雙「失」曼城作客紐卡素失兩分 [紐卡素2:2曼城

英超講場 於 03/12/2019 發表 收藏文章
點解我會叫曼城雙失?因為今場佢地今場係失硬件下領隊又失常,令到自己繼續失分,繼續被全取3分嘅利物浦拋離。對於呢場,由於名氣同埋牌面上實力懸殊,相信曼城除左贏之外,其他結果都可以話係爆冷,係曼城失常定係對手有超水準發揮?咁當然係前者啦!而呢場相信已經對曼城再次衛冕冠軍嘅路途響起最後警號,而令曼城失常主要兩大原因。
一,球隊主力硬件受傷,深度不足,令一向主攻嘅打法係後備球員正選時無法配合及執行。而今場最好嘅證明就係左閘Mendy,執行唔到一向左右兩閘變型系統嘅佢,不但影響成隊波嘅組織,仲無腳好波,交又交失,表現可以話不堪入目。所以已經可以清楚浮現後防傷兵滿營嘅曼城開始岀現拖累成績嘅問題,若要同利物浦再爭一年,睇黎冬窗買人事在必行,唔係仲有排失波同失分。
二,哥帥調動失當。就正如我頭先講,既然mendy表現不如人意,咁點解要留佢係到90分鐘影響球隊?後備席上有安祖連奴揀,當然佢都無仙真高表現咁好,但正常發揮下點都好過mendy呀,然後2:1領先後,竟然放棄控球,想守到完場,放大自己防守差嘅問題,最終俾對方正常把握下禁區頂睇定黎射,射走自己兩分,呢個失誤一定係哥帥孭飛。
當然曼城嘅情況比某幾隊Big6球隊黎講要好得多(邊兩隊唔講啦),但佢地目標當然係繼續爭冠而唔係保持big6嘅名銜,而要解決呢季問題其實都比其他球隊易,主要呢兩個方法。最簡單就係球會董事支持,俾錢做野,鞏固返後防嘅實力,以做返好防守為前提,從而提升球隊成績,減少因為失球而失分嘅風險,要知道開頭曼城可以攞到冠軍,都係先做好後防,然後前面放膽攻,先造就當初聞風喪膽嘅藍月亮。另外,就係哥帥需要抽身,了解到球隊嘅真正狀況,唔好因為被拋離已變得焦急影響自己最基本嘅判斷能力,同埋就算無得買人,都需要留意番培育更多球員去了解同埋執行自己變形系統下嘅戰術,避免因為就算球員受傷就失去執行一向戰術嘅能力。只要落手去做呢兩個行動曼城相信可以好易重振雄風,再度加入冠軍之爭。
標籤: 曼城  利物浦  Mendy  仙真高  藍月亮  guardiola  英超  紐卡素  

留言


請按此登錄後留言。未成為會員? 立即註冊
    快捷鍵:←
    快捷鍵:→