘅說明書,唔多唔少幫到佢係短時間內可以對成班波有足夠認知,從而排到個靚陣,用陣容激發球員,令佢地都企係有利發揮自己長處嘅位置。當然呢個只係第一場,仲需要時間去觀察多左笑容嘅摩佬係咪真係更上一層樓。不過呢場勝仗,對熱刺球迷黎講點都係件好事黎嘅!

如果喜歡我們的文章,請即分享到︰

標籤: 熱刺  韋斯咸  英超  摩拉  Dier  阿里  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→